～今日的行程～4月16日： 富士急樂園FUJI-Q Highland -> 新宿 思い出橫丁 -> 晚：玄海 (雞肉火鍋)今朝我地8點幾就離開酒店，出發去位於山梨縣的富士急樂園 FUJI-Q Highland。 晨咁早起身，就買左罐Dydo牌的M Coffee黎飲，120円，提下神。 經過間麵包店，買番個包咬下先。 買左三個包。左上個件係Croque monsieur (Tomato doria) ， 190円，中文的意思係法式三文治 (蕃茄多利亞)，即係個餡有芝士、火腿、蕃茄。 Soft boiled egg curry bread，190円，中文的意思係半熟蛋咖喱包。 Fish Fry Dog，280円，我諗中文的意思係炸魚熱狗?! 我地旅行之前係呢個網，預約左Q套票，當時的價錢係7600円一個人，包左由新宿出發的高速巴士來回飛+富士急樂園入場券+遊樂設施無限次乘坐券。我地就行到黎バスタ新宿 (Shinjuku Expressway Bus Terminal) 的4樓搭高速巴士啦，バスタ新宿係NEWoMan商場隔離的。(由2018年7月開始，富士急樂園係免費入場架，即係唔需要買入場券) 我地book左8:55am的高速巴士，記得要早10分鐘黎到巴士站兌換Q套票呀。呢架山中湖平野就係去富士急樂園架啦。 架車好新淨，幾好坐。 車程大約係1小時40分鐘，可以慢慢食早餐呀。 我地會係富士急ハイランド (富士急樂園)落車。 搭一個站就到啦。 到站仲可以禁鐘落車添。 搭車的時候都仲見到d櫻花呀。 落車之後我地買定d野飲入場先，天氣咁凍，我買左支熱的午後の紅茶的檸檬茶，130円，日本的汽水機有熱飲真係好正呀。 男友買左Minute Maid的車厘子&桃汁，160円。 富士急樂園的地圖，今期期間限定的遊戲有進擊的巨人同埋富士飛行社。 星星個d都係我覺得刺激的機動遊戲。 我地入去富士急樂園啦。當日樂園的營業時間係9:00am - 5:00pm，由於4月仲係冬天，所以營業時間好短，大家可以去官網check番富士急樂園的營業時間架。 首先要經過呢個來自法國的Gaspard and Lisa為主題的小鎮，我地留番走個陣先行啦。 行完Gaspard and Lisa小鎮，終於到達富士急樂園要入場費的入口啦，我地係售票處排隊換飛，當日有兩個遊戲都暫停維修。 富士急都有Fast Pass賣架，叫做絕叫優先券，絕叫券數量有限，1000円一張，每張券只可以用係一個遊戲上面一次。因為個陣係冬天+閒日，所以人都唔係好多，我地係無買到絕叫券架，但都好好彩夠時間玩哂4個必玩的過山車&鬼屋。 我地首先排隊玩高飛車，佢擁有121度的最大下降角度，拎左世界上最陡峭過山車的健力氏世界紀錄，我地排左一個鐘先玩到呀。 呢個就係高飛車最特別的121度角嘅軌道，當架車上到最高點，向住地面停係個一陣，係完全望唔到前面的軌道，個種感覺就好似等緊行刑咁！ 玩完仲可以影相留念，證明自己玩過高飛車添。 之後我地玩呢個空中旋轉飛行機 - Tentekomai，當高塔升到32米的高空自轉的時候，我地可以控制左右兩邊的雙翼轉動，去令成個人不停360度上下轉圈！男友自己轉左十個圈左右就冇再轉啦！而我係高空凍得濟，凍到唔想轉，所以一個圈都無自轉到。玩完見到排行榜上的遊客都起碼轉到100個圈以上，非常勁！ 之後我地就排隊玩瘋狂365度轉的Eejanaika，大約排左50分鐘左右。Eejanaika係呢度唯一一個凌空同埋要除鞋既過山車，一開始係倒轉行，之後衝落去個座位會360度轉！ 富士急樂園都有櫻花睇呀。 大約1:40pm，我地都肚餓啦，所以黎到叫Food Stadium的一樓防波亭食午餐。 男友叫左咖哩雞，900円。 我叫左山梨醬炸豬排丼，1080円。 今日個天氣凍又多雲，完全睇唔到富士山呀。 見到呢間Meat x Meet餐廳都幾吸引喎，下次有機會再黎玩可以一戰。 之後我地就去玩富士急樂園出名恐怖的鬼屋，當時的鬼屋叫做絕凶 戰慄迷宮。 個鬼屋要額外比1000円玩架。 我地買左2:00-2:20pm入場嘅飛，最後等到2:20pm先可以入場。 排隊個陣係望住鬼屋的出口，幾乎個個都係嚇住走架。 