～今日的行程～ 6月29日：香港機場 -> Plaza Premium First -> 河內內排國際機場 -> Hanoi Opera House 河內大劇院 -> 下午茶：Cô Tuyến - Bún Đậu Hàng Cũ (河內菜) -> 還劍湖 -> 聖若瑟主教座堂 (河內) -> 晚餐：Banh Mi 25 Work & Chill (越式法包) -> Hanoi Night Market繼上次《快閃胡志明市》嘅體驗都幾好，有3日假期，我地又快閃旅行啦，今次係快閃越南嘅首都河內Hanoi！去越南(除左去富國島)係要簽證架，詳細落地簽證申請分享(適合BNO)請睇呢個blog，而電子簽證e-Visa申請分享(適合香港特區護照)請睇呢個blog，當時我哋就初嘗越南e-Visa，但我因為填錯一樣嘢，差啲上唔到機！詳細分享請睇呢個blog。 Plaza Premium Lounge相信好多人都有某啲信用卡可以免費入去，而我地今次去嘅Plaza Premium First就唔係一般嘅環亞公廁lounge，呢個lounge要用Plaza Premium Lounge嘅quota + 比HK$250先可以入去，而我地當時就用左1500Arrture積分兌換到入去啦！地址：近1號登機閘口 呢個Plaza Premium First冇乜免費嘅方法入到黎，所以呢個lounge係冇乜人架。 呢個lounge分為自助餐同埋即叫即製嘅A La Carte，首先睇下自助餐嘅部分先，呢度有好多款甜品，好吸引！ 當時有其中呢4款cocktail飲。 沙律吧。 呢度係熟食區。 呢度有周打三文魚湯同埋香港特色嘅青紅蘿蔔豬骨湯，仲可以order魚蛋粉同菜乾鹹豬骨粥配炸饅頭。 仲有pancake可以order。 忍唔住食甜品先，拎左紅桑子蛋糕、椰汁桂花糕同埋Macaron。 lounge入面劃左個area叫做Primo，好似餐廳咁樣，有職員帶位同埋比menu你，然後order即叫即製嘅野食。 Primo的a la carte menu有7款菜式供選擇，仲有個野飲menu，想叫第2碟嘢食嘅話要加HKD$158，另外，航空公司邀請的客人都冇得免費享用Primo的a la carte架。 係等待嘅同時，安迪係自助餐區拎左個穀物乳酪黎食。 終於都上菜啦，啲嘢食嘅賣相都好靚。我叫左Salmon Confit with Mango Salsa，而安迪叫左Stew Beef Cheek with Red Wine Sauce, Vegetables and Garlic Mashed Potato。 我叫左杯白酒，而安迪就叫左紅酒，我地碰個杯先。 我地一陣會搭越南航空Vietnam Airlines去河內，2:30pm嘅機，1:40pm就要boarding啦。機票價錢連稅係HKD$1281一個人 食完即叫即製嘅野食，我地就去返自助餐區度拎甜品食，拎左檸檬撻、芒果芝士蛋糕同埋Tiramisu。 最後仲叫左兩杯cocktail飲！呢個Plaza Premium First真係幾正，食物有質素，人又少，希望將來有機會再黎食過。 食飽飽之後就準備上機啦。 估唔到係香港機場都遇到係地下度行上機。 越南航空雖然唔係廉航，但係呢架機冇個人嘅機上娛樂，得頭頂有個mon，幾行人share睇。 我地呢班機型係A321。 雖然冇機上娛樂，但有飛機餐食，有包、生果、沙律同主菜，我揀左飯。 安迪揀左魚意粉。 竟然係雲層上見到遠處有第二班機飛過，唔知架機係由邊去邊度呢？ 2小時10分鐘嘅機程後，我地到左河內內排機場Noi Bai International Airport啦。 河內機場係越南第二繁忙的機場，僅次胡志明市新山一機場。 我地搭Grab去酒店check in，呢三日兩夜都係住係Hanoi Marvellous Hotel & Spa，遲啲會詳細講下間酒店。 Check in完酒店房之後，我地就出去行下啦，第一站就黎左Hanoi Opera House 河內大劇院，越文：Nhà hát lớn Hà Nội。 呢個大劇院係1911年建成，係法國係殖民越南時期建造嘅三座歌劇院之一，我地之前都去過其中一座胡志明市大劇院。 係門口打個卡先。 呢條係Phố Tràng Tiền錢場街，竟然封左成條街比細路仔玩車，有消防車、坦克車等等，真係好正呀。 我都好想玩呀真係！ 行行下發現唔止一條路封左比細路仔玩車，點解河內嘅小朋友會咁幸福架呢？ 之後我地就黎左條後巷食好local嘅越北菜，呢間餐廳叫Cô Tuyến - Bún Đậu Hàng Cũ ，Google map上面叫Bún Đậu Cô Tuyến Mắm Tôm Hàng Khay。地址：31 Ngõ 29 Hàng Khay, P. Tràng Tiền 餐廳都係用膠枱膠櫈，啲枱櫈都係好矮。 個menu掛左係牆上面，只有越文！ 