~今日的行程~3月6日:早餐:Mercure Sydney -> 午:Sydney Fish Market -> 悉尼唐人街 -> Paddy's Markets -> 下午茶:Ribs & Burgers -> 悉尼機場 -> 開恩茲機場 -> 晚:Pullman Cairns International今日係我地最後一日係悉尼啦,夜晚會搭內陸機去昆士蘭州Queensland嘅開恩茲Cairns。 我地入住嘅Mercure Sydney其實係包左早餐,但我地Day4 Check out個日先至黎食,因為我地Day2要晨早join day tour、Day 3又為左食打卡嘅西瓜蛋糕。的確酒店早餐都係普通野,其實寧願食悉尼出面嘅美食! 11:30am,我地黎Sydney Fish Market食海鮮! 之前係墨爾本South Melbourne Market食左好好食嘅生蠔,今次黎Sydney Fish Market都好想瘋狂食蠔。 大家留意返Sydney Fish Market個開放時間,基本上星期一至日都開,營業時間係7am-4pm,唔好摸門釘。https://www.sydneyfishmarket.com.au/Home/Visit/Opening-Hours Sydney Fish Market嘅樓底好高,用左玻璃天幕,令到d天然光可以射入黎,個感覺好舒服。 見到d生蠔同海膽就已經好想食啦,但我地睇多幾間先。 見到呢間Christie's Seafood好多人幫襯,我地都睇下先。 我地買左一打來自New South Wales新南威爾士州的Sydney Rock Oyster,要AUD$22,呢個品種的生蠔比我地係墨爾本食嘅貴AUD$2-4。 Sydney Rock Oyster的肉都幾肥,食落好Creamy,但係有陣苦澀味,d苦味食完仲殘留係口入面,而且每舊生蠔食到有一小粒殼係入面,同我地係墨爾本食個d品種嘅口感好唔同。 食完令我地好失望嘅生蠔之後,我地決定食d實無死嘅野食,填補心入面嘅失望。 我地就係呢間Peter's買左Aburi Scallops 火炙帶子。 好多芝士好邪惡呀。 最後會灑d蟹子係面,每舊都有兩粒帶子,最意想不到d芝士下面係飯黎架!AUD$12有3塊火炙帶子。 我地唔信邪,決定再試一次Sydney Rock Oyster,不過今次就係Peter's度買。 我地黎左戶外嘅座位慢慢品嘗,試真啲。 同樣係一打Sydney Rock Oyster,價錢都係AUD$22,但呢間Peter's d肉就青bb啲,味道同Christie's Seafood個間差唔多,睇黎Sydney Rock Oyster唔係好岩我地食啦。 之後我地就試左呢間Peter's的Sea Urchin 海膽刺身。 AUD$5 一個,即開即食,我地每人叫左一個。 雖然海膽唔係好多,但好好食,無苦味。 食完野之後,我地就行左黎Darling Harbour,係悉尼的商業區,左面個個摩天輪係Darling Harbour Ferris Wheel。 發現呢個好特別的噴水池,佢叫Darling Harbour Woodward Water Feature,係1988年建成,呢個噴水池係由多個螺旋的梯极組合而成,d水係由梯級的頂部好平滑地流落去噴水池的中間,係唔會有噴水出黎的效果架,佢已經係2014年列入為New South Wales Heritage Register的歷史建築添。 行到黎悉尼嘅唐人街嘅中國銀行對面,見到呢棵樹幹查左d金箔係上面,唔知係一棵真定假樹呢? 我地又黎到Day1行過嘅Market City,係亞洲人購物的集中地。地址:9-13 Hay Street Haymarket NSW 2000 Market City的地庫就係Paddy's Markets啦。 入面有d似女人街,都係攤檔形式,好多手信賣。 之後我地又去Day1都行過嘅One Central Park醫醫肚先。 我地黎左呢間Ribs & Burgers,佢係一間澳洲連鎖的漢堡包餐廳。地址:Shop RB09A Lower Ground Level Central Shopping Centre 28 Broadway, Chippendale 我叫左支意大利啤酒Peroni。 每枱都有個有茶咀嘅杯,入面放左醬、刀、紙巾。 