～今日的行程～ 1月25日：台南市永樂市場 -> 早：阿松割包 -> 早：一品味 -> 早：潘家牛肉湯 -> 台江國家公園 ->高鐵台南站 -> 高鐵台中站 -> 彩虹眷村 -> 高美濕地 -> 下午茶：海堤芋圓冰 -> 下午茶：Mister Donut -> 晚：逢甲夜市今日我哋會由台南出發去台中！ 今日係年初一，我地晨早起身，8:30am就出發搭uber出去食早餐啦。 我哋黎咗台南市嘅永樂市場度搵食，永樂市場係有兩層樓高，我哋主要去地面嘅路邊店食野。第一站黎咗阿松割包。地址： 700台灣臺南市中西區五條港里國華街三段181號 首先會送上一碗湯。 我哋叫咗普通包，姐係用咗肥豬肉黎整嘅割包，TWD$70一個，另外，餐牌仲有瘦肉包同豬舌包揀架。 店家好貼心，呢度有膠袋仔放係度，比你裝住個割包黎食，隻手就唔洗整污糟啦。 第二站黎咗一品味，呢度有碗粿同魚羹兩款食品。地址：台灣臺南市中西區國華街三段177-179號 (永樂市場攤號111及112) 左面係碗粿，TWD$30，右面係魚羹，TWD$30，係用咗虱目魚黎整，要用竹籤去片啲肉出黎食，好搞笑。 最後黎咗潘家牛肉湯。地址： 700台灣臺南市中西區五條港里國華街三段125號 牛肉湯有大同細揀，我哋好似係叫左大嘅牛肉湯，TWD$160。 呢度有酒比你加入去牛肉湯，大家可以先試一啖原味牛肉湯，然後先加少少酒落去試味。 之後我哋搭uber去台江國家公園，咁岩呢架車裝飾咗好多龍貓！ 9:45am到達台江國家公園，係台灣第八座國家公園，亦都係全台唯一一個以濕地生態為主題嘅國家公園，係免費入場架。 呢個台江國家公園其實好大，但我哋主要係黎台江國家公園遊客中心 (亦稱為台江學園)度影相。地址：台南市安南區四草大道118號台江學園係2019年3月30日完工啟用，當時係一個好新嘅台南景點。 呢度保留左原有嘅魚塘，然後就係魚塘上面起高腳屋水上建築，好有度假水上屋water villa嘅感覺。另外，呢度仲會用蠔殼黎做裝飾，好有大自然嘅感覺。 影返張相先。 著返件皮褸再影多張。 係呢堆水上建築之間有一條橋。 影出黎有種度假村嘅感覺。 呢度嘅建築物都係不規則幾何設計。 當時嘅遊客唔多，如果黎台南想影下相同了解台灣嘅自然生態都可以黎台江國家公園。 好鍾意呢個蠔殼嘅牆，原來呢個台江學園係拎咗鑽石級綠建築標章。 之後我哋返酒店拎行李就黎咗高鐵台南站，我哋會搭12:48pm嘅高鐵去高鐵台中站，車程係42分鐘，當時車飛係TWD$650一個人。我哋旅行前係官網度預訂定高鐵車票。 呢度有上一次係高雄有買過野嘅舊振南餅店，我哋今次都買咗少少手信。 係舊振南買咗一盒鳳梨酥同4舊豆沙Q餅。 係高鐵台南站仲見到太陽堂老店，安迪好鍾意食呢間嘅太陽餅，所以梗係買返盒啦。 琴日由高雄站買咗呢個臺鐵便當，今日係台南站就再翻啅呢個臺鐵便當，因為好好食，入面有腌菜、雞扒、滷水蛋、竹輪、豆干，好豐富呀。 到咗高鐵台中站之後，我哋就將行李放去寄物櫃locker先，玩完今晚先返黎拎。 之後我哋就搭uber去彩虹眷村。 雖然呢度都叫做彩虹村，但同香港嘅彩虹邨好唔同架。 呢度原本係即將面臨拆遷的老舊眷村「干城六村」。呢度有位村民 - 退伍老兵黃永阜先生(人稱彩虹爺爺)，佢由2008年開始為咗排解寂寞、保衛呢條村，用畫筆係牆同地面塗鴉。佢用極具童趣、充滿純真幻想的色彩與線條，將成條村改造成色彩繽紛鮮艷嘅藝廊，最後成功保留咗呢條村。 呢個彩虹眷村係免費入場啦。 牆上嘅畫都好可以，好有童真呀。 除咗牆，彩虹爺爺都會係地下度畫畫架。 呢度其實唔係好大，但係都好多打卡嘅壁畫。 我哋行到黎天生一對嘅時候，咁岩有人幫我哋影相 XD 貌美如花吸引咗好多女士影 (包括我XD) 當時彩虹爺爺都係彩虹眷村度坐陣呀！