～今日的行程～4月14日：新宿御苑賞櫻 -> 澀谷 -> 午：つばめグリル (漢堡扒) -> 下午茶：Luke's Lobster (龍蝦包) -> 下午茶：世界で２番めにおいしいメロンパンアイス (雪糕菠蘿包) -> 秋葉原 -> 晚：牛かつ 壱弐参 (吉列牛)我地去旅行之前睇左東京的櫻花開花情報，2018年東京櫻花的花期比以往早，當時新宿御苑的開花日係3月22日、五分開係3月26日、滿開係3月27日、櫻吹雪係3月30日、葉櫻係4月4日，我地以為4月4日之後應該都無櫻花睇啦，而我地成4月12日先到東京，所以以為今次東京之旅應該會睇唔到櫻花，於是放棄編排睇櫻花的行程。點知我地係Day1 &2 係街都遇到一兩棵櫻花樹，而且係Instagram又見到有人係東京影櫻花，於是Day3我地就決定去新宿御苑撞下彩啦！ 我地搭地鐵到新宿三丁目站，行5分鐘就黎到新宿御苑新宿門呢個入口啦。入去新宿御苑要比入場費架，當時的入場費係200円一個人。(原來而家2020年已經加價到500円一個人啦！) 門口見到呢棵咁靚的花，心諗就算睇唔到櫻花，都可以影下其他靚花喎。 呢個資料版列左18種新宿御苑的花， 如果號碼上面係櫻花狀的logo，佢就係櫻花黎架啦， 另外，d花係根據佢地盛開的先後次序排列架， 1號最早盛開，18號最遲盛開。就咁睇，當時10號至16號的花係盛開緊，而11號至14號＆16號，呢5種花都係櫻花黎架。 而呢張新宿御苑的地圖就list左呢18種花分布係咩位置，我地要去11號至14號櫻花的位置呀！ 呢棵應該就係9號櫻花啦，呢種櫻花係淺粉紅色，中間帶點白色。 見到呢種好似玫瑰的baby pink的花好靚呀。 呢種應該係16號櫻花，係白色的櫻花，花蕊係桃紅色的。 好鍾意呢種櫻花的顏色外淺內深，配埋佢側邊的綠葉，真係好靚呀。 求其係地下執左朵櫻花插係耳仔度影相 lol。 黎一張近鏡少少的櫻花圖啦。 Blog的相我一向都懶得整色整水，等我執一張比大家睇下啦。 Set腳架同男友影番張合照先。 一整棵櫻花的樣貌。 影到咁上下都攰啦，我地搵個位坐低野餐先，買左罐桃味飲品，130円，隻色好襯d櫻花呀。 黎新宿御苑之前，我地經過呢間追分だんご本舗，然後買左d日式糰子賞櫻食。地址：東京都新宿區新宿3-1-22 我地就係新宿御苑度食日式糰子啦。 我地買左四款唔同的糰子，佢地都係用糯米整成的小丸子黎架。最左面個條糰子的面頭鋪左豆沙蓉。隔離紅白綠三隻色的係花見糰子，正正適合我地而家觀賞櫻花的時候食架！再隔離係卷左紫菜的醬油糰子，又甜又咸咁，好好味呀。最後係鋪左d白色豆沙蓉的糰子。4條總共係688円。 食完日式菓子，我地就搵到應該係13號的櫻花啦。 呢款的櫻花係粉紅色的。 呢個時候突然好大風，d櫻花散落一地，係櫻吹雪的美景呀。 又比我地遇到16號的櫻花，我正式宣布佢係我覺得最靚的櫻花！ 湖邊景＋櫻花，真係好靚呀。 呢棵櫻花樹好矮呀。 影埋呢張櫻花相，我地就閃啦。=========================之後我地就去左澀谷，去左地鐵站連住的Mark City商場搵野食，Mark City的四樓有間好出名抵食的壽司店 - 梅丘寿司の美登利，但係超多人等位！！！我地係門口部機拎左157號飛，當時只係叫到87號！由於我地好肚餓，所以果斷放棄食美登利。最後發現呢個決定係正確的，因為我地食完野都只係叫到120號炸。 最後我地就揀左間日式西餐 - つばめグリル (Tsubame Grill)。地址：東京都渋谷区道玄坂1-12-3 渋谷マークシティ レストランアベニュー 4F 日式餐廳都係興一坐低就比杯凍水你飲。 男友叫左支可樂，400円。 蒜蓉包多士，370円一碟。 我叫左和風漢堡扒，1380円。 男友叫左呢間店最出名的菜式 - つばめ漢堡扒，1320円，つばめ係店名黎架，個漢堡扒係用個錫紙包住架，好搞笑，仲有舊薯仔係錫紙隔離架。 