六週年感謝祭套餐而家都只係$598，最正嘅原來仲有無限追加，追加項目包括有南非鮑魚、鵝肝、三文魚、美國牛肉、日本豚肉、虎蝦熱狗、日本蔬菜等，超級易回本，簡直係大癲價。 餐廳裝修充滿時尚風格，我哋坐嘅房間仲可以欣賞到維港美景。🥢沙律先嚟過沙律開下胃。 🥢刺身5點 5款刺身都新鮮鮮甜。 🥢南非鮑魚 (可追加項目)口感超嫩腍鮮甜，帶點海水嘅鹹香，完全唔使蘸調料已經好好味，當下一刻已經決定要追加。 🥢三文魚 (可追加項目)表面煎都脆脆地，內裡軟腍juicy。🥢鵝肝 (可追加項目)表面煎到超級香脆，內裡口感綿密細緻，味道醇厚濃郁。 🥢虎蝦熱狗 (可追加項目)虎蝦爽彈，配上濃郁鹹香嘅自家祕製醬汁，確實係豪華級嘅熱狗。 🥢龍蝦(半隻 )龍蝦本身已經切開咗半邊，但見到佢仍然有郁動，可想而知有幾新鮮，肉質爽彈鮮甜，配埋個自家祕製醬汁，真係鮮中之鮮。 🥢美國牛肉薄燒 (可追加項目)師傅以純熟利落嘅手藝， 三兩下手勢就將件牛肉薄燒包到靚一靚；質地嫩腍嘅牛肉包裹住雜菌、香蔥及蒜粒，非常惹味。 🥢炒飯、味噌湯及漬物煙肉炒飯，夠哂油香但絕不油膩，飯粒分明乾爽。 🧇甜品 (可追加項目)砂糖多士作甜品，香脆微甜，配烏龍茶都確係唔錯。 食材夠哂鮮味而且師傅嘅調味亦剛剛好，所以附上嘅醬汁(芝麻味噌、岩鹽及海鮮汁)，我哋都覺得唔使點。 可欣賞到維港景，食材新鮮，仲可以無限追加食物，响銅鑼灣可以食到呢個質素，用平民價嚟形容相信都比較含蓄，應該要用大癲價嚟形容。 📍板神鉄板燒日本料理 (信和廣場)告士打道255-257號信和廣場1樓103號舖
