之前參加由U Food x 王子飯店的活動，幸運地被抽中了王子飯店送出了二人十道盛宴菜式的晚餐，今晚就帶媽媽一齊去品嚐美食。 王子飯店旗下一間以京川滬菜為主的餐廳位於尖沙咀1881，地理位置簡直無得彈，樓下景觀優美，餐廳裝飾高檔，環境寧靜舒適，店員殷勤有禮。 食物方面一共有十道菜式，每人一小碟，但份量十足，兩個最後捧腹而回。 天下第一包 其實就是叉燒餐包，望落去好似比較普通，但一咬落去，餐包鬆軟，叉燒及醬汁不多不少，不甜不膩，驚喜之作，怪不得隔離兩枱都點這個包啦。 椒鹽九肚魚 九肚魚已去骨，表面粉漿既薄且脆，九肚魚肉質嫩腍，而且不會太咸。 煙燻素鵝 腐皮包裹著蘿蔔雲耳等素菜，表面沾上了一層蠔汁，簡單健康又好味。 西班牙黑毛豬叉燒 叉燒厚切成大半寸厚，顏色較深色，豬肉味濃郁，而且取自半肥瘦部位，雖然有油膏但咬入口完全唔覺得油膩，反而有豬肉甘香，肉質嫩腍。 杏汁銀肺花膠湯 秋風起轉季時間，喉嚨開始乾涸，飲返碗杏汁豬肺湯滋潤一下，加上花膠膠質豐富，女士至愛。 30頭吉品鮑魚伴鵝掌 鮑魚是用世界三大名鮑之一的日本吉品乾鮑炆煮而成，鮑魚真係有鮑魚的鮮味，非一般鮮鮑或者罐頭鮑可以媲美，吉品鮑炆至軟身但保留到鮮甜味，而且有咬口且彈牙，越咬越有味，鵝掌入口溶化，膠質豐富，鮑魚汁更是重點之一，可以用來撈飯。 頭抽王煎焗大虎蝦 虎蝦以葱蒜等煎熟，體型巨大，差不多有手掌大小，蝦肉新鮮結實，而且蝦腸完全去掉，十分乾淨，肉質爽口彈牙，有淡淡葱蒜香味。 上湯浸時菜 用白菜菜苗再去掉菜頭部位，只留菜芯最嫩的部份，以上湯浸熟，菜苗顏色翠綠，爽脆鮮甜。 意大利黑松露炒飯 黑松露香氣撲鼻，而且有蛋白香味，炒飯飯粒分明，不太油膩，味道不咸不淡，非常爽口。 生磨黑芝麻凍糕 芝麻味道濃郁而且磨得幼滑，中間不會咬到芝麻粒，而且不會太甜。 整體無論食物質素、服務態度、以至環境餐具都屬高質水平，當然價錢都屬中上價消費，但值回票價。
