上集講到香港仔又買唔成架紅白van, 雖然好唔忿氣，但既然連機票都買左，就再去曼谷碰下運氣啦！ 之前去泰國，因為一個香港女仔而認識左一個泰國女仔阿dew！ 中間果個就係阿Dew 啦~ 因為人窮既關係，我就好厚面皮問下dew邊到有平酒店住啦！點知佢竟然因為甘而介紹左個印度朋友俾我識！話佢而家喺呢邊長住，住緊果度都唔錯，叫我問下佢... 我第一次見印度仔就已經有種一見如故既感覺，唔知係唔咪差唔多年紀(其實我大佢好多吓)，又同在異鄉... 而且佢既故事亦十分有趣，所以我決定要出賣佢既故事（好彩佢唔識睇中文）... 俾住個側面你睇先~下集先有得睇正面! 話說，當年印度仔去曼谷玩，就去左一間時裝店睇衫，睇睇下衫就睇中左個老闆，佢覺即係阿Dew 啦！佢見完阿dew,返左印度仍然對阿dew 念念不忘... 所以佢就開始同佢用email 聯絡啦！聯聯下，就發現自己愛上左佢，決定要去曼谷尋找真愛！（起歌：無懼世事變改～遠是愈難愈愛～ ） 講返阿Dew 先，其實普遍既泰國女仔都幾靚！阿Dew 當然都唔差啦！（題外話：曼谷其實好多外國人係度定居，而且好多都係同泰國人結婚，所以曼谷真係好多好靚既混血妹妹！）雖然印度仔千里迢迢由印度追到去泰國，但係阿Dew 仍然唔接受佢... 因為... 阿Dew 本身有個感情要好既女。朋。友！ 無錯呀！係女朋友！所以印度仔真係向高難度挑戰！阿Dew 女朋友阿JJ我都見過，仲帶埋我去佢屋企係大學附近開既炸雞店食炸雞添！老實講，超好味（仲有好多學生妹妹）！所以我好支持阿Dew 同阿JJ 一齊！起碼我有得食炸雞先啦！ 左面係JJ, 右面係Dew 講完阿Dew 背景，講返印度仔先！佢介紹我去佢住緊既地方！叫Diamond Residence, 一晚酒店價錢700銖 ，鄰近地鐵Sutthisan站，行去地鐵站都不過係5分鐘，但佢過份到有哥爾夫球車接你去地鐵站！ 唔知大家認唔認同，印度人對格價真係好叻！所以我都好信佢既！但酒店入面就正正常常，無五星級酒店個d 設施同裝修，但都係好化算！所以我都選左住係呢度！亦因為我同佢住同一間酒店，所以見面既時間就更多啦！ 言談間，佢都有講佢同阿Dew 既關係（英文唔好既我，大約聽到三成啦...），佢知阿Dew 有女朋友，但因為太愛佢，佢係印度成日都會因為掛住阿Dew 而唔開心，所以佢媽媽唔想佢唔開心，都好支持佢去曼谷追女仔！（又起歌：無懼世事變改，還是愈難愈愛～）好可惜，Dew 對佢雖然有少少意思，但佢仍然都係同阿JJ一齊！ 講甘耐，係唔係都有一個疑問，甘佢係曼谷追女，都要有生活費咖... 係... 無錯！我都有呢個疑問！呢個問題就喺我地一次閒聊嘅時候揾到答案。正常你新相識一個朋友，問你喺香港係做咩工作，都好正常呀! 但係佢就問我，你屋企係做咩行業？(成個行業喎!咁明啦!) 原來佢屋企係印度係做房地產生意，佢媽媽每個月都會匯錢俾佢生活... 頂！佢根本就係印度李澤楷！有個印度李嘉誠做靠山，咪話曼谷呀，阿Dew 去邊都跟到去啦！所以話，浪漫呢樣野，都係有錢先搞得掂... (題外話: 阿Dew 屋企都係要成個行業甘去計...自己睇... ) 我都唔知點形容佢呢個行業... 不過佢係咪印度李澤楷都好，係曼谷呢幾日好彩有佢陪我，我先無甘悶！愛情故事到今日都未完，印度仔仍然為愛留低... 點解今次要講印度仔? 除左因為佢個愛情故事之外，其實係因為下一篇，香港仔將會同印度仔去一個老年甘遠嘅老爺車博物館！過程一貫嘅爆笑，密切留意呀！ *********************************************************************************** 記得LIKE 埋我FACEBOOK PAGE, 緊貼魚旦同我呢個香港仔嘅流浪之旅~~ https://www.facebook.com/fishballhongkong
