～今日的行程～ 5月18日：早：Deli Eat & Go -> Cologne Cathedral 科隆大教堂 -> 上科隆大教堂塔頂 -> 午：Früh am Dom -> Farina Fragrance Museum -> 4711 -> Hohenzollern Bridge 霍亨索倫橋 -> KölnTriangle -> 下午茶：Gelateria 4D -> Schildergasse 希爾德巷 -> 晚：Kamps Bäckerei -> 布魯塞爾 -> 宵夜：Los Churros & Waffle今日我地會快閃去德國嘅科隆Cologne (德文: Köln)！本身我地今日嘅行程係去比利時布魯日Bruges & Ghent 根特，但係黎到歐洲就想順便見下喺歐洲嘅朋友，我嘅好朋友就係德國圖賓根Tübingen讀書，於是，就搵左我地嘅中間點 - 科隆Cologne一齊去玩啦！ 我地今日勁早起身，係酒店隔離個火車站Brussels Central Station搭7:45am嘅火車，搭一個站到Brussels-South railway station (法文:Bruxelles-Midi)，然後搭7:54am嘅火車去科隆。 黎到Brussels Central Station有少少時間剩，我地係呢間Deli Eat & Go度買個早餐先。 我地今次搭呢架火車係Thalys，Thalys係法國、比利時、德國、荷蘭呢四個國家營運。我地買左Standard (BU)嘅車飛，Thalys係有Youth fare，26歲以下就可以買優惠飛，我係買Youth價錢，安迪係買Adult價錢！而回程我地係搭ICE，全名係Intercity Express，ICE係德國嘅火車，主要連接德國唔同嘅城市，仲會有火車去布魯塞爾、阿姆斯特丹、維也納、 蘇黎世添。ICE就冇Youth fare啦。來回火車Brussels Central Station -> Brussels-South railway station -> Cologne Central Station，兩個人加埋係€121.80。 座位上面有個掛鉤，冬天拎黎掛衫都好方便。 我地上到車就食早餐啦，一個包＋咖啡嘅價錢係€3。 9:48am到達科隆Cologne Central Station (德文: Köln Hauptbahnhof)。 係火車站嘅大堂就見到科隆大教堂Cologne Cathedral！ 我地係火車站間Douglas行下先等朋友，就買左兩樣野！幫朋友買左上面個個Zoeva的Caramel Melange Eyeshadow Palette，€21.99，右下個個好靚嘅雲石紋Beautyblender，€19.99，仲送左支Carolina Herrera Good Girl香水sample。之後我整左張Douglas會員卡減左€5，再之後係機場退稅退到€3。 個眼影盤入面啲色係咁嘅。 科隆大教堂係科隆最具代表性嘅地標，佢係1248年開始興建，1880年先至建成，足足用左600年時間黎起呀。 科隆大教堂係哥德式教堂，1996年被UNESCO聯合國教科文組織立入為世界遺產，佢157米高，係世界上最高嘅雙子塔教堂，世界上第三高嘅教堂。 終於見到我嘅好朋友Kathy，我地首先係呢座宏偉嘅教堂前面打卡啦。 有朋友係度可以幫我同安迪影合照啦！ 好大個泡泡呀。 教堂入面嘅設計都好莊嚴，樓底高13米，有超過5500個座位。 科隆大教堂嘅彩繪玻璃都好靚呀。 呢座東方三賢士嘅藝術品雕刻得好精緻，佢地就係送左黃金、乳香同沒藥俾耶穌做出世賀禮嗰三位王啦，玻璃箱入面就係三王聖龕 Shrine of the Three Kings，放左佢地嘅遺骨。 Saint Christopher嘅雕像，重現緊Christopher幫上左小朋友身嘅耶穌過河嘅情景。 有更多嘅彩繪玻璃。 呢度有0歐元紙幣買，上面印住科隆大教堂，呢張0蚊嘅紀念紗係要比€2買架。 跟住我地就決定上科隆大教堂嘅塔上面！上塔頂要€6，全程都係行樓梯，由於頭個段好窄而且上樓梯好攰，我落樓梯先至有力氣影。 第二段就係鐵梯，舒服好多。 上到塔頂嘅景色，可以俯瞰到科隆嘅建築物，頭先一切嘅辛苦都係值得嘅！ 再望上去嘅塔尖。 一直望到嘅呢條河係萊茵河Rhine，條河係源自瑞士阿爾卑斯山區，然後流經列支敦斯登、奧地利、德國、法國同荷蘭。 竟然有人係科隆大教堂嘅塔頂簽名。。。真係好冇公德心嘅行為。。。 上到黎塔頂可以仔細睇到教堂嘅雕刻。 係科隆大教堂望去萊茵河真係好靚呀。 除咗Kathy之外，佢有位係德國另一個城市讀書嘅朋友都相約黎科隆一齊見面。 我地落返去嘅時候會經過呢個大鐘，佢叫做Petersglocke，英文意思係Saint Peter's bell。 落樓梯終於有力氣拍下片啦，條樓梯真係好窄。 當有人同時上落樓梯嘅時候係好迫架。 原來上塔頂要行成533層樓梯，來回姐係行左1066層樓梯啦。 上完塔頂再係教堂嘅外圍影下相先。 科隆大教堂係德國最多遊客參觀嘅景點，一日平均有2萬個遊客參觀。 行完成千級樓梯之後，我地就黎左呢間Früh am Dom。地址：Am Hof 12-18, 50667 Cologne, North Rhine-Westphalia Germany Früh係1904年已經成立，有超過一百年嘅歷史，一坐低就緊係要叫返杯佢地出嘅啤酒。 當時冇影到menu，已經唔記得叫左咩野啦，德國菜通常都係一種肉類再配薯仔。 呢碟係meatball，真係好大粒嘅肉丸。 德國菜緊係唔少得德國酸菜Sauerkraut啦，配豬手同腸食，好開胃。 當然唔少得德國腸啦，配左薯仔。 德國豬手係呢度必食嘅菜式呀，配左腸、薯蓉、仲有塊午餐肉嘅物體。 我地影返張合照留念啦。 科隆個英文係Cologne，就係古龍水嘅英文，因為科隆就係香水嘅發源地！香水係由意大利人Johann Maria Farina係1709年科隆發明嘅，仲用左佢身處嘅科隆Cologne黎命名隻香水，香水就係呢度Farina House生產架啦(全名係Johann Maria Farina gegenüber dem Jülichs-Platz)，成為左全世界最古老嘅香水工廠。 呢間Farina House亦都係一間Farina Fragrance Museum香水博物館，我地就打算入去了解香水嘅歷史！ 地下個層係商店，賣Johann Maria Farina當年所發明嘅香水，由6ml至500ml咁大支都有得賣。 我地就上樓上坐低準備參觀呢個香水工廠啦，入場費係€5。 參觀呢個香水博物館最正就係送左支4ml嘅香水sample，Johann Maria Farina形容呢隻味會令你諗起春天雨後嘅朝早，會聞到橙味、檸檬、西柚、鮮花味，的確係一種好甜好清新嘅香味，陣味又好濃烈。 隻味對我黎講太濃，所以我都冇買到。 見到有架叫做Hochzeit Express嘅火車仔，原來係for婚禮嘅火車仔黎架。 之後我地就去埋另一間叫自己做Original Eau de Cologne原味古龍水嘅4711行下。 呢間4711係1799年開始生產香水，比Farina House遲左90年呀。 門口有個用緊4711香水沖涼嘅精靈銅像。 4711嘅鋪頭係比Farina House華麗好多架！ 天花板掛滿4711嘅香水罐。 連個洗手盤都靚過人。 安迪係上層幫我地影相lol 包裝真係好重要，因為4711華麗啲嘅包裝，我就買左支4711 Original Eau de Cologne Hip Flask，係酒壺形嘅容器裝住，好懷舊感覺，25ml，€6，成份有檸檬、橙、薰衣草、迷迭香，呢隻香水個香味同Farina好唔同，Original Eau de Cologne冇咁濃，但有種俗氣嘅感覺。仲買左盒4711 Acqua Colonia迷你香水套裝，€19.5，有Lemon & Ginger 檸檬薑、Lime & Nutmeg青檸肉豆蔻、Blood Orange & Basil血橙羅勒葉、White Peach & Coriander白桃芫荽、Saffron & Iris藏紅花鳶尾花，我覺得呢5款香水都香過Original Eau de Cologne！之後係機場退稅總共退到€2。 行完街買完香水，我地就行去Hohenzollern Bridge 霍亨索倫橋啦。 離遠同座橋影張相先。 行行下有啲熱，我地就買雪糕食啦。 見到有Kinder味嘅雪糕就吸引左，左面個甜筒€1.50，右面條雪條€1.70，食落去甜到漏，我都係食返Kinder繽紛樂算啦。 見到呢座大聖瑪爾定教堂Great St. Martin Church, Cologne，個塔頂好靚，佢係960年興建，估唔到咁耐歷史。 終於行到黎霍亨索倫橋，佢係1911年建成，條橋除左比人行之外，鐵路都會係呢座橋上面行駛。 幫安迪影返張相先。 橋上面有好多鎖，原來由2008年夏天開始就有人係橋上面掛鎖啦，呢度嘅鎖甚至多過法國巴黎嘅愛情鎖橋呀。 係霍亨索倫橋上面望返科隆大教堂。 咁岩捕捉到列車經過嘅一刻。 行完條橋啦，下次有機會要試吓搭呢度嘅鐵路經過呢條橋！ 呢度有德意志帝國第一任皇帝 - Wilhelm I 嘅騎馬雕像。 之後我地就黎呢棟KölnTriangle的天台。 因為KölnTriangle的天台係一個觀景台黎架，當時上觀景台嘅價錢係€3。 