～今日的行程～ 12月27日：巴塞隆拿機場 -> 機場貴賓室：Sala VIP Pau Casals -> 里斯本 Lisbon -> 午：Solidó -> 聖胡斯塔升降梯 Elevador de Santa Justa -> 商業廣場 Praça do Comércio -> 搭28號電車 -> Largo Portas do Sol 睇日落 -> Conserveira de Lisboa買魚罐頭 -> 晚餐：Cervejaria Ramiro我哋暫時離開西班牙，會搭10:15am早機出發去里斯本Lisbon啦。 天都未光哂就出發啦，我會掛住呢間睇到聖家堂嘅酒店房。我手拎住呢張係加泰隆尼亞獨立旗嘅明信片，當時係巴塞隆拿見到好多人嘅屋企都掛呢個旗幟。加泰隆尼亞其實係2017年10月1日舉行過無法律效力的獨立公投，當時投票率有43%，92.01%贊成獨立。2017年10月27日，加泰隆尼亞議會宣布獨立，成立加泰隆尼亞共和國，但3日之後，10月30日，西班牙政府實施憲法第155條接管返加泰隆尼亞政府，所以加泰隆尼亞都仲係屬於西班牙架。 我哋當時call Cabify去機場 (西班牙嘅call車app)。 入咗禁區之後，因為個陣得安迪有Priority pass，佢就獨自去lounge度食嘢啦。 佢今次去呢個lounge係Sala VIP Pau Casals。 入面白色雲石嘅設計都幾奢華。 有多款火腿、沙樂美腸、芝士，當然唔會有伊比利亞火腿！ 呢度嘅汽水都係玻璃樽裝。 呢度有得食加泰隆尼亞蕃茄包。 仲教埋你點整加泰隆尼亞蕃茄包，1. 烤熱塊麵包2. 多士上面加蒜3. 然後加蕃茄4. 最後加鹽同橄欖油 呢度就有啲果汁、奶、乳酪。 呢個雪櫃入面全部都係啤酒，勁多款式。 紅酒有3款。 白酒同Rose有勁多支。 呢度有幾款威末酒Vermouth。 呢度仲有Vodka、Gin、Crema Ruavieja 奶油酒、Whisky。呢個lounge真係岩哂想醉嘅人。 呢個lounge面積好大，安迪只係影咗一部分。 我冇得入lounge，就係機場啲麵包鋪買咗舊Flauta paleta ibérica €7.8估唔到就咁得法包夾住伊比利亞火腿都好食！ 見到Day1我哋去咗個間Casa Lolea餐廳出嘅Sangria，包裝好靚，我哋買咗細支裝嘅紅同白嘅Sangria，€3.95一支。 安迪係lounge拎咗支Damm Lemon啤酒比我。 我哋準備上機啦，今次搭TAP Portugal航空，機票係HKD$747.41，我哋每人加咗一件23KG行李 HK$310.41，稅HKD$437，總共係HKD$1135.02一個人。 TAP Portugal係有兩種座位，紅色就係Comfort，個位大啲，座位會多個頭枕，餐枱大啲，下面放野嘅袋都大啲。 綠色就係Standard，明顯哋個位細啲，少咗個頭枕。 餐枱細啲，下面放野嘅袋係勁細。 張餐枱打開咗係咁大。 我哋就係坐綠色嘅Standard位啦。 巴塞隆拿去葡萄牙里斯本嘅機程係2小時。 2個鐘嘅機程有葡撻食，估唔到未到葡萄牙就食到葡撻啦。 除咗有葡撻，仲有杯水同飲品，我哋叫咗蕃茄汁，空姐再加咗啲黑胡椒粉係面。 我哋本身11:10am就會到里斯本，最後delay到11:41am先至land。里斯本係葡萄牙嘅首都黎架。 我哋會係里斯本stay兩晚，都會住係呢間酒店 - H10 Duque de Loulé，會另外寫篇blog介紹呢間酒店。 我哋買咗呢張Viva viagem一日嘅交通卡搭里斯本嘅地鐵，當時一日卡係€6.9。