～今日的行程～ 3月9日：Tully River塔利河Rafting激流體驗 -> Cairns Night Markets -> 晚：Vivaldis Restaurant Cairns (澳洲菜) 我地今日會去Tully River塔利河度玩激流， Tully River位於Cairns嘅南面，離Cairns市中心大約2個鐘車程嘅距離， 佢係被譽為澳洲同紐西蘭中最好嘅激流河流之一。 大家可能唔知激流係咩嘅一種水上活動， 激流，英文係Whitewater rafting， 其實就好似 Nintendo Switch遊戲《Super Mario Party》入面河川生存戰咁嘅划艇遊戲， 呢個運動係坐係橡皮艇上面，係河流的上游同隊員合力划到河流的下游。 激流呢個運動係好刺激架， 因為水流有時會好急，而且划艇時會遇到一啲石頭的障礙物。 我地旅行前係Klook book左呢個凱恩斯激流體驗， 當時有半日同全日兩個選擇， 見網民都係推介玩全日嘅激流， 所以我地都book左塔利河全日漂流， 扣除優惠碼，當時的價錢係HKD1086.15一個人。 朝早6:30am，旅遊巴就會係酒店接我地去Tully River Gorge 塔利河上游嘅峽谷， 真係一日比一日早出發呀。 一上車我地就補眠， 訓下醒下見到窗外有個香蕉田(應該係)， 啲香蕉都用膠袋包住。 我地預先著定泳衣係入面， 出面著T-shirt同短褲(著沙灘褲會更好)， 鞋要防水，我地帶左之前去馬爾代夫著嘅水上運動鞋黎換， 可以著綁帶拖鞋，但易甩嘅人字拖就唔可以著， 如果著左人字拖去都可以比錢租鞋著架。 另外我地仲帶左毛巾同替換嘅衣服，呢d物品就會寄存係旅遊巴上面，玩完激流用嘅。 之後我地就會著大會提供的救生衣同頭盔， 電話同隨身用品(e.g.防曬)就會放係大會嘅防水袋度比大會保管。 成個激流只係得lunch有個break比你補查防曬， 所以大家唔洗帶咁多野去玩激流。 每人會拎住一枝槳， 教練都會guide住我地要點樣用枝槳去控制個橡皮艇。 我地準備出發啦！ 架橡皮艇總共有8個人， 包括一位來自紐西蘭嘅教練， 三位日本女大學生， 一對來自南澳洲嘅亞洲情侶， 同埋我同安迪啦。 激流嘅途中教練都會提我地邊個位有攝影師影緊相位。 每逢一落斜坡， 架橡皮艇都會入水！ 好似得黃色衫嘅教練冇入到水！ 由於呢度係河流， 所以d水一啲都唔咸架。 大家都濕X哂lol。 玩激流都可以欣賞埋河流周圍嘅熱帶雨林的壯麗景色， Tully Gorge National Park的熱帶雨林係被列入世界遺產名錄架。 係呢度教練都會故意反船， 比我地試下跌落河嘅感覺&游下個河。 被我捕捉到個影相位。 上一秒我仲yeah緊擺pose， 下一秒我地就飲哂水啦lol。 基本上船頭係最快入水，而且係飲最多水， 辛苦哂坐船頭嘅安迪啦XD。 終於都上返水面。 但好快又有個浪冚過黎啦。 當過左一個浪之後， 就有一個大斜坡等住我地啦。 我個樣已經好驚咁！ 後面兩個日本妹仲好興奮咁。 一秒後，個浪冚過黎啦。 再次被水淹沒了！ 呢張係全組員大合照。 話說當時好興韓國oppa嘅比心手勢， 激流嘅時候一遇到其他船， 啲鬼仔都好鍾意做韓國比心手勢。 我地大約9:30am開始激流， 大約12點就係午餐的時候啦， 喺係河邊熱帶雨林中嘅一個類似涼亭的位置食野， 澳洲嘅tour通常午餐都係自助嘅形式， 而我地今次係食漢堡包， 會有哂d包、漢堡扒、蕃茄、醬等等， 然後自己夾想食嘅配料，整成一個漢堡包。 呢part河流有勁多石， 冇乜位比橡皮艇過， 唔知我地可唔可以順利划過去呢？ (發現攝影師冇影到我地過呢d石嘅過程lol) 最後我地都成功地又好狼狽咁過哂d石陣。 過完石陣，又有一個大斜坡等緊我地！ 臨飲水之前影返張yeah嘅相先。 我已經掩飾唔到恐懼的樣啦。 要準備衝過去d浪度啦！ 架船係45度角咁插落去咁。 今次d浪嘅衝突力好似係最勁！ 有d活動攝影師係影唔到嘅， 激流途中會經過一個好高的大石(比圖中最高個舊高)， 教練叫我地爬上舊大石再跳落水。 當時個對澳洲情侶決定唔玩， 安迪見到舊石咁高就想放棄， 點知船上個三位日本妹都好興奮要去玩， 我就唔執輸拉埋安迪去挑戰！ 上到去石上懸崖到三位日本妹諗都唔諗就跳左落水(好勁！) 今次呢個跳水同day5玩笨豬跳嘅感覺都好似， 雖然笨豬跳係高好多， 但而家跳水係冇乜安全措施， 感覺同樣恐怖。 我上到懸崖硬著頭皮就跳落水， 感覺好刺激！ 然後到安迪跳啦， 佢猶豫左幾秒， 最後都跳左落黎！ 我地bucket list又完成左一個成就啦！ 