~今日的行程~ 6月18日:早:Phở Lệ 錦麗 (越南河粉) -> Tân Định Church 耶穌聖心堂 (粉紅教堂) -> Saigon Central Post Office 西貢中央郵局 -> Notre-Dame Cathedral Basilica of Saigon 西貢聖母聖殿主教座堂 (紅教堂) -> 午:親戚家 -> 胡志明市新山一國際機場 -> 香港今日係快閃胡志明市嘅最後一日,雖然今日打算訓晏d,但我地9點半就已經出左門口去食早餐啦! 我地搭Grab黎到當時胡志明市Tripadvisor最高分的越南河粉餐廳 - Phở Lệ 錦麗,個名係咪好熟面口呢,其實太興係2017年引入左錦麗黎香港,(因為太興呢一年多都無食過了 :( )所以係香港都會發現到錦麗嘅蹤影架。(話說我D fd都唔知錦麗係源自胡志明市)地址:413 - 415 Nguyễn Trãi, Phường 7, Quận 5, Thành phố Hồ Chí Minh 胡志明市總店Phở的種類比香港多D,而且有湯賣,又有勁多飲品揀,但係就唔似香港,冇米紙卷、小米糕個d小食賣。 我地上左樓上坐,環境好地踎,唔似香港咁高檔。 男友叫左一杯鮮金桔水汁,VND$15,000,我叫左杯冰咖啡奶,VND$25,000。金桔水汁其實就係金桔檸檬,凍咖啡奶始終都係今個trip飲嘅第一杯最好飲(係舅父屋企個頭),臨番香港我地會再encore多杯! 佢唔似香港咁,一人一個杯裝住D香葉檸檬,而係一台一大個碟裝哂。 我地叫左什錦−生熟腩丸牛肉粉,VND$75,000,我覺得湯底就呢度正D,但D牛呢度就好軔啦。 有朋友問我點解間餐廳會有中文,見到張濕紙巾都係中文字仲大過越文字,原來老闆劉全才係越南華僑黎嘅。BTW呢張每人都會比一張嘅濕紙巾收VND$2,000一個人,類似係餐廳用人頭計嘅服務費咁。 呢度仲貼左錦麗係香港開的新聞添。 之後我地去左港女至愛打卡的粉紅教堂 - 耶穌聖心堂,英文係Tân Định Church,而越文係Nhà thờ Tân Định,佢係胡志明市第二大的教堂。 個教堂1876年建成嘅,而家都仲保存得好靚。 粉紅色的外表吸引左好多女孩子黎影相。 當然我都係其中一個慕名而來嘅女仔啦。 教堂冇得入去參觀,所以我地係外面影下相就閃人啦。 之後諗住由耶穌聖心堂行去胡志明市中心郵政局,路程大約20分鐘,點知行左一個街口就仆左街......右腳膝頭哥擦損左流血。越南D路真係唔好行,所以我地唯有Call Grab去啦。 終於黎到胡志明市中心郵政局,又叫做西貢中央郵局,英文係Saigon Central Post Office, 越文係Bưu điện trung tâm Sài Gòn,係1891年興建而成的,黃色嘅郵局充滿法式風情。 郵局入面有越南國父胡志明的相掛係度添,呢度勁多野買,簡直係買手信必黎的地方。 我買左d明信片,VND$5,000一張,設計仲好靚添。呢度有位比人坐,有筆提供,即寫即寄好方便。 郵票控真係要呢黎呢度買郵票,VND$90,000,D郵票放哂係度任你揀,包裝得又好,我買左個套同胡志明有關的郵票做紀念。 仲買左d越南斗笠嘅鎖匙扣,VND$10,000一個,派街坊一流。 呢d木製的磁石貼都好靚呀。 買完野、寄完明信片,欣賞下郵局入面的設計啦。 呢度刻左當時胡志明市的地圖。 係門口再影多張先。 西貢中央郵局隔一條馬路就係西貢聖母聖殿主教座堂,英文係Notre-Dame Cathedral Basilica of Saigon,越文係Nhà thờ chính tòa Đức Bà Sài Gòn。當時天色好暗,所以張圖就較味精d。 西貢聖母聖殿主教座堂係胡志明市最大的教堂,佢係1880年建成,教堂前面有個聖母像。原來教堂當時所用的物料全部都係由法國進口,直到今天d紅磚都仍然冇褪色,所以呢座教堂亦都叫做紅教堂。 之後我地就搭Grab返去酒店拎行李,再去舅父屋企。舅父又買凍啡奶比我地飲,我宣布呢個係全胡志明市最好飲的凍啡奶!甜得黎,又有濃濃的咖啡味,飲完仲可以加壺入面的茶落去飲添。 今日係端午節,循例同親戚做個節食餐家常便飯,然後我地就出發去機場啦。 親戚帶埋呢兩位小朋友送我出機場,左面係我表弟&右面係我表妹個仔,佢地係表舅甥的關係黎架。 之後我地就入去機場啦,記得行李Check in之後,要睇實件行李過唔過到關呀!有香港人冇睇就走左去,然後件行李有違禁品,搞到職員要開咪叫人名 (媽~好__呀!),然後入閘後Security Check要除埋鞋架,有香港腳的各位要注意番啦。 我地入到黎禁區就買下手信咁,呢度全部都係洗美金,而且價錢比出面貴D! d免稅店都係一條直路睇哂。 鋪頭唔會好多,建議大家係市區買手信啦。 最後係機場買左3件越南妹擺設,最右個個USD$2.5。 我地係搭7:05pm的國泰機,非常準時起飛!不過我地坐呢架係舊機,冇得USB差電:( 胡志明市的夜空好有都市感! 我揀左雞貝殼粉,雞好食,個汁好正。 男友揀左個魚飯,魚好食,但唔夠汁撈飯:( 國泰短途機唔少得有哈根大師雪糕食,為呢3日嘅快閃胡志明市劃上完美的句號!最後架機竟然早左10分鐘到香港,而且個陣係夜晚11點,明明好多人等緊行李,但我地等左5分鐘行李就出左啦!OMG,我地究竟係咪搭緊因航!?旅遊日期:2018年6月16日- 2018年6月18日 =========================覺得呢篇blog幫到你,記得like Facebook Page https://www.facebook.com/fatbjai.travel/follow Instagram: fabjai.tavelhttps://www.instagram.com/fatbjai.travel/收到個blog的最新update!=========================《快閃胡志明市》Day1 (越南人推薦嘅地道越南美食,Bui Vien Walking Street西貢酒吧街)Day2 (頭頓市即日來回,越南都有個耶穌像?胡志明市最出名法包、最高分越南菜推介!) Day3 (打卡勝地-粉紅教堂,胡志明市最高分的Pho - 錦麗總店)住宿篇 (Athena Hotel,套房都只係幾百蚊)其他文章:越南 網上簽證e-Visa申請分享 (內附注意事項)越南 落地簽證申請分享 (適合BNO,內附到達機場領證過程)