上一篇講到香港仔坐火車去大城府，個過程同經歷都十分新奇、有趣同好玩！所以第二日，香港仔又一次聽從火車職員既建議，向下一個目標出發！就係人稱馬騮之城既Lop Buri! 甘出發之前，我地又一齊認識下呢個地方呀！根據泰國政府旅遊局既介紹，Lop Buri 同大城一樣，都係一個古城,根據資料，呢個城市已經有超過1200 年既歷史！係7-14世紀既時候已經十分興盛，更加係當時Dvaravati 王朝既主要城市之一，而呢個時候，整個區域都十分受印度文化既影響，大部份既建築都係以高棉大乘佛教為主調！（呢～即係柬埔寨既吳哥建築呀！）而呢種建築風格亦都變成Lop Buri style! 好，聽住甘多歷史先！ 簡單d 講，即係同Ayuttara 有d 唔同，未去到柬埔寨既吳哥睇大佛，就先去睇住呢個先啦！Lop Buri 大約離開曼谷三個幾小時既火車車程！出發既時候，我當然又係唔知頭先所講既背景啦！我一心只係知道呢度有好多馬騮！甘因為香港仔又訓晏左，成十一點幾先出發，所以去到Lop Buri 其實都經已接近3點... （火車既旅程，同之前都差唔多啦，不停有商販賣野食同野飲，所以時間都好快過！） 一落火車就見到一座好大既古蹟— Wat Phra Si Maha That! 呢個寺暫時都未有文件或者資料係幾時建成，而係呢個寺前面既佛塔，就估計大約係1157年，係高棉王朝既時候建成 ，亦係Lop Buri 入面最高既佛塔！ 所以一眼望埋去，個感覺真係好似柬埔寨既吳哥建築！ 點擊圖片放大 而呢個佛塔上面大量傳統泰國U-Thong 風格既佛像同裝飾，就係大城王朝時 King Narau 所加既！ 而散落係唔同位置既佛塔同佛像因為好多都係後期修建，所以就有大城同素可泰既風格啦！ 點擊圖片放大 +2 呢個地方比起大城見到既寺都比較破落，遊人都好少，反而係度休息既當地人就比較多! 但係地方其實真係好大，行上行落兜一個圈都要唔少時間。雖然佢而家生滿雜草，而且同大城一樣，大部份既佛像都已經被破壞，好多都被人割左個頭，塔上既裝飾亦都被破壞到一岩一忽，但只但要你企係呢個遺跡入面，你都可以想像到佢從前既宏偉同繁盛。 講左甘耐睇左甘多相，係唔係覺得俾我水左！又話馬騮之地既！？馬騮條毛都見唔到條！無錯，個刻我都有呢個感覺！仲輕輕係心入面小左個車站職員兩下！香港仔唔會甘易放棄，就去問下個寺既護衛大叔，我問佢：monkey? 佢就指住條馬路既前方，仲話個度有好多monkey ! 原來d monkey 唔係呢度，係住係前面既另一個寺！ 二話不說，我就梗係即刻起程出發去睇馬騮啦！實不相瞞，查實我本人都好鍾意馬騮既，可能本身住大圍間唔時都見到下佢地啦！甘我一路沿住馬路行過去，行到一半都已經見到好多隻馬騮係路邊，有d 仲係d 車頂上面走來走去.... 你見到佢地個種好神態自若既表情，心入面只會浮起兩個字： 陀地！ 好肯定佢地係陀地！ 行到去馬騮廟，我唸我都見左到幾百隻馬騮，咩SIZE大大細細既馬騮都有!! 點擊圖片放大 +2 仲有好多人係度餵野佢地食… 唔知大家有無去過城門水塘睇馬騮呢? 呢度大約係香港既50倍數量啦，而且… 呢度D騮同香港個D都差唔多，唔講真心以為係人扮，因為佢地咩都識開來食，例如一筒筒既薯片，飲紙包飲品啦! 仲有，你地睇下佢既表情: 右:你唔好指意我會俾你食呀！ 左: 哼！我先唔食呀！慳啲啦小氣鬼！ 仲有，呢個仲唔係等車大叔 而周圍就有好多商販賣食物，俾D遊人去餵佢地!講返個馬騮廟，其實佢本身當然唔係為左d馬騮而建啦，其實呢個廟叫Phra Prang Sam Yot，係12-13世紀既時候由King Jayavarman VII興建既，呢個王帝有咩甘勁? 佢咪就係起柬埔寨大吳哥城Angkor Thom 既王帝囉! 所以本身呢個建築物都係好有高棉既風格，佢由三幢塔所組成，本身係印度教hindu既寺廟，三座塔就分別代表左梵(Brahma)，毗濕奴 (Vishnu) 同濕婆 (Shiva)，中間有一條走廊連住。而當去到泰國大城王朝既King Narai 統治既時候，就將佢轉左做佛教既廟，仲放左幾個佛像啦! 其實點解過左甘多個世紀之後，變左馬騮住就真係唔知啦… 我只係知其實當地政府已經加建左好多網係個塔到防止d 馬騮走入去，但我係個lone 到想伸部相機出去影相既時候，就差d俾隻馬騮搶走左部相機... 點擊圖片放大 +2 係呀! 根據資料，成個Lop Buri 有成4000 隻馬騮，而住係呢個寺附近嘅都有成2000隻，我睇d人講d馬騮除左會搶食物呀、手袋呀、眼鏡之外，佢地仲會跳上人地個頭上面… 我今次去唔知係唔係太夜，佢地可能眼訓又食得飽，好多都好乖，無發生侵襲事件… 但之後我再帶女朋友黎睇馬騮既時候，就親眼目擊左有分別幾隻馬騮都跳左上d人既身同頭上面，而其中一個就係我女朋友! 嘩哈哈哈哈哈哈哈哈哈哈哈哈哈哈哈哈哈哈哈哈~~~~ 佢驚到爆炸同塊面黑到爆炸! 嘩哈哈哈哈哈哈哈哈哈哈哈哈哈哈哈哈哈哈哈哈~~~~ 睇完呢個馬騮廟之後，其實都差唔多6點啦，我就搭返火車返曼谷啦，又三個鐘火車，睇下風景吹下風9點幾到就返到曼谷啦!!就係甘，我今次既曼谷車SHOW之旅就係甘完左啦~~ 下一集~香港仔終於再去搵車啦!!! 究竟我幾時先會見到魚旦呢!? ********************************************************************************** 記得LIKE 埋我FACEBOOK PAGE, 緊貼魚旦同我呢個香港仔嘅流浪之旅~~ https://www.facebook.com/fishballhongkong