(呢張Viva viagem卡已經冇再出啦，變成navegante occasional card) 地鐵路軌隔離竟然有藝術品？ 搭完地鐵，我哋就經過光復廣場 Restauradores Square，呢個廣場係紀念1640年葡萄牙經過西班牙60年統治後恢復獨立。廣場中間有個方尖碑Monument to the Restorers，上面有象徵「獨立」同「勝利」嘅雕像。 里斯本係世界上最古老的城市之一，係歐洲第二古老的首都(僅次於雅典)，比其他現代歐洲首都早左幾個世紀開發。 我哋黎咗呢間Solidó食午餐。地址：Calçada do Duque 33 Chiado-Rossio-Bairro Alto, Lisbon 1200-155 Portugal 我哋叫咗杯Mojito，€7，同埋一杯Sangria，€5。 首先order左Bolinho de bacalhau 炸馬介休球，€5。馬介休係由鱈魚用鹽醃製而成架。 第二樣菜就係Chouriço Assado 燒西班牙辣肉腸，€8，店員會係你面前，將西班牙辣肉腸放係船形嘅陶瓷碗上面，燒比你睇。 燒到個面有少少燶。 安迪嘅主菜係Polvo à lagareiro 烤焗八爪魚，€18，係葡萄牙人係平安夜會食嘅菜。 我就叫咗Bife à portuguesa 葡萄牙傳統牛排，€18，葡萄牙人食牛扒會加煎蛋係面，仲會配炸薯仔/炸薯條。 最後餐廳仲送咗一shot酒比我哋，已經唔記得係咩野酒啦。 我哋經過呢間Mundo Fantástico da Sardinha Portuguesa，一間賣葡萄牙罐頭魚嘅店。 佢每個罐頭都有個年份。但本身我哋bookmark咗另一間老字號罐頭魚店，所以呢間我哋就冇買到野啦。 跟住我哋就黎咗搭聖胡斯塔升降梯 Elevador de Santa Justa，佢係1899年建成，用咗新新哥德式嘅設計，同巴黎嘅Eiffel Tower巴黎鐵塔一樣嘅style。因為佢出眾嘅外表，吸引咗好多遊客黎搭。 當時有好多人排隊搭呢個Santa Justa Lift，呢架lift高45米，我哋個陣有Viva viagem交通卡，所以就有得免費搭啦， 搭完架lift有條橋接駁住Largo do Carmo (Carmo Square)，離遠睇都好壯觀。 終於排到我哋搭lift啦。 呢架lift都好大，可以裝到29個人。 搭完lift可以見到里斯本嘅景色。 呢度都好值得排隊搭上黎，見到啲橙色屋企都好靚。 lift上面仲有條樓梯行上去觀景台，但我哋張交通卡只係送搭lift，如果上觀景台就要比€1.5，所以我哋冇上去啦。呢條橋就係接駁住另一棟建築物啦。 我哋行完條橋之後，就行右面樓梯落返黎啦。 呢架hop on hop off City Sightseeing嘅巴士好特別，係開篷車黎架。 仲有呢啲buggy添。 里斯本標誌性嘅交通工具就係電車啦。 之後我哋行到黎商業廣場 Praça do Comércio，呢度本身係Ribeira Palace皇宮黎架，但係1755年呢度發生咗里斯本大地震，然後引發咗海嘯同火災，所以皇宮就被摧毀咗啦。 呢個係葡萄牙國王何塞一世 King José I 嘅騎馬雕像。 呢個係奧古斯塔街凱旋門 Arco da Rua Augusta，係紀念1755年里斯本大地震後的災後重建。 我哋係呢個咁靚嘅凱旋門前面影相自拍啦。 呢度有隻北極熊，吸引咗啲遊客同佢影相，但大家要注意影完相都會問你比錢架。 海邊勁多海鷗。 之後我哋就去咗坐28號線電車，係遊客必坐嘅路線呀，因為呢條路線會穿梭呢啲好窄嘅路，而且會經過熱門嘅遊客區。 