呢個鬼屋的主題係恐怖人體實驗的醫院，遊客係唔可以單獨玩呢個鬼屋，整個鬼屋要玩45分鐘到，開始鬼屋探險前要睇一段恐怖影片，鬼屋探險都幾多嚇人的位，而且間鬼屋好大，不停行上行落，經過好多間房。 總共有5層咁多呀！之後係2018年7月間鬼屋仲翻新成更加恐怖添。 之後我地就玩過山車之王 Fujiyama，呢個過山車有超強的離心力，不停令你覺得自己會拋出車外。估唔到呢架金色既過山車望落係最傳統，原來佢係最好玩既！ 玩完仲可以坐番Fujiyama的過山車留念架。 Do-Dodonpa 急速過山車，架過山車一開始就即刻加速到180km/h的時速，快到咩都睇唔到。個過山車只有一個大圈，感覺最刺激就係開頭加速個下超快好爽。(段gif係表達唔到架過山車有幾快lol) 進撃の巨人 THE RIDE，呢個係期間限定遊戲，要額外比1000円玩架，類似之前介紹澳門個個蝙蝠俠4D電影咁，座位係會升高，個故事係周圍飛黎飛去打巨人。但我覺得澳門個蝙蝠俠4D電影會正少少，因為佢會有個第一身的故事性加左落去！ 手信店竟然有個好18禁的布甸買呀。 富士急就快關門，我地就去玩埋旋轉木馬先至走。 雖然今日天氣麻麻地，睇唔到富士山，但富士急樂園帶比我地一個刺激的下午呀。 我地就行下Gaspard and Lisa小鎮啦。 當時係復活節，見到有隻扮復活節兔仔的熊公仔賣，佢條頸仲掛左隻雞仔添，好可愛，我地就買左隻番屋企啦，2160円。 等車返新宿的時侯，係車站的便利店買d小食食先。 Fuji Lava Fried Chicken，450円，係黑色的炸雞呀。 我地會搭5:33分的巴士返バスタ新宿 (Shinjuku Expressway Bus Terminal)，但最後5:46分先上到車。 7:30pm返到新宿了，我地就行下商場shopping先。 係新宿周圍行下行下，就遇到呢條思い出橫丁，係一條串燒店&居酒屋林立的小巷。 小巷兩旁都開滿串燒店，店舖門口都好多人等緊入座，成條小巷都非常之迫呀。 今日我地好肚餓，就廢時等位啦，下次再黎東京都要黎思い出橫丁試下d串燒先。 之後我地就黎左呢間玄海食水炊き，水炊き係原自九州的雞肉清湯鍋。地址：東京都新宿区新宿5-5-1 間餐廳display左一個成個人咁高的鼓呀。 玄海係昭和三年(即1933年)開業，至今已經接近90年了，店員都係著和服架。 我地叫左呢個有6樣野的水炊鍋餐，5000円一個人，包括有前菜、沙律、炸雞翼、雞肉鍋、日式燴飯、雪葩。 仲包左兩小時任飲添，有生啤、支裝啤酒、燒酎、冷/熱清酒、highball、梅酒、柚子酒、紅白酒、烏龍茶、橙汁、可樂、雪碧，好多野飲揀呀。 我叫左梅酒。 男友叫左生啤，係麒麟啤黎嘅。 沙律 前菜 呢個係膠原蛋白黎架，將佢加入雞肉鍋入面。 雞肉鍋終於上啦。 入面都好多雞粒呀。 炸雞翼 餐廳好貼心，佢會送上d紙條比你包住舊雞翼黎食。 咁隻手就唔會整污糟啦。 仲有個杯比你潷d雞湯黎飲。 叫多杯柚子酒黎飲先。 食哂d雞之後，侍應就送上左飯，再倒埋d雞湯變成泡飯咁食。 食完碗飯，侍應送上士多啤梨雪葩＆熱茶，呢餐水炊鍋餐好滿足呀。 臨返酒店仲係7仔買左個泡芙食添。旅遊日期：2018年4月12日- 2018年4月17日 =========================覺得呢篇blog幫到你，記得like Facebook Page https://www.facebook.com/fatbjai.travel/follow Instagram: fabjai.tavelhttps://www.instagram.com/fatbjai.travel/收到個blog的最新update！=========================《去東京玩》Day1 (超特別牛肉生日蛋糕,VR Zone玩Mario Kart,逃出人體實驗室)Day2 (築地食大和壽司,六本木睇東京鐵塔,Red Rock,Gram Pancake)Day3 (在新宿御苑抓住櫻花的尾巴,澀谷,秋葉原超正吉列牛)Day4 (淺草和服體驗,上野阿美橫丁,銀座沾麵)Day5 (富士急樂園FUJI-Q Highland,新宿雞肉火鍋推薦)Day6 (淺草附近超正鰻魚飯推介 - 鰻禅)住宿篇 (東新宿,Hotel Sunroute Higashi Shinjuku)
