今日會check out呢間Mercure Maldives Kooddoo Resort番香港了， 我地今晚會搭7:10pm的內陸機去馬累機場， 然後搭國泰飛番香港， 內陸機boarding的時間係6:40pm， 但係間水上屋12點就要check out啦， 呢6個半鐘有咩好做呢？ Check out左之後我地就去左Vistas食午餐。 今朝我地係水上屋下面個海把握最後機會玩水，(水上屋review) 沖完涼之後我地都懶得set頭， 所以我地個樣都好頹。 我的前菜係Mushroom Arancini， 係蘑菇意大利飯波伴蕃茄醬。 男友的前菜係Mexican Nachos， 粟米脆片配芝士、莎莎醬、墨西哥辣椒、酸忌廉等等。 我的主菜係Black Pepper Beef， 牛肉炒烏冬配燈籠椒等。 男友的主菜係Caprese， 係蕃茄＋水牛芝士放係塊包上面焗，面頭再加左d羅勒醬， 仲有碟薯條。 (想知我地呢4日3夜仲食左d乜，睇呢篇blog) 食完野我地就問餐廳職員借左Uno ＆ 層層疊， 上左餐廳的上層玩。 呢度有好多位比人hea。 仲有桌球台比人篤波。 呢間餐廳真係幾岩用黎hea呀。 hea完我地就去左Water Sports中心借左立式槳板運動Stand Up Paddle Board, SUP玩， 係免費借黎玩架， (呢篇blog詳細介紹有咩免費＆收費的水上運動玩) 玩法係跪/企係塊槳板上面， 然後用支槳去推動塊槳板。 玩完SUP， 就去左Resort中央的泳池玩下水。 我唔想再沖涼就費時落水啦， 係泳池邊浸下腳就算。 之後我地去reception問下有無地方沖番個涼， 然之後職員就比左"Owner's Villa"的房卡我地， 之前一直以為"Owner's Villa"係比resort的owner住嘅， 去到其實有幾間房， 但只開放左一間大房比check out的旅客share黎用， 個廳有d座位比旅客係度hea下執下喼， 個沖涼房有3-4格比旅客沖涼。 由於間房有其他2對情侶， 所以我無影到入面的環境啦。 之後仲有2個鐘左右的時間剩， 我地就去左做Spa啦， 價錢係USD$110 一個人，仲要加10%服務費＆12%稅， 加加埋埋USD$135.52 一個人， 按完成身舒舒服服咁搭飛機離開resort啦。 Kooddoo島的Kooddoo Airport Maldives機場就係Resort的隔離， 個機場非常之細， 一間房係security check， 另一間房就已經係登樓閘口啦。 我地會搭馬爾代夫國家航空(Maldivian)由Kooddoo Island去Male。 話說我地班機係7:10pm起飛， 預計8:35pm到達馬累， 但我地係登機閘口等到花兒都謝了都未上機， 最後等到8:50pm班機先至起飛， 大約9:50pm到達馬累機場。 好彩我地馬累飛香港個程係12:10am先飛姐， 唔係就趕唔切班機啦。========================= 到達馬累之後仲有成2個鐘先飛番香港， 於是我地就去馬爾代夫的環亞機場貴賓室啦， 佢叫做Wellness Lounge by Plaza Premium， 係機場的出面的。 (可惜我見環亞的官網已經無左呢個lounge) 當時已經係10:07pm， 但係個lounge 10:30pm就收工， 而我又好想沖個涼先飛， 好好彩d職員都好nice， 立即安排沖涼房比我沖個靚涼。 係我沖涼的時候， 男友就影下個lounge的環境。 個lounge唔算好大。 呢度疑似有兩張黑色的按摩凳， 唔通有按摩服務？ 機場的出面有個food court， 我地就諗住食d野先啦。 最後揀左Burger King。 我地叫左Double Cheeseburger餐，USD$12， 同埋散叫Fish & Crisp呢個包，USD$6。=========================10:55pm我地終於入機場check in＆寄存行李啦， 我地搭國泰來回馬累， 機入面九成的乘客都係中國大陸人， 香港人我諗10隻手指都數得曬。 唔知係咪因為馬累機場的國泰counter好少serve香港人， 我用BNO check in的時候又遇到以下情況： 地勤：你係咪香港居民? 我：係呀。 地勤：麻煩出示身分證。 我唯有係袋度拎番張身份證出黎比佢睇下啦。 11:00pm入到黎機場禁區啦， 機場好多化妝品、香水個d野賣， 我地就主攻d紀念品＆馬爾代夫的零食， 但機場的野係超級貴， 一包薯片仔都要USD$10， 一盒勁輕的開心果都要USD$10， 完全買唔落手， 而d紀念品都係貴到離譜， 完全係東南亞d街邊檔的質素&款式， 但賣USD$10。 