～今日的行程～ 12月29日：早午餐：Pasteis de Belém -> 熱羅尼莫斯修道院 Mosteiro dos Jerónimos -> 發現者紀念碑 Monument of the Discoveries -> 貝倫塔 Belém Tower -> 下午茶：Manteigaria - Fábrica de Pastéis de Nata -> 里斯本機場 -> 晚：ANA Lounge -> Air Europa 歐洲航空 -> 馬德里機場今日最後一日係里斯本度玩，我哋會去里斯本嘅Belém貝倫區，今晚仲會搭飛機飛去西班牙嘅馬德里。 今朝起身醒一醒睇到日出，下篇blog會詳細介紹我哋係里斯本住嘅酒店。 今日嘅第一站，我哋就黎呢間Pasteis de Belém食葡撻先。呢間葡撻店係1837年開業，已經有百幾年嘅歷史啦。地址：R. de Belém 84 92, 1300-085 Lisboa 間餐廳雖然好大，但都要排一陣隊先可以入座。 差唔多12點，我哋終於有位啦，我哋叫咗呢啲甜品做午餐。由左上開始係安迪嘅Double espresso €1.6，右面係Folhado de carne， €1.65，酥皮餡餅入面包住肉，再右面係Mimos de coco，€1.5，用椰子同蛋黃整嘅布甸，下一行最左係Guardanapos， €1.5，個樣好似餐巾嘅薄薄海綿蛋糕，右面係主角Pastel de Belem，€1.15 x4，黎葡萄牙必食嘅葡撻。再右面係Rissois，€1.5，炸嘅酥皮餡餅，入面包住蝦，最底係我嘅Chocolate cappuccino，€2.7。 係香港同澳門食嘅葡撻都唔洗落調味，而葡萄牙食葡撻都會加玉桂粉同糖架。 外賣counter都好多人排隊買葡撻呀。 第二站我哋就黎咗熱羅尼莫斯修道院 Mosteiro dos Jerónimos，原來葡撻係由呢間修道院嘅修女係18至19世紀發明，當時修女們用大量嘅蛋白黎將衣物上漿，剩底嘅蛋黃唔想浪費，所以就加牛油、糖同麵粉創造出葡撻啦。1820年代修道院關閉之後，葡撻嘅配方就賣咗比我哋岩岩食個間餅店Pastéis de Belém，呢間餅店到而家都仲保留緊修道院整葡撻嘅秘方。 熱羅尼莫斯修道院係1495年建成，1983年被聯合國教科文組織列為世界文化遺產。 建議大家要預早買定飛，呢條售票處嘅隊勁長！可以係呢個網度買入場券。 而呢條隊就係參觀聖瑪利亞教堂Church of Santa Maria。 左面係短啲嘅隊係入去修道院迴廊，右面長好多嘅係入聖瑪麗亞教堂，當時入教堂係唔洗入場券，所以勁多人排隊入去。 係安迪排隊買飛嘅同時，我已經入到去聖瑪麗亞教堂。 我哋去完巴塞隆拿嘅聖家堂，就覺得其他教堂都失色啦。 但我都好鍾意呢個教堂嘅八角柱同拱形天花板。 教堂裝飾都好華麗。 當時係12月29號，有聖詩班係度唱聖詩。 呢啲模型應該係模仿耶穌出世嘅情景。 呢個係葡萄牙航海探險家Vasco da Gama達伽馬嘅石墓，佢係人類歷史上第一位由歐洲遠航到印度嘅人。 安迪買完飛，我哋就可以一齊去入修道院迴廊啦。 好鍾意迴廊上面嘅雕刻。 呢度每一個角落都好岩影相。 修道院迴廊係有兩層架。 我哋之後上上層影相。 咁岩個太陽好近教堂個頂，令成張相嘅構圖都好靚。 大家覺得我影安迪靚啲定安迪影我靚啲？ 之後個太陽去左教堂頂，好似影出黎仲靚呀。 修道院迴廊二樓其實係同教堂嘅部分位置相通。 呢個彩繪玻璃好靚，好細緻。 呢度可以望得返教堂入面。 仲見到耶穌被釘十字架嘅雕像。 呢度睇到教堂嘅另一面。 熱羅尼莫斯修道院大致上參觀完啦。 下一站，我哋就黎到發現者紀念碑 Monument of the Discoveries。 發現者紀念碑係1958年建成，係紀念葡萄牙15至16世紀嘅航海時代。 