～今日的行程～ 1月3日：早：Manoffin Express -> 西花韓服 -> 景福宮 -> 午：土俗村蔘雞湯 -> Sam Studio影CV相 -> 首爾仁川機場 -> 晚：Korean Air Lounge (KAL Lounge) -> 晚：LOTTERIA -> 搭國泰航空返香港今日係我地係首爾的最後一日啦， 我地晨早就會起身去景福宮著韓服， 之後就會去影韓式的證件相！ 我地搭地鐵到景福宮站， 當時係9點鐘， 就係呢間Manoffin Express買早餐食啦。 買左個Cream Cheese Bun食，₩2200。 食完野我就去西花韓服， 我地係Kkday book左佢地的景福宮韓服租借體驗， 當時book左6小時的韓服體驗，價錢係HKD$129。 提提大家星期二景福宮係休息架， 唔好好似我地咁book錯星期二啦。 我地琴日黎到先知景福宮唔開， 所以改左今日黎著韓服。 我地係西花韓服入面都無影d咩相， 因為呢度實在好多人， 而且都忙住揀韓服、配搭、頭飾、小手袋等等， 我最後揀左粉橙色＋白色＋金色的韓服， 而男友揀左藍色＋白色＋金色的韓服 (景福宮入面會有佢的相)。另外，西花韓服的店員都係台灣人， 所以溝通都無乜問題！ 仲有，呢度係無set頭服務架， 但有捲髮棒提供， 可以自助set頭。 西花韓服同景福宮的距離非常之近， 過條馬路就到啦。景福宮入場費係₩3000，著韓服係免費入場架。 景福宮係1394年建成， 大朝鮮國的第一座＆規模最大的宮殿， 光化門就係景福宮的正門啦。 當時係10點幾，咁岩遇到景福宮門將換崗儀式。 原來一日總共有6次儀式＆訓練的表演架： 景福宮門將換崗儀式：10:00am / 2:00pm（每日2次，每次約20分鐘） 光化門門將把守儀式：11:00am / 1:00pm（每日2次，每次約10分鐘） 守門軍公開訓練：9:35am / 1:35pm（每日2次，每次約15分鐘） 景福宮的地圖， 其實都唔係話好大。 勤政門。 勤政門的左面係維和門， 呢個位無咩遊客， 所以好適合影相呀。 穿過左勤政門之後， 就係勤政殿。(著左韓服的男友終於出場) 勤政殿係舉行儀式＆宴會的宮殿黎。 勤政殿的後面無咩遊客， 又係好適合影相呀。 然後我地又搵下d無咩遊客的側門影下相， 著到咁靚緊係要黎美成門影張相啦。 唔好見我地影得咁開心， 其實當時係零度左右， 我當時著平底鞋，腳板係凍到好似冰咁。 終於頂唔順隻腳好似凍條咁凍， 就黎左韓國國立民俗博物館National Folk Museum of Korea度取暖， 順便參觀下個博物館。 我地只係係地下個層行下， 等對腳慢慢變暖。 係韓國古代的風箏。 臨離開博物館， 係cafe度買番杯暖暖的熱飲先。 另外，無乜人會著韓服入黎博物館參觀 (因為去哂影相XD)， 搞到我地好突出咁。 買左杯熱的Honey Ginger，₩4000， 拎住係出面飲。 取完暖就影下相啦， 係咪好有宮廷的韓劇feel呢？ 呢個廷暉門的非常矮， 生得高大的人可能要烏低身先入到去。 思政殿係朝鮮君王平日同臣子議政＆商討國事的主要殿閣。 景福宮都好多少遊客影相的位置。 景福宮的遊客不算多， 可能係因為我地早上黎的原因啦。 興禮門。 景福宮到此一遊完啦。========================= 行完景福宮， 我地唔去換衫住， 而係著住韓服黎呢間土俗村蔘雞湯(토속촌 삼계탕)食個午餐先。 地址：首爾特別市鍾路區紫霞門路5街5 (體府洞) 韓文 地址：서울특별시 종로구 자하문로5길 5 (체부동) 男友叫左 左手面的土俗村參雞湯，₩16,000， 我就叫左 右手面的土俗村山參養殖根參雞湯，₩22,000。 後面就寫左人參雞湯的食法啦。 呢度要除鞋坐係地下度食， 冬天著咁多衫，烏低身除鞋都幾麻煩架。 著住韓服食野都幾特別， 諗起我地係清水寺著浴衣食鰻魚飯， 但大家小心食唔好整污糟件衫呀。 男友的土俗村參雞湯。 我的土俗村山參養殖根參雞湯簡直同男友個鍋一模一樣。 原來d山參養殖根係另外上架， 呢樽野盛惠₩6000，當時價值約HKD$45。 仲有一小杯人參酒比你飲添。 d雞入面釀左d飯、人參等等的食材， 食完好滿足、好飽暖。食完野我地就番去西花韓服度換番衫啦。下篇blog我地book左影樓影CV相， 同埋係首爾機場退稅＆去Lounge食野！旅遊日期：2017年12月30日- 2018年1月3日 ========================= 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram: fabjai.tavel https://www.instagram.com/fatbjai.travel/ 收到個blog的最新update！ =========================《去首爾玩》 Day1 (南山谷韓屋村,韓國必買零食,橋村炸雞,平壤麵屋) Day2 (建大Common Ground,梨大火飯,馬場洞食韓牛,樂天世界塔倒數) Day3 (江村鐵道單車,南怡島,陳玉華一隻雞) Day4 (汝矣島I SEOUL U打卡地標,明洞行街,韓牛) Day5a (景福宮韓服體驗,土俗村蔘雞湯) Day5b (去影樓影韓式CV相,首爾機場退稅步驟) 酒店篇 (東大門,KY-Heritage Hotel Dongdaemun)
