同朋友喺太子,想坐低慢慢食個Lunch然後再去行街,又想食香辣嘢。砵蘭街都好多食肆,「八一蕃巴蜀烤魚店」係以鮮魚菜式起家,巴蜀烤魚亦係馳名之作,仲有雞煲、串燒、涼拌小食。午市仲有優惠套餐價錢經濟,全日無收加一,喺太子站附近地點方便。 ◉ 泡椒味烤海鱸魚 (原條) $288有鯇魚、魽魚、海鱸魚選擇,唔想咁多骨我哋揀咗原條海鱸魚。湯底有六款辣同兩款唔辣選擇,我哋就想試吓泡椒味。 店主將現烤過嘅海鱸魚用方形盤奉上,放喺Gas爐上,海鱸魚都好大條,鋪滿大堆紅色圓形辣椒乾、青色泡椒,望到都覺得刺激。鍋裡面有豆豉、芫荽、唐芹,大豆芽菜,仲有豆皮同寛粉皮可以吸湯。份量都多,基本上三個人都夠食,可以再叫多少少嘢打邊爐。 泡椒湯底香辣惹味,我哋叫咗小辣,泡椒嘅辣喺口裏面慢慢擴散,但又唔會辣到食唔到。魚皮烤至焦香,魚肉緊實嫩滑,加少少豆豉加一啖魚一齊食,勁鹹香,原來餐廳係用老乾媽豆豉醬,店主仲話豆豉醬會愈煮愈鹹,所以細心提供淡少少嘅魚湯,等客人自行加湯,唔會愈食愈鹹。 ► 火鍋配料◉ 鮮鴨血 $58食辣烤魚鍋點少得鴨血,夠大件,口感順滑有咬口,煲耐啲吸滿辣湯汁。 ◉ 寬粉皮 $28辣湯鍋同寬粉皮係絕配,煮熟之後晶瑩剔透,煙靭彈牙,索湯入晒味。 ► 飲品◉ 山楂楊梅特飲 $59/1壺係自家煲製,無添加,酸酸甜甜,解渴解辣。 ► 午市快餐◉ 土魷蒸肉餅飯 $36烤魚鍋湯汁太惹味,想搵碗白飯送吓,餐廳有幾款午市快餐,我哋叫咗即叫即蒸嘅肉餅。 跟白飯仲有碗鮮魚湯送,奶白色鮮味濃郁,完全係魚嘅精華,喺旺角有呢個價錢嘅午餐好抵食。 #八一蕃巴蜀烤魚店 地址:太子砵蘭街436號地舖