首先黎左Apple Cabbage Salad,AUD$7.5,入面有椰菜絲、蘋果絲、烤過嘅松子仁,去旅行再食返d菜呀。 我叫左Bacon + Cheese burger,AUD$14.5,舊煙肉好大塊呀。 安迪叫左Wagyu Orignal burger,AUD$16.9,係和牛漢堡。佢地d牛都係用澳洲嘅安格斯/和牛,都會煮到半成熟,好耐都無食過咁juicy,咁好食嘅burger啦! 食完飽飽就係One Central Park影張相留念啦,我地之後就返酒店拎行李去機場啦。 我地搭uber黎到悉尼機場,4日嘅悉尼之旅咁快就完啦。 我地會搭維珍澳洲航空(Virgin Australia)去開恩茲Cairns,排隊check in寄行李的時候,發現9成排隊的乘客已經一早係自助機print左登機證&行李標籤,而且已經貼埋行李標籤係行李度添,所以我都派安迪去自助機print登機證&行李標籤。當我地拎定passport的時候,又發現根本冇人攞passport出黎,然後醒覺我地又唔係出入澳洲境,所以就用唔著passport啦。頓時覺得自己似大鄉里出城! 一陣要撕走黎悉尼個程Qantas Business個tag啦,影返張相留念先。 話咁快我地就入左黎內陸機機場嘅禁區啦。 我地班機係7:15pm起飛,而家6:45pm準備登機啦。 今晚嘅天氣好好,個天無乜雲。 要同悉尼講bye bye啦。 由於係內陸機,架機都細d。 最令我驚喜的係,機上有免費的Wi-Fi!老實講,我地係第一次遇到免費Wi-Fi的航班,雖然機程只有3個鐘,但有得玩下ig、fb都幾過癮!不過睇戲的話,就要download佢地的entertainment app,同港龍唔同的係,維珍係可以用機上的Wi-Fi去download個app,咁先係人性化的設計! 我當時就睇左Lady Gaga個套A Star Is Born,唯一的唔好處係,一路睇戲,一路收到朋友的whatsapp/ig messages,阻住哂,哈哈。(每人只可以一部電子儀器連接Wi-Fi,如果你有電話、電腦、iPad,就可能要輪流用啦) 可以係機上睇到悉尼的日落為悉尼之旅畫上完美的句號。 發現座位有份menu,入面都係收費的食物,心諗唔通好似廉航咁食野要比錢? 我地最後都冇買到野食。 原來都有飛機餐的,係好輕盈的墨西哥卷、pretzels & soy crisps零食、一杯野飲、一粒糖。 食完野係窗外見到好大個咸蛋黃。 三個鐘的機程好快就降落Cairns啦。 開恩茲位於昆士蘭州Queensland,屬於溫暖的熱帶季風氣候,一落機就feel到呢度的溫度暖左好多,同悉尼嘅清爽感覺好唔同,好似去左東南亞國家咁。另外開恩茲比悉尼慢一個鐘架! 呢個鐘數機場冇乜機,係拎行李個位都冇乜人。 然後我地就call uber去呢幾晚住嘅酒店Pullman Cairns International啦。 返到酒店出面都冇乜餐廳開,我地就叫左room service做晚餐,叫左支Queensland嘅啤酒Summer Bright Lager,AUD$9,仲叫左個Pullman Pizza,AUD$22,竟然收左delivery fee AUD$6!聽日我地就去玩Bungee jump,好緊張呀。旅遊日期:2019年3月3日- 2019年3月10日=========================覺得呢篇blog幫到你,記得like Facebook Page: https://www.facebook.com/fatbjai.travel/follow Instagram: fabjai.tavelhttps://www.instagram.com/fatbjai.travel/YouTube: 曳豬到爆炸收到個blog的最新update!=========================《去澳洲玩》悉尼篇 Day1 (Qantas商務艙初體驗,最岩睇悉尼港灣大橋日落的酒吧推介)悉尼篇 Day2 (突然去左沙漠滑沙?史蒂芬港Port Stephens出海睇海豚+滑沙體驗) 悉尼篇 Day3 (QVB勁華麗嘅商場,Bondi Beach,必食網紅士多啤梨西瓜蛋糕)悉尼篇 Day4 (Sydney Fish Market食海鮮,悉尼都有女人街?維珍內陸機有驚喜)悉尼住宿篇 (雪梨中央車站隔離Mercure Sydney,估唔到房間有靚景睇!)開恩茲篇 Day5 (挑戰笨豬跳,只有某d州先可以合法抱住樹熊影相?)