另外激流嘅尾聲， 教練帶我地划去一條比較隱蔽嘅河流分支， 佢叫我地試下d河水， d河水係好清甜架！ 除左玩緊激流嘅相之外， 攝影師仲影左d小動物！ 呢隻蜘蛛係食lunch的地方發現嘅。 係岸邊發現有條好大條嘅魚。 呢條蛇我地就見唔到， 大會發現到條蛇之後， 都叫我地唔好划去某個位置。 玩完激流之後，有更衣室比人換衫， 不過更衣室入面就冇間格， 尊重私隱嘅人要留意啦。 換完衫之後我地仲一齊影左張合照添。 攝影師影我地呢組船嘅相，印象中係大約AUD$54， 可以一個組員買左相之後，大家自己互share返d相，d相都係digital嘅。 買相呢度都有個小插曲！ 原本澳洲情侶買完相想除返7個人嘅價錢， 我地都同意除以7，因為我地有7個人嘛， 然後日本妹們竟然提議除以3，因為我地有3班人， 我地同澳洲情侶都O左咀， 除3黎講對日本妹們係著數d，因為佢地有3個人，會平過2人再攤分， 見佢地係大學生同咁醒目，我地都妥協啦。 我地返到酒店休息一陣就出黎行下啦， 黎左遊客都會行嘅Cairns Night Markets。 地址：4-60 Abbott Street Cairns Through to 71-75 The Esplanade opposite the Lagoon 入面有好多鋪頭仔， 係一個買手信嘅地方。 行到最入係一個food court， 有間中國自助餐，其實就好似而家香港各區都有嘅兩餸飯外賣。 有好多座位比人坐。 呢度嘅餐廳都係亞洲菜為主。 呢個trip嘅最後一晚，我地梗係唔會食food court咁頹啦， 黎左Mantra Esplanade酒店入面的Vivaldis Restaurant Cairns餐廳。 地址：Level 1 53/57 The Esplanade, Cairns 我地揀左室外露台的位置坐。 玩完激流化返個妝，頭又係懶得set就出左黎。 我叫左開恩茲本地啤酒Great Northern Brewing Co.。 前菜叫左Gratineed Green Lipped Mussels, Macadamia, Leek, Pernod，AUD$19， 法式焗紐西蘭綠唇青口， 呢種焗青口嘅煮法又幾好食。 主菜我叫左Kangaroo loin cooked rare on roasted capsicum and sweet potato mash, jus and chilli jam，AUD$39， 之前係墨爾本試過一次袋鼠肉覺得好普通， 今次黎開恩茲比多次機會佢， 我呢碟係一成熟rare嘅袋鼠肉， 伴碟有燒番椒、蕃薯蓉、辣椒醬。 我覺得始終都係牛肉好食好多。 安迪叫左Prime Black Angus fillet of beef on rocket with creamy mash potato and a rich red wine jus， AUD$41， 係頂級黑安格斯牛腰肉，伴碟有火箭菜、薯蓉、紅酒汁。 最後我地叫左碟甜品， Mango and lime cheesecake with creme anglaise and mango lime coulis，AUD$15， 係芒果青檸芝士蛋糕，側邊淋左英式蛋奶醬。 《去澳洲玩》又接近尾聲，我地聽日就返香港啦。 旅遊日期：2019年3月3日- 2019年3月10日 ========================= 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ ========================= 《去澳洲玩》 悉尼篇 Day1 (Qantas商務艙初體驗,最岩睇悉尼港灣大橋日落的酒吧推介) 悉尼篇 Day2 (突然去左沙漠滑沙？史蒂芬港Port Stephens出海睇海豚＋滑沙體驗) 悉尼篇 Day3 (QVB勁華麗嘅商場,Bondi Beach,必食網紅士多啤梨西瓜蛋糕) 悉尼篇 Day4 (Sydney Fish Market食海鮮,悉尼都有女人街?維珍內陸機有驚喜) 悉尼住宿篇 (雪梨中央車站隔離Mercure Sydney,估唔到房間有靚景睇!) 開恩茲篇 Day5 (挑戰笨豬跳,只有某d州先可以合法抱住樹熊影相?) 開恩茲篇 Day6 (大堡礁潛水巧遇香港人教練[多圖],親手掂大硨磲!) 開恩茲篇 Day7 (飲左一公升河水嘅激流體驗,真人版Mario Party河川生存戰?) 開恩茲篇 Day8 (國泰商務艙初體驗,澳洲手信分享) 開恩茲住宿篇 (度假風酒店Pullman Cairns International)
