周不時都會喺翠怡花園搵食，今次經過又開咗啲新嘅食肆。大埔津記車仔麵，門口綠色大窗框，鋪紙皮石，望入去見到紅A膠吊燈，就俾佢個裝修吸引咗入去。懷舊香港大排檔設計，貼上霓虹招牌牆紙，摺枱圓櫈，不鏽鋼筷子筒。牆上掛有一塊塊寫咗配料餸菜名嘅白色膠牌，任君選擇。 點餸紙種類多，超過三十幾種，樣樣都吸引，最終我哋二人叫咗兩碗五餸麵，大家可以share啲餸試吓。 千祈唔好錯過擺喺枱面嗰兩隻萬壽無疆茶杯，因為裏面係有辣菜脯同埋蔥，可以按自己喜好加落車仔麵。辣菜脯又真係幾夠香辣，原來係店主自己炒，而且仲將蝦米切碎加入菜脯一齊炒，唔怪得咁香啦。 ◉五餸麻辣醬油麵 $65一上枱碗車仔麵擺得好靚，而且份量十足，襯埋懷舊香港背景好夾，忍唔住打個咭先。 秘製麻辣醬都係店主親自炒，認真夠晒麻夠晒辣，雖然係叫咗中辣，但都覺已經超出平時預期，夠晒刺激，啱晒鍾意食辣嘅朋友。麵底選擇都唔少，仲可以轉油菜底，唔知點解食親車仔麵總愛叫油麵，黃色扁扁粗粗嘅麵底，連埋麻辣湯底一齊大啖𠽌入口，好惹味。 ⦿豬紅滷得非常入味，粒粒正方好滑有咬口，必點之選。⦿麻辣豬腸食車仔麵最鍾意點豬腸，豬腸洗得乾淨，有少少肥膏，偏厚身但炆得腍，肥美有嚼勁，麻辣惹味，份量都多。⦿咖喱魚蛋咖喱味濃，魚蛋入味，爽口彈牙。⦿柱候牛腩牛腩燜得鬆軟入味，唔係一般牛腩碎邊位，係黐住筋膜嘅牛腩位置，啖啖肉。⦿牛栢葉爽脆口感，索晒啲麻辣湯汁最正。 ◉五餸沙嗲醬伊麵 $70都係店主秘製嘅沙嗲醬，甜甜哋好濃郁，成碗鋪滿餸好足料，有芽菜底，伊麵掛湯，再加埋辣菜脯同蔥一齊食。 ⦿豬紅車仔麵必點餸菜，想食多啲，所以重覆再點。⦿滷水翼尖翼尖都大隻，滷得入味，唔會好咸，夠腍但皮肉唔爛，輕輕一啜肉骨分離。⦿南乳豬手兩嚿豬手大大件，南乳味香，燜得入味，豬手皮煙靭有質感，豬手肉夠腍。⦿滷水五花腩滷水非常之入味，每一件都好軟腍，肥瘦均勻。⦿魷魚非常爽口，嚼勁十足。 ◉蘿蔔店主友善又細心，仲請我哋試吓蘿蔔，蘿蔔腍度控制得剛好，唔會煮得過火溶化，湯汁完全滲入蘿蔔，超清甜，多汁無渣，車仔麵百搭之選。 ◉飲品車仔麵餐已包紙包飲品，凍檸茶、凍奶茶另加$14，夠晒大杯，茶膽味濃。通常出面啲車仔麵，唔會每款餸菜都好味。我哋今次叫咗十樣餸，平均每樣水準都中上，樣樣都好入味，而且食完唔會覺得好頸渴想飲水。我覺得店主都對自己出品嘅車仔麵信心十足。 #津記車仔麵地址：大埔翠怡街3號翠怡花園地下13號舖
