～今日的行程～4月15日：淺草 -> 午：並木藪蕎麦 (蕎麥麵) -> 和服體驗 -> 淺草寺 -> 上野阿美橫丁 -> 下午茶：みなとや食品 (章魚燒) -> 銀座 -> 晚：銀座朧月 (沾麵) 我地今日會去淺草著和服，諗住著和服之前去本所吾妻橋站附近的呢間鰻禅食個午餐先，鰻禅11點鐘先開鋪的，當日係星期日，當時大約接近11點，間鋪頭仲未開，門外已經排左條龍啦。由於我地book左12點的和服體驗，我地係唔夠時間排隊等位，於是我地就放棄左食鰻禅了。 於是我地就一路行去淺草寺，一路諗下食乜。突然見到呢座好特別的建築物，原來佢就係Asahi啤酒總部大樓的Asahi Beer Hall，係由法國設計師Philippe Starck設計的，黃色個舊原來係扮緊火焰，下面就係扮緊聖火台啦。 我地要行呢條吾妻橋過對面岸。 係橋上可以望到晴空塔，同埋Asahi啤酒總部大樓。其實Asahi Beer Hall個火焰 遠望真係好似一舊屎，唔怪得佢另一個名係叫做「糞便大樓」啦。 我地行到黎淺草站了，呢到有觀光的人力車坐呀。 而我地就去左附近的並木藪蕎麦食蕎麥麵啦，個門口好有古時的日式感覺呀！原來佢係一間百年老店黎架，係1913年就已經開業。地址：東京都台東区雷門2-11-9 有普通座位&要除鞋坐的榻榻米座位，我地就廢時除鞋啦， 男友點左Yamakake Soba 山藥蓉蕎麥麵，1000円，呢個係熱的蕎麥麵黎架。 我就點左Norikake Soba 紫菜蕎麥麵，950円。呢個係凍食的蕎麥麵，最右個支係醬油黎嘅，將醬油倒入中間個杯度，然後點蕎麥麵黎食架。食完個蕎麥麵之後，侍應會送上一壺熱湯，將熱湯倒入個杯度，溝埋杯入面點剩的醬油黎飲。 總共食左1950円，張單都好懷舊feel呀。 見到呢個雷門就係淺草寺的入口啦，淺草寺係東京都歷史最悠久的寺院黎架，係推古天皇36年，即係西曆628年興建的，寺入面供奉的本尊係觀音。 但係我地要去換左和服先再去淺草寺，我地之前去京都清水寺著過浴衣，今次係第一次著和服呀。 終於見到間和服店 - 淺草愛和服。 原來佢有三間分店，我地book左個間係無咁顯眼的粉紅色招牌 2號店。地址：東京都台東区花川戸1-11-4 NWビル1階 由於未到12點，我地就係附近下行，又比我地見到晴空塔啦，但係個天陰左好多，希望一陣唔會落雨啦。 和服的流程會如下：1) 揀和服、半幅帯、刺繍衿長襦袢、裝飾結繩、和式提包。*和服有部份款式要額外加錢，但由於太多人了，擠唔到去睇加錢的和服款。*男女賓係分開揀和服，所以事前最好同男女朋友傾好揀咩色tone可以夾番，而我揀完就WhatsApp比男友睇我揀左咩色。*行李可以寄存係店度，但重要野要跟身。2) 職員幫你著和服。*記得著之前要去廁所呀，著左和服就去唔到廁所架啦。3) 職員幫你set頭髮造型，仲會幫你夾髮飾係頭度。4) 著和式襪子&木屐。 男仔就有和服、角帯、襦袢、和式提包要揀。職員幫你著完和服之後，男仔係無頭髮造型set嘅，所以著埋和式襪子&木屐就可以了。 搞掂哂之後就可以同男友會合啦，d行李就咁放係呢個尼龍袋入面，所以貴重物品必須跟身呀。 之後職員會帶我地去店後面一個靚位影幅相，係影到背後的晴空塔架。 還和服個陣會曬番張明信片比你架。我地係Klook度book淺草愛和服的情侶甜蜜方案，12:00pm到達和服店，4:30pm還和服，當時的原價係HKD$502，扣左優惠碼＆credit，最後係比HKD$480.1。我地著完和服寄存行李的時候，有位攝影師職員問我地有無興趣買影相服務，14,000円，包30分鐘戶外影相，最後可以揀10張相&包埋執圖。之後發現原來個攝影師係係東京working visa的香港人黎，所以我地就幫襯左佢啦。 淺草寺周圍都人山人海，於是攝影師就帶我地黎左淺草寺隔離的淺草神社，少人得黎，又有日本feel。 大家都係香港人，影相擺pose的溝通就好方便啦。 和傘真係一個好好的拍攝道具呀。 第我分享當日的幾張靚相啦。點擊圖片放大 +3 雖然話影30分鐘，可能大家都係香港人，影下影下都幾乎一個鐘呀。交還完和服之後就可以揀相啦，修完圖佢就會email番d相比你架啦。 影完相我地就行下淺草寺啦，好多人都會黎本堂求簽架，本堂係觀音像供奉的地方。 