上篇講到我地搭夜機去馬爾代夫， 係馬爾代夫的首都 - 馬累住左一晚， 想睇馬累間酒店的review睇呢篇blog啦。 我地第二日的朝早搭番渡船去機場個島， 然後坐內陸機去呢3晚住的Mercure Maldives Kooddoo Resort。 超藍的大海呀， 終於感覺到自己係黎左馬爾代夫。 落左船，就有的Mercure職員帶我地去Domestic terminal(國內線航廈)辦登記手續。 內陸機的check in櫃台非常細， 主要都係馬爾代夫國家航空(Maldivian)的航班。 我地會搭馬爾代夫國家航空由Male去Kooddoo Island， 預計11:15am起飛。 當時係9:45am，時間尚早， Mercure職員就帶左我地去馬爾代夫國家航空的貴賓室Moonimaa Lounge。 野食種類唔算多， 呢個lounge都係for人等上機， 會有廣播咩航班要準備登機。 值得一提間lounge有12款Dilmah茶包飲。 我就試下Dilmah比較少見的English Afternoon同埋Vanilla先。 馬爾代夫航空的內陸機都好細部。 11:20am我地終於上機啦， 第一次搭咁細部的飛機。 呢架機係兩排二人的座位。 機型係Dash-8 300。 上到半空後，空少會派濕紙巾比我地。 呢程機的景真係好靚， 可以係高空睇到馬爾代夫的小島。 不過架機經過歲月的摧殘， d窗其實都好花， 好彩影出黎的相都唔會花。 仲可以睇到呢種環礁， 即係由珊瑚礁形成的環狀島嶼。 對眼完全離唔開窗， 因為好驚錯過左好靚的島。 另外，我地第一次搭用渦輪螺旋槳發動機的飛機, 有個螺旋槳係機翼度撥下撥下咁架。 (現實中係轉得好快，但電話影到好慢) 架機首先會飛去Kadhdhoo島， 呢個站的乘客就會落機。 我地去Kooddoo島所以會留係架機度，而呢個Kadhdhoo島亦都會有其他乘客上機架。 跟住架機會飛去我地嘅目的地Kooddoo島， 我地落機的時候，見到仲有乘客留係架機度， 之後係機場都見到有乘客上緊呢架機， 就好似巴士咁每站都有人上落機！ (第一次搭呢種好似空中巴士的航線呀！) Kadhdhoo島落左一半乘客， 當時有個強國大媽私自調去其他位， 然後比空姐阻止左， 因為呢個機場有其他乘客上機架。 1:20pm，我地到達Kooddoo Airport Maldives Kooddoo島的機場， 總共坐左2個鐘的機呀。 今日的天氣好好呀， 急不及待去check in我地的resort！ 下篇blog會詳細介紹我地住左3晚的Mercure Maldives Kooddoo Resort， 敬請期待！ 旅遊日期：2018年2月22日- 2018年2月27日 ========================= 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram: fabjai.tavel https://www.instagram.com/fatbjai.travel/ 收到個blog的最新update！ ========================= 《去馬爾代夫嘆》 Day1 (搭國泰去馬爾代夫,首都馬累Unima Grand酒店) Day2 (搭馬爾代夫航空內陸機去Kooddoo Island) Resort篇 (水上屋大解構,Mercure Maldives Kooddoo Resort) Resort篇 (係Resort小島上Full board有咩食 - Mercure Maldives Kooddoo Resort) Resort篇 (黎馬爾代夫有咩玩？- Mercure Maldives Kooddoo Resort) 馬累機場delay8小時番香港 直航變曼谷轉機遭遇
