依家愈來愈多人開始鍾意做運動，而行山都成為左一個風氣。 行山的確係好爽既，唔洗去到外國都有好外國Feel既靚風景任你影，影靚相呃Like是常識吧。 上個星期放假見天氣咁好，二話不說就起行出發。 今次簡呢個地點係因為西貢三尖只係差佢就全部完成，係搞笑既，我地之前選擇挑戰左難度較高既蚺蛇尖先再行睇魚岩頂，先苦後甜，不過蚺蛇尖真係非常值得一去！！！但睇魚岩頂同蚺蛇尖都需要一定體能，如果想挑戰既話，可以先試行左前者睇魚岩頂測試下自己體力先。 一早就出發，8:15am就去到西貢麥當奴先買定個早餐，因為要趕8:30am既29R村巴，同埋買多兩個包等一陣肚餓既時候食。提提大家，記得行山一定要帶備足夠既水同糧食，水既話要睇返當日既天氣溫度及路程長短而定，而且每個人飲水既需求其實都唔一樣，就好似我而言，如果今次既行程加上天氣唔算太熱，我兩個人帶左三支大樽裝既水。大家行多幾次，就大約會知自己大約要帶幾多水；而糧食方面，可以帶麵包，朱古力等輕便又頂肚既食物。 ＊29R村巴個站正正就係係西貢麥當奴門口，祥細資料請到 http://hkbus.wikia.com/wiki/居民巴士NR29線 ＊ 到達起點-西灣亭，好多人都係到準備當中，記得去埋個廁所先好行呀，因為山上係真係無流動廁所架！ 起點會有兩條路線，其實都去到吹筒坳的，不過左邊係上山風景就靚小小，右邊就易行d 行左大約二十分鐘左右就到達吹筒坳，係吹筒坳會見到右手邊有條小路，就會進入麥理浩徑上西灣山，其實只係得一條路所以繼續一直向上走就岩架喇，路線清晰，沿途可以係高處見到萬宜水庫及蚺蛇尖等既風景 途中會經過西灣山觀景台，可以一覽無遺蚺蛇尖及四灣，好想再去行多次蚺蛇尖呢 到達西灣山後，繼續向前行走就會見到涼亭，可以稍作休息補充體力。 因為而家先係整條路線既戲肉。 休息過後繼續沿住岩岩條路行走，落斜一陣會見到左邊有條小路，條小路正正就係個指示牌既對面。然後一直落斜，會到達好開揚平坦既路徑，亦可以見到睇魚岩頂了。然後細心留意會見到有絲帶帶路上山，不久就到達睇魚岩頂。 點擊圖片放大 上到頂望住咁靚既景緊係要食個包醫醫肚先啦 細小的我 係山頂既另一邊落山，呢條路比較上斜d及有碎石，要慢慢小心行。之後其實沿路都會見到絲帶帶路，所以都好難會迷路。 ＜順帶一提，記得著長衫長褲，因為好多時都會係草叢行走，好易會介損手腳＞ 然後不經不覺就到長岩灣 然後沿路向左方行走，到達平原後不久就會見到有兩條路，左手邊直行就係一直上山去長岩頂，右手邊會見到絲帶就係去浪茄仔，如果唔行罾棚角其實可以直接行右手邊落浪茄仔，不過咁辛苦黎到緊係行埋去罾棚角睇飯甑洲啦，所以我地係直走上山，因為都比較斜，可能都需要手足並用。上到長岩頂後，沿山徑下走，一直走一直走，就好似想走去呢個海既盡頭咁，之後就會到達罾棚角。 見到對面島個飯甑洲，最後都無再行落去罾棚角咀，因為遠望到覺得足夠 沿岩岩條路折返，落返平地後行返岩岩講過既右手邊條路線落浪茄仔了。 浪茄仔比浪茄更水清沙幼，而且渺無人煙，夏天帶堆我家兩個大帝黎游水實開心死佢地。 到達浪茄仔之後向住對面一直行，會見到絲帶帶路，過條溪澗後就開始係石崖上爬行，真係要手足並用，行左一段路後回望浪茄仔，真係好似最近幾hit既韓劇入面果個海灣，望見自己係崖邊爬行，覺得有些小危險但感覺很爽。沿絲帶路向上走，然後落斜就會到達浪茄，經過沙灘後接回麥理浩徑，最後行返去萬宜東壩就完成整個行程了。 大約用左五個小時完成今次呢個行程，連同車程，要係黃昏前出返市區，真係需要一日時間，因為星期日萬宜東壩要搭或者Call的士都好難，的士全部都講價，當日等的士都等左成個幾鐘。不過當初都好擔心今日星期日會好多人行呢條路線，但最後眼見只係得大約十個人行左右，輕輕鬆鬆的完成了西貢三尖。
