秋高氣爽應該係行山一族的天下, 雖然我都有朋友仔中意夏天都去行山, 不過通常行完都會曬到黑哂, 熱到巴蕉扇都溶埋! 當然貪靚係其次啦, 其實想舒服地行山都係留返而家咁涼爽的天氣好DD! 今次想講吓大東山之旅, 其實呢個大東山之旅已經係上年12月時候的事,趁住都仲有秋涼而唔係冬涼就做一做分享, 等大家都有所準備先去! 大東山位於大嶼山, 高度有869m,當日我地都係由東涌MTR到集齊人再出發，再搭往大澳的11號巴士, 其實去梅窩的3M同昂平的23號巴士都會去到! ，全部都可在伯公坳下車再上山! 其實12月去行都真係幾辛苦, 首先,因為12月都已經係幾寒冷的日子, 而且工作長時間屈係辦公室太耐,冇咩做過運動,體能已經大不如前, 行大東山最辛苦係每一步都係石級,而且仲係幾高下,好多時都要跨好大步先上到一級, 小Fi我其實都係一個好細粒的女仔, 老實講,每一級都係"級級皆辛苦"! 一路行, 其實都時冷時熱, 因為行到出汗, 但風又是寒的! 所以我地D褸都係除下又著下!果種矛盾令我諗起王菲果首"曖昧"定的一句歌詞- "徘徊在似苦又甜之間",甜係因為沿途都有好多俯視靚景同埋有好多巨石, 你爬左上去呢d巨石之後,再望落去, 果種感覺真係大地在我腳下! 當然要企上咁多大石上影相都要小心啦, 差錯腳真係唔知點算! 人地話大東山最靚係芒草,老實講, 當初我都係為左芒草景而去的,我諗冬天會冇咁黃,所以而家呢個月份去的確剛剛好!冬天去個景都可以咁靚, 我覺得秋天去應該會更加冇死啦!!!! 當我係呢到影到張靚相,老實講, 幾辛苦都係值得架! 呢個日落真係好難忘!叫SUNSET PEAK 真係冇錯! 如果同愛人係呢到望住日落, 會唔會係一件好浪漫的事呢 (FF中)? 除左分享靚景之外, 其實當中都遇上了小小插曲, 就係當日有個40幾50歲的大叔暈左,到佢有返小小知覺的時候,無啦啦起身想撞向山岸, 好彩有幾個男仕一齊拉住佢, 我諗應該係已經失去左意識, 唔知自己做緊咩! 印象大都要6個男仕先禁得住佢! 引起好多人圍觀同幫手! 其實都一方面報左警, 另一方面飛行服務隊都有趕過黎, 不過等到半路, 大叔都已經有返知覺了!不過我地都靜待咁等佢地黎救人! GFS趕到的時候, 定位都要用一段時間,而且佢地一經過的地方都好大風, 好多草都飛起! 咁o岩就係係我地頭頂附近出現, 哈哈! 絕對殺我地一個措手不及! 雖然頭髮亂了, 同時我地都好興奮! 不過消防員同GFS黎到的時候, 大叔已經不需要人扶了! 仲話自己行返下去! 所以我地都一一離開! 到行返落山的時候, 日落已經完左,所以氣溫又急降, 上山難, 其實落山都唔容易, 事關落山都係照樣好大級, 其實果日我去到半路係有D腳軟, 所以最後要用兩枝行山仗先行到落去, 哈哈, 諗起都想笑, 因為我每行幾步就發一次軟蹄, 除左笑同努力地行, 都唔知可以講咩!哈哈哈! 唔好以為黑MAMA,落山就冇野睇, 咁岩又俾我地見到個月亮出現,仲好光好亮,就算腳軟都唔放過呢個靚景,一定要影返張啦! 後記 : 附送一張日落時同朋友一齊發癲的相, 其實香港的工作壓力真係好大, 但慶幸仍然有一班朋友知己會陪你去癲, 陪你去玩, 去做你想做的事, 都係人生中的小確幸! \\\\ 伸手會拾到往日美麗的歡笑聲 情話是美景 一心醉便忘形 哪有動情是意外 /////
