因為魚柳包個人比較為食，又本住自己食極唔肥嘅體質，係英國喪食喪飲! 結果都係比英國的平價牛奶、超市叮叮食物、街邊小吃......(下刪一百字)打敗咗!肥咗1個碼! 所以我決定分享下我的"被"增肥旅程 :mrgreen: 而以下嘅美食就係令我暴肥的主因之一: Traditional English All Day Breakfast 相信各位朋友都知All Day Breakfast係英國的代表作， 食佢嘅原因只有一個:貪佢夠多選擇，要乜有乜! 或者都有第二個原因嘅: 影低咁豐盛嘅早餐，放上fb同ig仲呃唔到100個like? 8-) 話說係香港都好容易食到，Flying Pan, Brunch Club,Simply Life都係著名嘅早晨全餐聖地！ 好唔好味就見人見智，不過以我觀察好多餐廳嘅份量比起英國嘅減半不特止， 仲好cute貴! 食嘅應該係一份"自助餐"般的滿足感! 係英國All day breakfast就好似吊靴鬼咁去邊都會見到佢，上至高級食府，下至pub或cafe。張相其實只係Small All Day Breakfast (￡4.5) full breakfast請自行將食材X2 (￡6.5) 然後再外加一兜toast、一兜薯條、一杯飲品。完。 自問係食方面係小霸王嘅魚柳包我都頂唔順，所以識食一定係叫Small! 其實英國嘅All day breakfast普遍都係由￡3至￡10不等，視乎有幾多種食物。 而我就中意去pub食，pub嘅水準都好穩定，價錢中等，絕對係間唔時"豪"一餐嘅首選。 只係唔知點解大部份pub嘅All day breakfast都比較油膩( :twisted: 即係更加肥!!!) 至於另外一個同香港嘅All day breakfast不同之處就係食材。 最明顯就係Black pudding，係HK10間著咗10間都唔會有， 因為呢塊由豬血豬內臟製成的物體真係唔太啱香港人口味 :-P 外面脆脆地內裡粉粉地，又有少少咸。未至於難食，但如果有得揀，我寧願食港式豬紅! 第二樣就係煙肉! 英國嘅煙肉唔係薄薄一片煎到好脆嗰種， 而係厚身點，亦無咁多脂肪，仲只係係咁意煎香下，一點都唔脆! 不過味道都OK同平時食到嘅煙肉無異。 最後就係條腸! 唔好以為個樣咁怪飽滿就好好味， 其實佢口感好粉，唔似德國腸咁有咬口咁juicy。 味道似咩? 請容許我港式化一下，實在諗唔到形容詞－－有點似臘腸! :lol: 而其實係英國食到的腸都係呢一種...... 雖然聽落好似唔係咁好食，既然去得留學，梗係要入鄉隨俗， 再加上我不入地獄誰入地獄嘅精神，又加上扮BBC扮得似啲， 梗係點都要試下正宗All day breakfast啦! (其實又唔係難食，唔慣je! ) 但唔想食哂屋企人d錢，budget有限嘅魚柳包我都係自己煮早餐多 :mrgreen: 如果大家有興趣，我都可以分享下留學呢一年早餐會煮d咩! 另外，嚟緊嘅post會再同大家介紹多啲英國美食，請大家繼續支持! 些些 :oops:
