～今日的行程～ 5月15日：早：Stubbe's Haring -> 早：Smullers -> Zaanse Schans 贊瑟斯漢斯風車村 -> 午：McDonald's -> Sexmuseum Amsterdam Venustempel 荷蘭性愛博物館 -> de Bijenkorf Amsterdam 女王百貨 -> 晚：The Tara Amsterdam -> The Bulldog The First Coffeeshop我地今日出發去阿姆斯特丹近郊嘅Zaandam贊丹度睇風車！ 我地行去阿姆斯特丹中央車站Amsterdam Centraal Station的時候見到呢檔小食檔 - Stubbe's Haring，於是就買啲早餐黎食！地址：Singel, on the Haarlemmersluis bridge, 1013 GA Amsterdam The Netherlands 呢檔小食檔吸引我嘅地方就係荷蘭嘅傳統美食 - Herring 鯡魚！荷蘭嘅鯡魚係生食架。 雖然呢度有包夾住唔同嘅魚生，但係我都係揀齋食Herring，€3.5！ 職員會將Herring切成幾件，再係上面加上洋蔥同埋酸瓜，仲插左支荷蘭國旗添。其實Herring最標準嘅食法係原條Herring咁食，拎住條魚尾，然後臉朝天，跟住就掉條魚落口！由於呢條Herring已經切左件，我地唯有聽日再試吓標準嘅食法啦。 我地就拎Herring上火車先食，真係好好味，同我地食開嘅日本魚生一樣咁滑。 火車站都好多鋪頭比人行。 琴日我地係火車站買左Dunkin' Donuts嘅冬甩同De Broodzaak嘅荷蘭杏仁撻，今日就試下呢間Smullers。 係阿姆斯特丹成日都見到呢啲熱食嘅櫃桶仔，於是我地就打算試下啦。 用Mastercard contactless 感應式付款之後 (姐係拍信用卡係黑色個度比錢)，另外冇Mastercard，都可以入銀仔，但就唔會找錢架，比左錢後就撳綠色掣，就可以打開格櫃桶仔拎野食出黎啦。安迪揀左Satékroket，€1.9，係沙嗲味嘅可樂餅，Kroket係可樂餅咁解，係荷蘭最受歡迎嘅小食之一。荷蘭嘅可樂餅有好多種形狀，而放係呢啲小食機嘅通常都係長條形。 我地搭火車到Zaandijk Zaanse Schans站黎到Zaandam贊丹呢個小城鎮，落車後行大約15分鐘先黎到Zaanse Schans贊瑟斯漢斯風車村。見到風車就知道我地就快行到啦。 去風車村之前要經過呢座Julianabrug Zaandijk橋，當時有船經過，所以條橋就升起左，令我諗起倫敦塔橋Tower Bridge。 近睇座橋升左上黎嘅個部分好高，好似兩座高樓大廈咁。 未行得住就影下周圍嘅景色啦。 好多座風車呀！而河邊嘅屋都好靚呀。 比個180度比大家睇下啦(可惜個鏡頭污糟左)。 終於黎到風車村，呢度都好有童話故事個種感覺。 呢度有啲餐廳，仲可以租單車係呢度踩。另外，前面仲有位職員騎馬！ 呢度好多位都好岩打卡，人又唔會好多。 我地就入去第一間風車Specerijenmagazijn Indie's Welvaren睇下，呢間係免費入場，入面係一間芥末製造所同埋店舖黎架。 店入面有唔同種類嘅香料同芥末賣，收入會用黎維修呢間風車。 呢啲機器係製造緊芥末。 係風車村望返頭先係橋上見到嘅屋，住係呢度嘅風景真係好靚，唔知將來有冇機會係度住返晚呢？ 我地嘅目標係行到最盡頭個座風車。係17世紀的時候，有超過600座風車興建係Zaanse Schans附近，啲風車主要係用黎磨香料、生產油漆、鋸木同製造油。 可以見到對面岸的Zaandijkerkerk教堂。 今日嘅天氣都好好，個天冇雲架。 緊係要係風車前面打個卡啦。 其實好多風車都要比錢入去參觀，我地都剩係參觀左免費嘅風車炸。 呢個風車隔離插左支荷蘭國旗，唔好同法國國旗撈亂呀，佢地都係紅白藍三隻色，但係荷蘭國旗係打橫嘅間條，而法國國旗就係打直嘅間條。 原來荷蘭係18世紀全盛時期有成18000座風車咁多，荷蘭處於風帶，好適合用風車黎生產，而且風車可以汲出低洼地區多餘嘅水量。 坐係河邊同啲風車影返張先。 睇完風車，我地就行下呢度啲鋪頭啦。呢度有Brownie啤酒同可可豆啤酒賣。 呢間Catharina Hoeve係17世紀就開嘅芝士農場，入面有牛奶、羊同山羊奶造嘅芝士賣。 呢間Catharina Hoeve入面仲有好多荷蘭芝士連鎖店Henri Willig嘅產品賣添。 我就買左包黑梅&紅桑子糖，€2.25，一見到就好想食，所以就買啦。 Cheese Waffles Garden Herbs / Garlic，€3.5，荷蘭人飲熱茶或者熱咖啡會放塊荷蘭鬆餅係杯上面，令鬆餅入面嘅糖漿融化，再配茶或者咖啡食！我地買左呢盒芝士荷蘭鬆餅試下。Dutch Mini Syrup Waffles，€2.95，再買左包迷你嘅傳統荷蘭焦糖煎餅，咁細舊最岩放係espresso杯上面。Cheese Spread Truffle，€3.95，買左盒查麵包嘅芝士松露醬。Goat Cheese Truffle，€12.95，仲買左塊羊奶松露芝士。 之後我地就黎左呢間Kooijman Souvenirs & Clogs Wooden Shoe Workshop。 係著住荷蘭傳統服裝嘅Miffy呀，Miffy係荷蘭插畫家Dick Bruna係1955年創作嘅卡通人物黎架。 入面好多木屐 Klompen！因為荷蘭位於低洼嘅地區，周圍都係河流，所以荷蘭嘅農夫都會著木屐保護隻腳，同埋方便係泥地度行走。 呢度好多唔同款式嘅木屐，真係花多眼亂呀。 呢度仲有個講解整木屐嘅workshop啦。 原來製作木屐會彈咁多木屑出黎。 呢度竟然有郵票賣，€3.95，仲要係Zaanse Schans風車村做主題，緊係買啦！ 最後黎左呢間Bakery Museum de Gecroonde Duyvekater，入面係一間cafe咁。 除左cafe之外，呢度仲有個Bakery Museum，荷蘭真係咩都鍾意叫自己做museum呀。呢間店早於1658年就興建成架啦。 今日影個日景比大家睇啦。 買左支1.5L嘅礦泉水，€0.65，由於支水係膠樽，所以另外要比€0.25按金，飲完支膠樽可以拎去超市/火車/餐廳啲自助機度退返€0.25，部機會出張收據比你，然後張收據可以直接係超市當錢用或者係收銀度拎返錢。琴日安迪係火車站買左舊Gevulde Koeken荷蘭嘅杏仁撻黎做早餐，覺得好好食，於是就係超市買包裝嘅杏仁撻黎試下啦，€1.74。見到呢包Bolletje嘅Pepsels Pinda，€1.74，覺得好特別，似係將Pretzel整成一條條，然後係入面整左花生醬餡。買左盒Pickwick嘅Dutch Tea，見佢叫荷蘭茶就買黎試下，有20個茶包，€1.19，仲加左個膠袋，要€0.25。 又搭返黎阿姆斯特丹中央車站Amsterdam Centraal Station啦。 我地就黎左火車站隔離嘅I amsterdam Visitor Centre。 我地預先係Klook嘅阿姆斯特丹交通票（1 - 7日）買左2日嘅交通卡，可以無限次搭乘阿姆斯特丹嘅GVB電車、巴士、地鐵，價錢係HK$119一個人，扣除我地嘅積分同優惠卷之後，最後只係HK$96.65一個人，所以我地就要黎呢度領取張交通卡啦。 想食嘢又唔係好肚餓，又諗唔到食咩嘢，見到M記就入去啦，順便睇下荷蘭M記有咩食啦。安迪叫左McKroket，€2.85，係荷蘭獨有嘅包，入面夾左文章開頭介紹過嘅Kroket可樂餅，仲有芥末醬係入面。我就叫左Chicken Tenders炸雞柳，€4.15，本人幾鍾意食炸雞柳，荷蘭嘅M記竟然有得食！仲配左Chili Mayo醬。另外叫左杯McFlurry Fudge & Brownie，€3.10，又係香港冇嘅口味呀！安迪仲叫左杯Iced Fruit Smoothie Aardbei & Banaan，€3.10，係士多啤梨同香蕉味奶昔。 之後我地就去左Sexmuseum Amsterdam Venustempel 荷蘭性愛博物館參觀，當時嘅入場費係€5。地址：Damrak 18, 1012 LH Amsterdam The Netherlands Sexmuseum Amsterdam Venustempel係世界上第一間嘅性愛博物館，入面好多相、畫、裝置等等，從古至今嘅性同愛都有，博物館入面嘅相就唔方便post出黎啦！ 係Holland & Barrett買左呢盒Jacob Hooy嘅Anti Wallencrème，€7.99，屋企人叫我幫手買嘅眼霜，可以對付眼袋同黑眼圈，佢$100港紙都唔洗，就有150ml咁大罌嘅眼霜，開頭仲以為係面霜黎添呀。 行行下見到有人騎馬！ 原來騎緊馬嘅係警察，荷蘭係有騎警係街上巡邏架，又幾型喎。 黎歐洲就緊係要買名牌啦，我地黎左呢間de Bijenkorf Amsterdam 女王百貨公司行下啦。 其實行之前都冇諗想買咩袋，我地入左去Saint Laurent睇袋，個華人售貨員嘅服務好好，細心介紹啲袋，又唔會白鴿眼，所以就帶左個袋走。 呢個袋叫East Side Small Tote Bag，€1690，退稅後€1481，呢個絕對唔係經典或者長青嘅款式，而家搵呢個袋都冇乜資料，但我個人睇款多過諗將來賣出去嘅價值。 個陣掙扎緊買深灰色鱷魚皮定呢個米白色好，但其實我自己已經有個灰色鱷魚皮嘅YSL Kate袋，無理由又買多個差唔多色嘅袋啦，所以最後揀左米白色啦。聽日會孭呢個袋出街，大家期待下一篇blog我點襯個袋啦。 買完貴野就行下窮人恩物Primark！之前係英國blog都介紹過Primark價錢仲平過H&M，但啲款再大路易襯啲。Primark有個位可以望到Euronext Amsterdam阿姆斯特丹證券交易所棟建築物，又幾靚喎。 分享下係Primark買左咩啦，除左衫之外，男友買左個Head Massager，€1.5，用黎按摩頭皮，係幾舒服嘅，但用左幾次就放埋一二邊。 我買左個Handheld brush cleaner，€3，用黎清潔化妝掃，好好用。 買左支好平嘅香水，€8，用黎噴下間屋，而且我覺得佢好似IFC陣味。 我買左對白色嘅帆布鞋，好岩襯衫。 之後我地就黎左The Tara Amsterdam度食晚餐，歐洲春夏天日長夜短，當時已經8點9，個天仲光呀。地址：Rokin 85-89, Nes 100 1012 KL Amsterdam Netherland可惜呢間餐廳而家已經結業啦。 我叫左杯比利時Mort Subite嘅Cherry Beer，€3.7，車厘子啤酒好特別呀！話說我飲左一啖就倒瀉左杯啤酒，好彩冇整污糟YSL袋，但又要叫多杯啦。 安迪就叫左阿姆斯特丹Two Chefs Brewing嘅Green Bullet啤酒，€5.5。 小食叫左碟Bitterballs，€7.50，係荷蘭炸肉丸，將炒麵糊＋牛肉湯＋肉溝埋佢再雪凍，然後整成一個波，再加麵包糠去油炸左佢。 叫左碟Chicken Sate，€12.50，係雞肉沙嗲串燒，仲有埋法包添，發現係荷蘭都不時會見到沙嗲嘅菜式，原來荷蘭在係殖民印尼嘅時候，將沙嗲傳去歐洲。 然後叫左Schnitzel，€16.50，通常都係炸豬肉，但呢間餐廳係炸雞扒，係一道好常見嘅中歐菜。啤酒要比21%嘅稅，而其他野食就要比9%稅，呢餐飯總共食左€49.40。 夜晚我地又去左coffeeshop大麻咖啡店。 佢係荷蘭第一間嘅coffeeshop - The Bulldog The First Coffeeshop，係1974年誕生，呢間coffeeshop入面坐滿人，我地都冇好似琴日咁坐底食支joint，剩係入去行一圈，買左件space cake就走啦。 Space cake姐係大麻蛋糕，€7，The Bulldog出嘅大麻蛋糕會有埋個盒裝住，個盒可以拎返香港留念呀，好過係街邊鋪買個啲冇乜包裝嘅大麻蛋糕。 件蛋糕普通朱古力蛋糕咁好好味，食完係有啲feel，有少少感覺放大，有feel過我地琴日食個支joint。 仲買左大麻珍寶珠試下，都係普通糖咁樣，食完都係有少少feel。 又見到啲小食櫃就買件宵夜，今次買左Kaasbroodje，€1.55，都係荷蘭嘅小食黎，係芝士酥。下篇blog繼續荷蘭之旅！旅遊日期：2019年5月11日- 2019年5月20日=========================覺得呢篇blog幫到你，記得like Facebook Page: https://www.facebook.com/fatbjai.travel/follow Instagram: fatbjai.travelhttps://www.instagram.com/fatbjai.travel/YouTube: 曳豬到爆炸收到個blog的最新update！=========================《西歐四國遊》出發篇 (英航商務艙初體驗,一次過去哂4間國泰貴賓室)Day1 (倫敦歎Fortnum & Mason下午茶,食米芝蓮推薦威靈頓牛扒)Day2 (去倫敦Borough Market掃街,世界上最出名嘅地址?到達荷蘭阿姆斯特丹)倫敦住宿篇 (交通勁方便嘅時尚酒店 - Pullman London St Pancras)Day3 (荷蘭阿姆斯特丹,童話般嘅羊角村,走入紅燈區,去咖啡店食大麻?)Day4 (荷蘭阿姆斯特丹近郊勁靚Zaanse Schans風車村,初試Space Cake大麻蛋糕)Day5 (教大家點食荷蘭國民美食Herring,又飲又玩嘅喜力博物館,食迷幻松露注意事項!)Day6 (捉住荷蘭嘅鬱金香尾巴,去比利時睇尿尿小童,必食青口)