求簽的收費係100円，chok幾chok支簽就會跌出黎架啦，然後係木櫃入面拎番自己張簽文。 男友求到吉簽。 我都求到吉簽呀。 係本堂前面影番張相先。 我都幫男友影番張先。 淺草寺呢度有好多唔同的御守賣，例如交通安全、學業、健康、除厄運、心想事成、良緣等等。 大家估下我買左邊個。 我係外貌協會嘅會員黎，所以就買左最靚的良緣守，800円一個，我係粉紅色，男友係粉綠色。 我地就周圍影下相啦。 比張背面相比大家睇下，個半幅帯都綁得好靚呀。 由淺草寺的雷門至寶藏門之間就係仲見世通啦，呢度開滿左小食店、工藝品店&手信店。 我地去左呢間淺草九重買炸饅頭。 已經唔記得自己買左咩味啦，但大家記得仲見世通係唔可以一路行一路食野架，所以我地食完先繼續行。 見到呢間賣和菓子的鋪頭 - 舟和。 買左紅白綠三隻色的花見糰子，黃色係番薯羊羹，羊羹其實係豆製的甜點黎，呢盒野411円。 係仲見世 杵屋買左盒手信。 拆開包裝係咁嘅樣。 有幾款唔同口味的燒米餅，拎番公司做手信一流呀。 仲買左呢d好靚的娃娃&雷門的掛飾，1000円5個，有朋友feedback話佢掛左係袋度，有次落雨個娃娃就甩左，因為個娃娃係紙製的。 係清水寺門口影多張相，我地就返去淺草愛和服還和服，而且搵攝影師揀相啦。 見到野飲機有支櫻花圖案的原味可樂，130円，就買黎飲&帶番香港收藏啦。========================= 然後我地就搭地鐵黎到上野站，係上野站＆御徒町站之間有條好長好多人行的商店街。 條街就叫做アメ橫，中文叫做阿美橫丁，呢條街係好多野食、雜貨賣架。 見到呢檔賣蜜瓜＆哈密瓜，就忍唔住買條試下啦。 綠色果肉的蜜瓜，100円，而橙色果肉的哈密瓜，200円。 之後黎左呢間好多人排隊食的みなとや食品 本店，佢一邊係做海鮮丼飯，另一邊係做章魚燒，我地就試下佢地的章魚燒啦，見到大だこ燒排隊就可以啦。地址：東京都台東区上野4-1-9 我地買左300円6粒章魚燒，呢間野特別在於奶黃醬、章魚燒醬、紫菜粉、柴魚等等，放係枱度任落架，重口味的我地就緊係瘋狂落啦。食完章魚燒我地就行埋呢條阿美橫丁，街尾有座御徒町吉池總店大樓，1-4樓係UNIQLO，而5-6樓係GU，我地係GU都買左d戰利品呀。 之後我地搭地鐵去銀座，咁岩遇到熊本熊的列車呀。 我地黎左銀座 朧月食沾麵，去到個陣門口已經排左好幾個人啦，由於店入面係圍住廚師坐，座位少，只有7個位，排左半個鐘先入去到呀。地址：東京都中央区銀座6-3-5 第一高橋ビル 1F Menu 我地叫左特製沾麵，佢有並、中、大，三個份量揀，我揀左中size，1050円。 男友揀左大size，1150円。佢個湯底好濃，好正，呢個大size的份量勁多，食完勁飽！早知我地兩個都叫中size啦。 之前去大阪都分享過一次沾麵的食法，食哂d麵之後，如果d濃湯仲有剩，可以叫廚師加熱水落d濃湯度，再飲埋碗d湯佢，(其實都好似我今朝食蕎麥麵咁lol)飲埋碗湯真係飽到行唔郁呀。 銀座係東京的商業區，一街都係名店，見到呢間愛馬仕Hermès仲靚過中環個間添。旅遊日期：2018年4月12日- 2018年4月17日 =========================覺得呢篇blog幫到你，記得like Facebook Page https://www.facebook.com/fatbjai.travel/follow Instagram: fabjai.tavelhttps://www.instagram.com/fatbjai.travel/收到個blog的最新update！=========================《去東京玩》Day1 (超特別牛肉生日蛋糕,VR Zone玩Mario Kart,逃出人體實驗室)Day2 (築地食大和壽司,六本木睇東京鐵塔,Red Rock,Gram Pancake)Day3 (在新宿御苑抓住櫻花的尾巴,澀谷,秋葉原超正吉列牛)Day4 (淺草和服體驗,上野阿美橫丁,銀座沾麵)Day5 (富士急樂園FUJI-Q Highland,新宿雞肉火鍋推薦)Day6 (淺草附近超正鰻魚飯推介 - 鰻禅)住宿篇 (東新宿,Hotel Sunroute Higashi Shinjuku)