打開左係咁嘅樣，比我碟和風漢堡扒頹喎。 男友嘗試用叉吉開個錫紙！連稅總共食左4147円。 澀谷好出名的全向十字路口，係Mark City商場可以離遠睇得好清楚人潮係四面八方過馬路的情況呀！ 我地緊係要落去行下呢條咁出名的全向十字路口啦。 澀谷的街頭遇到好多免費派野飲的promo呀，行左一陣澀谷109 & 百貨公司，就拎左支Wonda的奶茶＆Monster的能量飲品啦。 行行下仲比我地遇到真人版Mario Kart添，d人全部都著住卡通服飾係馬路揸卡丁車，如果你有興趣玩可以上去Street Kart的官網睇下，但由於佢地俾任天堂告，所以佢地而家已經無Mario角色的服飾提供架啦。 之後我地特登黎到Luke's Lobster食龍蝦多士，佢係一間來自美國紐約的小食店，我地之前係大阪都食過一次，覺得好正，所以今次黎東京都要返尋味呀。地址：東京都 渋谷区 神南 1-15-5 1F 超多龍蝦肉，好正呀。 之後我就去左呢間世界で２番めにおいしいメロンパンアイス，中文意思係世界第二好食嘅即叫即焗雪糕菠蘿包，地址：東京都渋谷区神南1-15-9 岩瀬ビル 熱辣辣岩岩焗完的菠蘿包中間夾住冰凍的雪糕，真係好夾呀。=========================我地番酒店休息一陣，夜晚就去左秋葉原食吉列牛。可能我地對秋葉原的興趣不大，所以一張秋葉原的相都無影到。秋葉原除左有電腦產品賣之外，仲有好多女僕Cafe添。 Photo from Google Map我地就黎左朋友介紹嘅呢間牛かつ 壱弐参食吉列牛，當日係星期六晚，我地8點開始排隊，排左一個鐘多d先入到去，餓扁我地啦！地址：東京都 千代田区 外神田 3-8-17 渡辺ビル B1F 我叫左杯Highball (Whisky + Soda)，300円。 男友叫左杯啤酒，500円。 吉列牛有3種肉的份量選擇，分別係single、double、triple size，仲可以揀有山藥蓉定係無山藥蓉，山藥蓉係加落白飯度食，而白飯係任添架。 我地最後係揀左double size＆無山藥蓉，2100円。除左有外脆內生的吉列牛外，有椰菜絲、一球薯仔沙律、一 pat Wasabi、麵豉湯、白飯、醬汁。旁邊仲有鹽可以加添。 d 吉列牛放係鐵板上面，燒一陣熟熟地就足夠啦，塊吉列牛入口有少少溶化的感覺，好正！！我地試過將塊吉列牛加鹽係好好食，加醬油碟中間黃色的醬汁又係好好食，加醬油碟最右個格豉油＆Wasabi都係好食的。 間店好細，座位唔多，唔怪得之要排成個鐘啦，不過係值得嘅！！以上所有價錢都已經連稅，一d都唔貴呀。旅遊日期：2018年4月12日- 2018年4月17日 =========================覺得呢篇blog幫到你，記得like Facebook Page https://www.facebook.com/fatbjai.travel/follow Instagram: fabjai.tavelhttps://www.instagram.com/fatbjai.travel/收到個blog的最新update！=========================《去東京玩》Day1 (超特別牛肉生日蛋糕,VR Zone玩Mario Kart,逃出人體實驗室)Day2 (築地食大和壽司,六本木睇東京鐵塔,Red Rock,Gram Pancake)Day3 (在新宿御苑抓住櫻花的尾巴,澀谷,秋葉原超正吉列牛)Day4 (淺草和服體驗,上野阿美橫丁,銀座沾麵)Day5 (富士急樂園FUJI-Q Highland,新宿雞肉火鍋推薦)Day6 (淺草附近超正鰻魚飯推介 - 鰻禅)住宿篇 (東新宿,Hotel Sunroute Higashi Shinjuku)