最後見到d斯里蘭卡的茶包幾平， (馬爾代夫同斯里蘭卡的距離幾近) 就買左5盒茶包啦。 買左d特別味道的茶包番工飲， Basilur的Cinnamon茶，USD$5，鍾意肉桂味的人會覺得好正。 Basilur的Moringa茶，USD$5，Moringa的中文係辣木，同個名一樣飲落去有股辛辣的味道再帶點茶香。 Tealia的Dark Chocolate Almond茶，USD$6，味道好似咁朱古力咁，但帶點茶味，我覺得岩d想飲朱古力但又怕肥的人。 Battler的Orange Pekoe，USD$3，Orange Pekoe中文係橙黃白毫，係紅茶的等級黎，而茶葉其實同橙係無關係，只係以前荷蘭商人為左特顯茶葉的品質同高貴感覺，所以係個名度加個橙上去。 Battler的Jasmine Green Tea，USD$3，茉莉花茶，即係茶樓飲開的香片。 禁區都有Burger King， 但比機場出面個間貴， 例如Fish & Crisp個包比出面貴左USD$1。 話說原本班機12:10am起飛， 之後delay左半個鐘， 最後等到12:48am先至上到機。 - 上到機後坐左好耐，到1:30am都未起飛， 然後機師先至廣播話由於馬累機場每晚1:30am例行維修， 機場死都唔比我地架機飛走， 要等到早上6:00am先可以再飛！ 我地心諗：唔__係掛， 機上的中國大陸人比我地更加之憤怒， (事關佢地仲要係香港轉機，呢班機delay就會miss左下班機啦) 佢地呢個時候就係咁問空姐有無delay證明比佢地claim保險， 有d人就打電話比親友去幫佢地買張最快番到大陸的機。 而我地就乜都做唔到， 唯有等空姐安排落機。 其實等落機都搞足半個鐘有多， 事關係分批的方式落機， 當我地行到出口附近， 空姐就叫我地坐下先，未落得機住， 於是我地就坐係附近的none of our business class， 玩下business class d機關， 平訓咁坐又真係好舒服。 當時我地未搭過J class， 所以都覺得好新奇。 (估唔到一年之後我地就搭J class去悉尼啦) 落番機都2:45am左右， 3:00am地勤人員派左d野食野飲， 然後我地就訓陣， 大約5點幾就再登機啦。 上到機個機師就話架機要飛去曼谷先， 因為班crew飛去香港就會過左工作時數， 所以要飛去曼谷轉另一班crew， 去到曼谷乘客只需要留係機上，唔洗落機。 - 原本班機：馬累12:10pm -> 香港9:25am， 而家改成：馬累6:00am -> 曼谷12:10pm；曼谷1:10pm -> 香港4:50pm。 (時間對應所在地的時間) 足足遲左7.5個鐘先番到香港！ 係6點就起飛的時候， 機師話有乘客不適要落機， 要等埋佢行李落機先飛得。 3個字之後， 機師又話有乘客決定唔搭呢班機， 又要等佢d行李落機， 真係delay no more！！！！ 最後大約6:45am，架機都終於都起飛啦。 原本係晚餐黎， 而家變左一大清早食！ 我叫左雜菜燴牛肉、烤薯仔， 有希臘沙律食。 男友叫左香菇燴雞柳飯。 中長途機所以有Movenpick食。 12:25pm降落曼谷機場， 然後換新的crew上機， 1:40pm左右終於再次起飛。 唯一的好處係遊機河＆多左一餐飛機餐食。 唔記得自己叫左咩餐啦。 曼谷去香港係短途機， 所以係食哈根大師雪糕。 最後最後，其實成5:20pm先降落到香港！ 總共係浪費左人生的8個小時！！！ 見到d大陸旅客仲要轉機，就覺得慘啦....... 大家可以睇埋個vlog呀！ 旅遊日期：2018年2月22日- 2018年2月27日 ========================= 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram: fabjai.tavel https://www.instagram.com/fatbjai.travel/ 收到個blog的最新update！ =========================《去馬爾代夫嘆》 Day1 (搭國泰去馬爾代夫,首都馬累Unima Grand酒店) Day2 (搭馬爾代夫航空內陸機去Kooddoo Island) Resort篇 (水上屋大解構,Mercure Maldives Kooddoo Resort) Resort篇 (係Resort小島上Full board有咩食 - Mercure Maldives Kooddoo Resort) Resort篇 (黎馬爾代夫有咩玩？- Mercure Maldives Kooddoo Resort) 馬累機場delay8小時番香港 直航變曼谷轉機遭遇