我哋成功上咗車，不過架車都塞滿人。 電車嘅速度好快，所以大家都要緊握扶手呀。 我哋係Largo Portas do Sol呢個站落車，因為呢個位可以睇到日落。 個天好靚，完全冇雲。 我哋太遲上黎，個鹹蛋黃已經唔見咗啦，但係個天都仲橙橙地，好靚。 睇完日落，我哋就黎咗Conserveira de Lisboa買魚罐頭，係1930年就開業，接近100年歷史啦。地址：R. dos Bacalhoeiros 34, 1100-071 Lisboa 間店好細架姐，遊客都迫去counter度睇罐頭。 終於比我埋到counter影相，佢地嘅罐頭嘅包裝都好懷舊。 我總共買左3個魚罐頭。 Tricana Tuna Fish Filets with Tomato 蕃茄吞拿魚 €3.54。 Tricana Sardine Filets with Lemon 檸檬沙甸魚 €3.25。 Tricana Cod Fish in Olive Oil with Onions 葡萄牙style馬介休 €4.29。 夜晚我哋就去咗人氣海鮮餐廳 - Cervejaria Ramiro，呢張門口相係我哋食完飯影，已經唔多人啦。地址：Av. Alm. Reis 1 H, 1150-007 Lisboa 呢張相就係我哋等位個陣嘅墟冚情況，拎完籌，就可以係門口呢個等候位置等叫號碼啦，我哋8點半拎位，最後等咗差唔多2個半鐘，成11點先至叫到我哋。呢度等位耐到叫到自己號碼好似中咗獎咁。 我哋叫咗葡萄牙嘅啤酒Sagres。 首先就黎咗牛油麵包 bread with butter。 跟住我哋叫咗半打生蠔 Oysters。 呢碟係蒜蓉蝦 Shrimps on Garlic。 呢餐最正就係呢個蟹 Edible Crab，個蟹膏好正，連蟹肉入面都有蟹膏架。 佢仲有個錘仔俾你開蟹肉。 最後就黎咗虎蝦 Tiger Prawn。 餐廳嘅濕紙巾包裝都好葡萄牙風。 話說我哋去咗Pingo Doce超市買水，當一支1.5L嘅水只係€0.2，姐係兩蚊港紙都唔洗，超級抵！ 今日行街個陣入左呢間Tezenis買絲襪。Tezenis同Calzedonia & Intimissimi都係姊妹意大利公司，但價錢就比Calzedonia & Intimissimi平好多，左面個對只係€3.5，右面個對€4.99。 我仲係手信店買咗呢4個好葡萄牙嘅階磚磁石貼，€4 四個。下一篇blog我哋會去Sintra辛特拉！旅遊日期：2019年12月25日 - 2020年1月1日 =========================覺得呢篇blog幫到你，記得like Facebook Page: https://www.facebook.com/fatbjai.travel/follow Instagram: fatbjai.travelhttps://www.instagram.com/fatbjai.travel/YouTube: 曳豬到爆炸收到個blog的最新update！=========================《去西葡歎 Day1》Day1 (坐瑞士航空到巴塞隆拿,高第作品精華遊,鬥牛場改建成商場睇靚景,Casa Lolea必飲Sangria)Day2 (巴塞隆拿必遊高第神作 - 聖家堂, 參觀世界最美醫院 - 聖十字聖保羅醫院, 最華麗的加泰隆尼亞音樂宮)住宿篇 (巴塞隆拿睇到聖家堂嘅酒店 - Ayre Hotel Rosellon,超打卡嘅天台)Day3 (巴塞隆拿去葡萄牙里斯本,必食蟹膏人氣海鮮餐廳,搭電車睇日落)