呢度可以望到成個科隆嘅景色，如果大家唔想行咁多樓梯上科隆大教堂塔頂，可以選擇上黎KölnTriangle。 玻璃上面仲寫埋可以見到嘅著名地標。 呢度見到大聖瑪爾定教堂。 KölnTriangle可以360度睇到科隆嘅景色，科隆嘅樓都唔高。 臨走打返張卡先。 估唔到今日會咁猛太陽，我地又要食雪糕降下溫，黎左呢間Gelateria 4D食個甜品先。地址：Hohe Straße, Am Hof 164-168, 50667 Köln, Germany 左面個杯係Sommer Cup，夏日杯，€8.50，右面個杯係Melone Becher，哈密瓜杯，€8.50。 Kathy個杯甜品仲有埋支Prosecco氣泡酒。 之後我地就黎左Schildergasse希爾德巷行街，佢係一條好長嘅購物街，而且係歐洲最繁忙嘅購物街。 去左Rossmann超級市場買野，買左支Volvic的1.5L水，€0.99，安迪嘅Bruno Banani 的Magic Man deodorant spray，€2.49，安迪嘅Butcher's Son的Deodorant for Men，€2.45，兩盒Griesson的Soft Cake Orange，€0.79，Edle Tropfen in Nuss的Vodka Lounge朱古力，€1.99，Jahnke的Salmiak-salt Licorice，€1.49，係鹹甘草糖。 呢棟Neumarkt Galerie商場上面有個好大嘅雪糕。 我地差唔多離開科隆啦，要行去火車站，所以又返黎科隆大教堂，見到門口有人係地下度畫畫，畫得好靚呀。 再係科隆大教堂門口影多張合照就say bye bye啦。預告：我地下次再見會係台灣高雄！ 前面呢個就係Cologne Central Station (德文: Köln Hauptbahnhof)啦 ，大家記得早啲去車站，我地夠鐘去到月台，架火車竟然唔係去布魯塞爾，個心勁亂，明明夠鐘但架火車唔知去左邊，原來架火車轉左月台，而且仲未到，真係嚇死寶寶啦。 我地係火車站買左Kamps Bäckerei嘅包做晚餐。 已經唔記得我地買左啲咩包啦。我地搭7:43pm嘅火車，會係9:40pm到布魯塞爾，所以就要係火車上面食我地嘅晚餐。 終於返到黎布魯塞爾啦，夜晚嘅Grand-Place 布魯塞爾大廣場仲靚過日頭！ 我地就黎左呢間Los Churros & Waffle買窩夫做宵夜。 我地拎返酒店度食，€6.1，黎比利時一定要食窩夫呀，個窩夫同cream都正過香港好多！ 黎左呢間Belgian Beer Tradition啤酒鋪買支啤酒送窩夫食。(可惜已結業) 買左比利時牌子Boon嘅Framboise Boon，呢支係紅桑子味嘅Lambic啤酒，Lambic發源自13世紀布魯塞爾嘅Lembeek小鎮，係用野生酵母同細菌發酵製成，佢比一般嘅啤酒酸，大家黎布魯塞爾都要試下呢度獨有嘅Lambic啤呀。旅遊日期：2019年5月11日- 2019年5月20日=========================覺得呢篇blog幫到你，記得like Facebook Page: https://www.facebook.com/fatbjai.travel/follow Instagram: fatbjai.travelhttps://www.instagram.com/fatbjai.travel/YouTube: 曳豬到爆炸收到個blog的最新update！=========================《西歐四國遊》出發篇 (英航商務艙初體驗,一次過去哂4間國泰貴賓室)Day1 (倫敦歎Fortnum & Mason下午茶,食米芝蓮推薦威靈頓牛扒)Day2 (去倫敦Borough Market掃街,世界上最出名嘅地址?到達荷蘭阿姆斯特丹)倫敦住宿篇 (交通勁方便嘅時尚酒店 - Pullman London St Pancras)Day3 (荷蘭阿姆斯特丹,童話般嘅羊角村,走入紅燈區,去咖啡店食大麻?)Day4 (荷蘭阿姆斯特丹近郊勁靚Zaanse Schans風車村,初試Space Cake大麻蛋糕)Day5 (教大家點食荷蘭國民美食Herring,又飲又玩嘅喜力博物館,食迷幻松露注意事項!)Day6 (捉住荷蘭嘅鬱金香尾巴,去比利時睇尿尿小童,必食青口)阿姆斯特丹住宿篇 (地點優越,時裝主題酒店Hotel The Exchange)Day7 (布魯塞爾即日來回德國科隆,同閨蜜遊香水發源地,行左一千層樓梯！)Day8 (比利時原來有兩種窩夫?布魯塞爾機場,國泰商務艙)