呢間餐廳係食Bún đậu mắm tôm蝦醬豆腐米粉，係越南北部嘅菜式黎架，個底有一餅餅嘅米粉，上面放左豆腐乾、炸春卷、豬肉、豬耳、炸大腸、河內嘅炸綠米肉餅chả cốm、香葉等等，然後就點碗入面嘅蝦醬同魚露黎食，碗蝦醬非常之鹹，可以落啲青檸汁同糖入去撈，就會冇咁鹹啦。呢個Bún đậu mắm tôm係兩人嘅份量，VND$40,000x2，姐係VND$80,000。 呢間餐廳有4款飲品，分別係柑橘水Nước quất、鹹杏果水Nước mơ、鹹人面果水 Nước sấu、豆漿Sữa đậu，我叫左Nước sấu試下，VND$10,000，Nước sấu係將人面果醃製左佢，然後沖水而成，似似地鹹柑桔水。 Phố Tràng Tiền錢場街呢棟建築物有越南國父胡志明嘅畫像，下面寫住"Xây dựng lại đất nước ta đàng hoàng hơn"，意思係"令我地嘅國家更有尊嚴"。 行到黎河內嘅地標 - 還劍湖 Hồ Hoàn Kiếm，流傳越南嘅皇帝黎利曾經係呢個湖度獲得一把古劍，之後佢將古劍歸還比湖中嘅神龜，呢個湖自此就叫做還劍湖。 湖中間呢座係龜塔，係1886年建成，糅合左哥德式同越式古建築元素，當年係用黎比皇帝上去釣魚。 行行下黎到呢座聖若瑟主教座堂 (河內) St. Joseph's Cathedral, Hanoi，又叫做河內大教堂，係1886年建成，個樣有啲似迷你版嘅科隆大教堂。 差唔多夠鐘又食嘢啦，我地黎左河內評分好高嘅越式法包店 - Banh Mi 25，試吓有冇胡志明市嘅咁好食。地址：25 Hang Ca Street, Hoan Kiem District 呢間越式法包店有勁多唔同配搭嘅法包，同我地係胡志明市個間Bánh Mì Huynh Hoa只有一款好唔同。 原來隔離街就有Banh Mi 25嘅堂食嘅樓上鋪，我地就揀左歎住冷氣堂食啦。地址：06 Lo Ren Old Quarter 呢間叫做Banh Mi 25 Work & Chill，所以個感覺會chill d，Cafe嘅style。 呢度嘅人冇外賣店咁多。 河內實左係太熱啦，安迪要瘋狂吹廢青扇。 法包終於黎到啦，我叫左Banh mi PÂTE，係肉醬法包，VND$20,000，安迪叫左Mixed: Pâté, Barbecued pork, Jambon & Sausage，係肉醬叉燒火腿腸法包，VND$30,000，老實講呢間嘅法包真係令我地好失望！同胡志明市嘅Bánh Mì Huynh Hoa冇得比，入面啲肉好少，食完好空虛。我叫左杯Bạc xỉu，中文係"白少"，有啲人會譯做"白小"，原來Bạc xỉu係源自胡志明市，全寫係bạc tẩy xíu phé，讀出黎同廣東話"白底少啡"嘅發音一樣，50年代啲時候由居越南嘅廣東人發明，杯底放煉奶，面頭加少少咖啡，形成白底少啡嘅樣，咁樣令杯咖啡變甜好易入口，女士同細路都可以品嘗到咁香嘅咖啡。安迪就叫左Ca cao cốt dừa，係朱古力加椰奶。 之後我地黎左Hanoi Night Market行街，佢又叫做Hanoi Old Quarter Night Market，好多檔口賣野。地址：Hàng Đào, Hoàn Kiếm, Hanoi 除左賣野之外，都有小食賣。 行超市嘅時候見到呢盒Han Coffee，VND$39,000，有個越南妹嘅畫係包裝度，覺得好靚呀，所以就買黎試下，入面有5包三合一即溶咖啡，Han Coffee係河內嘅牌子黎架。我覺得呢隻咖啡個味同越南最common嘅G7咖啡好似，不過佢嘅咖啡味再濃啲，仲有特別嘅奶味。我地聽日會join tour去下龍灣！旅遊日期：2019年6月29日- 2019年7月1日=========================覺得呢篇blog幫到你，記得like Facebook Page: https://www.facebook.com/fatbjai.travel/follow Instagram: fatbjai.travelhttps://www.instagram.com/fatbjai.travel/YouTube: 曳豬到爆炸收到個blog的最新update！=========================《快閃河內》Day1 (有種越南咖啡竟然由廣東人發明?!走入後巷食地道河內菜!)Day2 (有2000座小島嘅下龍灣,宏偉嘅鐘乳石洞,河內必食奧巴馬粉?蛋咖啡!)《快閃胡志明市》Day1 (越南人推薦嘅地道越南美食,Bui Vien Walking Street西貢酒吧街)Day2 (頭頓市即日來回,越南都有個耶穌像?胡志明市最出名法包、最高分越南菜推介!) Day3 (打卡勝地-粉紅教堂,胡志明市最高分的Pho - 錦麗總店)住宿篇 (Athena Hotel，套房都只係幾百蚊)其他文章：越南 網上簽證e-Visa申請分享 (內附注意事項)越南 落地簽證申請分享 (適合BNO,內附到達機場領證過程)
