又一次係果茫茫大海到尋覓最愛，搵左兩日唔知係心情太差定唔好運，都係食白果。係好失落同沮喪既情況下，P.Att 同我講，有架T2 岩岩係佢個Forum 入面放賣，睇落唔錯，問我有無興趣去睇睇！我即刻有返些少希望，梗係二話不說舉手去啦！拿！今次估岩啦！呢架車就係魚旦啦～ 而下落黎呢段就真係唔好同魚旦講！話說我第一眼見到佢，查實我真係面色一沉... 泥黃色... 我想要返我隻橙色大象囉！唔係要泥黃色呀！ 算！照影相send 俾寶寶睇啦... 係我一路影相既時候，親愛既P.Att 就幫我check 車啦！點知P.Att 同我講魚旦既狀態十分之好，直頭係佢近期見過最好既一架... 個內隴咩都無其實就真係岩晒我.... 個內櫳亦包晒皮好新淨.... 隻窗除左d 防水膠要換都唔駛點整 聽完P.Att 甘講，我都有些少心動，價錢方面亦都吸引，270000 泰銖... 返到酒店同寶寶商量，同佢講我唔鐘意個泥黃色，點知佢就話：「個顏色都係太差呀，只係你心入面太想要橙色，先入為主，先覺得係佢唔靚啫！」 其實而家睇返... 橙色.... 唔夠魚旦靚囉! (小氣MODE) 棟高枕頭諗咗一晚，到最後都係決定，與其再不停飛過來曼谷尋尋覓覓，不如搏一鋪買咗佢！跟住就打電話俾寶寶同佢講，然後我突然醒起：「佢咁既顏色，成粒咖喱魚蛋咁，個車主本身唸住改裝架車去賣面，都唔知為係咪唸住賣kao soi (泰北咖哩面)…」 俾你地睇下咩係KAO SOI 啦~ 好好食咖! 寶寶笑住甘答：「咁你咪用佢係泰國賣咖喱魚蛋囉！哈哈哈哈～其實魚蛋都幾可愛吖！我好鐘意食咖噃～」明啦～就係咁，阿仔個日成粒咖喱魚旦咁企係我面前，再加上我呢個熱愛食魚旦嘅女朋友，以及我呢個地道香港仔，由個日開始，佢就有個新名：「魚旦fishball」。 而我們仨既追夢故事就開始啦！ 我與魚旦嘅旅程正式開始啦～ 嘩!! 前傳終於完!!! 下集開始! 終於講到去到香港仔我係曼谷既生活啦! 大家記得繼續留意呀! *********************************************************************************** 記得LIKE 埋我FACEBOOK PAGE, 緊貼魚旦同我呢個香港仔嘅流浪之旅~~ https://www.facebook.com/fishballhongkong
