～今日的行程～3月8日：Port Douglas -> 大堡礁 Great Barrier Reef -> 浮潛 -> 水肺潛水 -> 晚：C'est Bon Restaurant Francais (法國菜)今日我地會出發去大堡礁 Great Barrier Reef度潛水！我地旅行前係kkday book左呢個阿金科特大堡礁探索一日遊。大堡礁係世界上最大最長的珊瑚礁群，1981年被列入世界自然遺產名錄World Heritage Site，1997年被CNN選為世界七大自然奇觀。大堡礁有超過2900個獨立珊瑚礁，我地今次去呢個係阿金考特礁Agincourt Reef，佢係一個好多潛水同浮潛愛好者去嘅熱門度假勝地，Agincourt Reef有16個唔同的潛水地點，而今次呢個tour就會去其中三個潛水地點啦。我地冇潛水牌，所以最多可以潛2次Introductory dive體驗潛水，會包埋潛水設備同埋潛水衣，而浮潛係可以無限次落水玩架，當時個trip嘅價錢係HK$1417一個人。 今日好早就起左身，6:45am，旅遊巴係酒店接我地去Port Douglas。今日個天陰陰，但竟然比我地見到彩虹！希望個天氣唔會影響到我地潛水啦。 photo from http://portico-port-douglas.com/之前部電話壞左，2019年嘅相冇哂 :(Port Douglas係一個港口，我地搭旅遊巴黎Port Douglas上船去大堡礁！ 由於我唔記得左帶抹身毛巾黎，好彩Port Douglas有d鋪頭，我地買左條靚靚的浴巾，陽光與海...好代表到開恩茲呀。 我地上個架船叫做Silversonic，都幾大架，有兩層。 架船下層嘅樣子。(部GoPro加左潛水用嘅紅色濾鏡，所以畫面比較紅。) 呢度係午餐嘅時候拎野食嘅地方，另外都有d零食賣架。 架船會停三個潛水地點，潛水教練同我地講會係第一、三個站潛水，因為水流無咁急，其他時間我地會浮潛！好彩黎到大堡礁個天都靚左好多。 船尾有d樓梯級同平台比人準備落水。 首先同大家分享下浮潛先。船上有浮潛衣、眼罩、呼吸管、蛙鞋提供，但我地唔想同人共用呼吸管，就帶左自己嘅眼罩同呼吸管啦。我地仲每人帶左部GoPro落水拍片添！ 我地加左紅色濾鏡係GoPro上面，係水上面會好紅，但係水底就會清好多。 呢度有浮條提供，拎浮條黎浮潛都幾特別。 我地浮潛左兩次，等我分享下我地影到嘅魚仔啦。 呢隻係藍斑蝴蝶魚，又稱四棘蝴蝶魚，俗名藍腰蝶。藍斑蝴蝶魚嘅魚身係黃色，眼部有條黑色眼帶，魚身有一條打橫嘅藍色斑，魚身尾柄上有一點黑色的眼狀斑。 呢d黑白色嘅魚係六線豆娘魚，魚身兩側有四條垂直的黑色寬帶，尾柄有條短的黑色垂直寬帶，魚尾上下葉各有一條黑色條紋，上葉的條紋會連至尾柄個條短的黑色垂直寬帶。 嘗試跟蹤一條六線豆娘魚 lol。 呢條黃色魚鰭、魚身黑白色間條魚唔知叫咩名。 捕捉到呢條藍色好肥美嘅魚，都係唔知叫咩名。 見佢瘋狂撞落d珊瑚度食野，唔知佢個嘴仔痛唔痛架呢？ 呢三條魚比頭先個條藍色魚更加肥美！ 黎到海底世界緊係要finding Nemo，搵下小丑魚嘅蹤影啦。 分享完浮潛之後，就講下潛水啦！我地今日嘅潛水教練竟然都係香港人！佢叫做Kevin Ho，係外地遇到香港人真係好開心！p.s. 公開左我潛完水嘅素顏相一個教練會帶4個人落水，除左我同安迪兩個香港人外，仲有一個台灣人，一個西人，當時Kevin要廣東話、國語、英文，三種語言咁講解潛水要注意嘅野，睇見都覺得佢勁呀，份人仲好搞笑添。 落水後兩個人一組拖住手，Kevin一路要睇住我地4個，又要一路打倒游黎潛水，真係好勁！ Kevin帶我地黎睇呢個大硨磲Giant clam，又稱為巨蚌，係世界上最大型的雙殼貝類動物黎架。 我地會逐個人放隻手入去摸下佢嘅質感，當放左隻手入去之後，佢嘅雙殼就會夾埋，好搞笑。 當我地第二次潛嘅時候，基本上其他人都可以自己潛，得我長期都要比Kevin教練拖住。 Kevin教練都一齊入鏡selfie呀！潛水可以睇到好多唔同種類的魚仔，可惜我地都拍攝唔到d靚嘅魚仔片段 (畢竟我地只係潛水新手)，更可惜係我地今次見唔到海龜 (上一次係馬爾代夫見到幾隻海龜！)。 係第二個潛點停泊後，船上就有午餐提供啦，佢係自助餐的形式，拎個碟去拎野食嘅，比想像中的食物種類多，夾到成碟都係。我地係下層拎完野食就上上層望住大堡礁的海景食野啦。 潛水的時候會有潛水的攝影師幫你影相，係架船回程的時候就有部Pad比你揀相，我地就揀左呢張相！佢會print張相出黎比你，AUD$22，但就無digital的版本啦。 上一次係馬爾代夫潛水冇比到證書，今次係大堡礁潛水有證書啦，雖然呢種體驗課程的證書冇乜用嘅。 潛完一日水，夜晚就黎左呢間法國餐廳 - C'est Bon Restaurant Francais。 地址：20 Lake St, Cairns QLD 4870 返酒店沖左個涼，頭都懶得set，化個妝就黎食晚餐。 安迪手背同手都曬左兩節色。 我地叫左一杯香檳同白酒。 我地叫左三道菜的晚餐，AUD$65，前菜我揀左酥皮松露蘑菇湯，我飲完呢個湯都己經飽飽地。 安迪就揀左油封鴨腿，有南瓜、蕃茄、翠玉瓜做伴碟。 我碟主菜係豬腳。 伴碟有牛油蘑菇、雅枝竹蓉。 安迪叫左塔斯馬尼亞嘅三文魚柳，舊三文魚柳係先冷燻再燒成嘅，伴碟有海帶&青瓜沙律、櫻桃蘿蔔啫喱，d汁係用海膽牛油整成，好吸引咁。 甜品我揀左Paris-Brest巴黎-布雷斯特style的泡芙，中間係榛子cream，有一球雲呢拿雪糕，上面加上榛子粒同朱古力醬。 安迪就叫左雲呢拿焦糖吉士布甸，有一pat鮮忌廉，上面加上d杏仁粒。今餐好滿足！聽日我地會去玩激流！旅遊日期：2019年3月3日- 2019年3月10日=========================覺得呢篇blog幫到你，記得like Facebook Page: https://www.facebook.com/fatbjai.travel/follow Instagram: fatbjai.travelhttps://www.instagram.com/fatbjai.travel/YouTube: 曳豬到爆炸收到個blog的最新update！=========================《去澳洲玩》悉尼篇 Day1 (Qantas商務艙初體驗,最岩睇悉尼港灣大橋日落的酒吧推介)悉尼篇 Day2 (突然去左沙漠滑沙？史蒂芬港Port Stephens出海睇海豚＋滑沙體驗) 悉尼篇 Day3 (QVB勁華麗嘅商場,Bondi Beach,必食網紅士多啤梨西瓜蛋糕)悉尼篇 Day4 (Sydney Fish Market食海鮮,悉尼都有女人街?維珍內陸機有驚喜)悉尼住宿篇 (雪梨中央車站隔離Mercure Sydney,估唔到房間有靚景睇!)開恩茲篇 Day5 (挑戰笨豬跳,只有某d州先可以合法抱住樹熊影相?)開恩茲篇 Day6 (大堡礁潛水巧遇香港人教練[多圖],親手掂大硨磲!)開恩茲篇 Day7 (飲左一公升河水嘅激流體驗,真人版Mario Party河川生存戰?)開恩茲篇 Day8 (國泰商務艙初體驗,澳洲手信分享)