(好可惜彩虹爺爺已經係2024年1月23日安詳離世，享嵩壽101歲) 估唔到當時嘅彩虹爺爺好潮，竟然識得「比心」。彩虹爺爺1924年係廣東台山出世，年輕時參加中華民國嘅十萬青年十萬軍，係抗日戰爭結束後去過香港調景嶺居住，但係因為工作不如意，然後返去海南島參軍，然後撤退到台灣。彩虹爺爺係1979年退伍，當時居住係香港嘅細佬贊助佢30幾萬新台幣，加上佢自己嘅積蓄買左間彩虹眷村嘅屋。 我哋參觀下彩虹爺爺間屋啦。 好似返返去8-90年代咁。 彩虹爺爺後生時嘅樣。 好鍾意呢個情侶壁畫。 呢度有飲品店。 人太多有啲熱，我哋買咗支雪條食。 我哋揀咗支彩色雪條，襯返呢度彩虹眷村。 去完彩虹眷村打卡，下一站我哋就搭uber黎咗高美濕地。 本身打算黎高美濕地睇日落，點知天公不造做美，勁多雲又勁大風，完全睇唔到夕陽。 呢度可以望到遠處嘅臺中港風力發電站，如果好天，應該會好靚。 高美濕地因為泥質同沙質灘地交錯，孕育左好多種鳥類、魚類、蟹類。 呢度有啲白鷺?!覓食緊。 高美濕地附近有啲美食攤擋，開始入黑，天氣開始凍，要食少少野暖胃先。 比呢間炸物吸引左。 買咗啲小食，已經唔記得叫左啲咩啦。 暖完個胃，見到呢間海堤芋圓冰又想試下。地址：台中市清水區美堤街202巷1號 都唔少人幫襯緊。 睇唔到日落唯有食返個芋圓。 去完高美濕地，我哋就返去台中車站嘅locker拎行李。 拎完行李見到Mister Donut，梗係買返個啦。 黃金薯薯，係當時嘅限定口味，係黃金番薯味嘅波堤，面頭加咗烤過嘅黑芝麻。 我去親Mister Donut都鍾意食呢個餅乾可可波堤。 之後就check in呢間FM HOTEL 福爾摩沙聯盟中旅酒店，我哋會住一晚，之後會寫個blog詳細介紹。 夜晚我哋黎咗逢甲夜市，之前《去台灣歎》都有黎過逢甲夜市架。 官芝霖大腸包小腸，我哋上次黎都有食，今次翻啅！ 《快閃高雄閨蜜遊》都有幫襯過天使雞扒，今次帶安迪試下。 好大塊呀啲雞扒。 食完熱氣嘅雞扒，食返啲生果。 買咗袋芭樂，香港叫番石榴，加埋甘草粉酸酸甜甜好正。 好想飲超獨特果汁傳奇嘅木瓜牛奶，可惜今次見唔到，就試下其他檔嘅木瓜奶。 呢間86當然係冇超獨特果汁傳奇咁好飲嘅。 安迪見到臭豆腐就想食，就試下呢間金牌巨無霸香酥臭豆腐。 呢個臭豆腐食完個口仲有陣臭味，不錯！ 最後買多杯古早味紅茶冰，然後就返酒店，聽日會出發去清境。旅遊日期：2020年1月24日 - 2020年1月28日=========================覺得呢篇blog幫到你，記得like Facebook Page: https://www.facebook.com/fatbjai.travel/follow Instagram: fatbjai.travelhttps://www.instagram.com/fatbjai.travel/YouTube: 曳豬到爆炸收到個blog的最新update！=========================《去台灣玩》Day1 (高雄鈴鹿賽道樂園玩卡丁車,台南花園夜市食棺材板?!) Day2 (台南打卡必去台江國家公園,台中彩虹眷村,高美濕地,逢甲夜市)《快閃高雄閨蜜遊》Day1 (文青必去駁二藝術特區,食米芝蓮鴨肉珍,行瑞豐夜市)Day2 (旗津打卡景點,踩電動單車,食海鮮)Day3 (去鈴鹿賽道樂園玩,玩VR game,最美捷運站 - 美麗島)住宿篇 (樂逸旅居LAINN,4人房完美設計唔洗驚爭廁所,早餐有驚喜!)《去台灣歎》Day1 (長榮航空,桃園機場去台中,逢甲夜市)Day2 (宮原眼科,第二市場,太陽餅街,台中去台北,蘋果工房)Day3 (宜蘭,礁溪,溫泉魚,Afternoon Tea)Day4 (永康街,西門町,度小月,府城,天天利)台中住宿篇 (理想與現實,Airbnb中伏)台北住宿篇 (台北車站,凱撒大飯店)戰利品篇