紀念碑左右加埋，總共雕左33名航海時代嘅航海家、導航員、傳教士等葡萄牙人。 我哋見到呢度好多電動滑板車，就租咗架Lime黎玩下。 係發現者紀念碑前面玩滑板車嘅畫面好靚。 我都幫安迪拍返條先。 呢度望到呢座25 de Abril Bridge 4月25日大橋，條橋係紀念1974年康乃馨革命的日期。 仲見到里斯本大耶穌像 Christ the King (Almada)。 之後我哋就行去貝倫塔 Belém Tower，呢座塔係1519年建成，用黎紀念Vasco da Gama達伽馬成功航海世界一周，同時亦都為貝倫區的港口同熱羅尼莫斯修道院提供防禦。1983年被聯合國教科文組織列為世界文化遺產。 臨去機場之前，我哋就黎左呢間Manteigaria - Fábrica de Pastéis de Nata食埋個葡撻先走！地址：Avenida 24 de Julho, 49, Lisboa, 1200-479 顧客係可以睇住師傅點樣製作葡撻。 即場焗比你睇。 新鮮出爐嘅葡撻。 呢個係我哋喺葡萄牙旅程最後食嘅葡撻。 Manteigaria出面就係好靚嘅賈梅士前地 Praça Luís de Camões。 如果有多啲時間都想係呢度慢慢行下。 我哋影幾張相就出發去機場啦。 去到里斯本機場，因為個陣得安迪有Priority pass，所以佢就去lounge度食下野先。 佢就黎咗呢間ANA Lounge，係鄰近22號閘口。 入面嘅設計好modern。 而且環境好大，好多座位。 呢度有湯同薯片。 有沙律。 仲有啲三文治同生果。 仲有更多嘅三文治。 有葡撻食，但賣相普通。 有支裝水、啤酒。 呢度有果汁、可樂。 安迪第一轉拎嘅野食。 呢碗係雞湯，味道普通。 安迪翻啅左葡撻，睇黎味道都唔錯。 佢仲拎咗支葡萄牙嘅Cerveja Sagres啤酒。 安迪仲拎咗支橙汁。 另一邊廂，冇得入lounge嘅我，就搵下有咩好食，最後比呢間店Pastelaria Versailles吸引咗。 我就買左呢個Rustico Presunto Parma巴馬火腿法包，€10.5。 我哋搭7:40pm Air Europa歐洲航空嘅機去西班牙嘅馬德里，機程係1hr20m。 呢架飛機係Embraer 195，第一次搭Embraer 嘅飛機呀。 呢架始終都係細機，個座位都係有啲細。 雖然座位冇安裝機上娛樂，但都可以起飛後，連接飛機嘅wifi係電話度睇片。下篇繼續馬德里嘅旅程。旅遊日期：2019年12月25日 - 2020年1月1日=========================覺得呢篇blog幫到你，記得like Facebook Page: https://www.facebook.com/fatbjai.travel/follow Instagram: fatbjai.travelhttps://www.instagram.com/fatbjai.travel/YouTube: 曳豬到爆炸收到個blog的最新update！=========================《去西葡歎》Day1 (坐瑞士航空到巴塞隆拿,高第作品精華遊,鬥牛場改建成商場睇靚景,Casa Lolea必飲Sangria)Day2 (巴塞隆拿必遊高第神作 - 聖家堂, 參觀世界最美醫院 - 聖十字聖保羅醫院, 最華麗的加泰隆尼亞音樂宮)住宿篇 (巴塞隆拿睇到聖家堂嘅酒店 - Ayre Hotel Rosellon,超打卡嘅天台)Day3 (巴塞隆拿去葡萄牙里斯本,必食蟹膏人氣海鮮餐廳,搭電車睇日落)Day4 (里斯本近郊Sintra辛特拉一日遊,到佩納宮&雷加萊拉宮打卡,羅卡角世界級日落)Day5 (里斯本Belém區,葡撻發源地Jerónimos修道院,發現者紀念碑,貝倫塔)
