想睇番西歐五國星馬畢業遊的行程，請睇行程篇 (27日景點行程分享,機票資料) ～今日的行程～ 5月25日：搭火車去佛羅倫斯 Florence -> The Mall Outlet行街 -> 午：Gucci Caffè -> 新聖母大殿Basilica of Santa Maria Novella -> 四百幾年歷史的Santa Maria Novella藥房 -> 聖母百花大教堂Cathedral of Saint Mary of the Flower -> 聖十字聖殿 Basilica of the Holy Cross -> 領主廣場 Piazza della Signoria -> 老橋 Ponte Vecchio -> 晚：Trattoria I'Raddi (T-bone牛排) 我地朝早係酒店食完個早餐＆check out就出發去佛羅倫斯！ 首先由Termini搭地鐵去Tiburtina站，Roma Tiburtina火車站就係隔離啦， 我地會由Roma Tiburtina火車站搭8:55am的火車去Florence Santa Maria Novella火車站落車，預計10:17am到達。 根據個mon我地班火車係6號月台(BIN)，而且會delay 10分鐘(RIT)！ 9:03am，架火車都仲未黎。 意大利跨城市的火車係有兩間營運公司， 分別係意大利國鐵 Trenitalia (圖中白色個架)、由前法拉利主席開的Italo。 大家買意大利跨城市的火車飛都記得要上哂兩個網去格價！ 9:05am Italo火車終於駛入黎啦， Italo架火車外表係比Trenitalia型好多， 車身仲要係紅色，真係好有法拉利的型格風。 Italo係2012年的4月正式營運， 所以Italo的車都比Trenitalia新。 座位前面有插蘇比人差notebook用。 Italo有4種車飛，分別係Smart、Comfort、Prima、Club Executive，有咩分別詳細可以睇呢度。 我地本身想揀最平的Smart，但想要的時間已經賣哂， 所以唯有買Comfort，座位比Smart大D，價錢每人係€19.9。 我地落左火車之後就去今晚住的民宿Home Boutique Santa Maria Novella度check in啦， 虛線就係民宿的大概位置啦， 之後的Blog再詳細介紹下啦。 我地第一個景點就係去佛羅倫斯好出名的The Mall outlet 濕平啦， The Mall係佛羅倫斯近郊的地方， 所以要搭direct bus去架， 個車站就係Florence S. M. N.火車站同民宿之間啦， 車費來回每人要€13。 一個鐘左右的車程就黎到The Mall outlet 啦。 同英國的Bicester Village相比， The Mall有的品牌少好多，當時只有19間。 呢度的店鋪都好大間，每間的距離都相隔一條街。 Gucci係最受歡迎，要排隊等一陣先可以入去行呀。 我地行完Gucci都已經3點3， 但我地連lunch都未食(今朝酒店的早餐食得好夠飽)， 於是就係Gucci樓上的Gucci Caffè 食個Lunch/Tea 啦 ， (The Mall好似剩係得一兩間餐廳咁大把) 地址：Via Europa 15/17 | The Mall Luxury Outlet, 50066 Leccio, Reggello, Italy。 餐牌， 雖然Gucci D手袋好貴，但D野食都同Starbuck差唔多姐。 最大個碟一粒粒的係珍珠麵Fregola €12， 格離個個三文治 €5， 左上個個朱古力撻€3.5， 我地仲叫左杯Cappuccino(意大利泡沫咖啡) €1.6， 總共食左€22.1。 話說男朋友叫Cappuccino的時候， 侍應覺得驚訝地問：Cappuccino？ 男友答Yes，然後侍應就同其他同事講野，句句都提及Cappuccino！ 男友覺得奇怪於是google一下， 原來意大利人只會係早餐飲cappuccino，其餘時間都唔會飲有奶的咖啡架！ 等我地分享下係The Mall買左D乜啦。 係Tom Ford買左支迷你版的唇膏， Boys & Girls的系列的19號色James，€29。 官網的相的顏色似暗色D的珊瑚色。 現實搽出黎係偏橙色。 係Saint Laurent買左個卡片套€95， 中間隱約有個YSL的logo。 用左一年都比我塞到漲漲地。 男友係Gucci買左個銀包€160， 用左一年都仲好光滑。 大家仲記唔記得我Day4係英國的Bicester Village買左副Gucci的太陽眼鏡， 但Day6係羅浮宮被人偷左， 於是黎到意大利又買番對Gucci的太陽眼鏡 €145， 價錢係比Bicester Village貴接近HKD$400，但呢個款就型D。 以上係我之後係五漁村＆瑞士戴副眼鏡影的相。 係意大利大部分的鋪頭要買夠€155先可以退稅， 我地係Gucci總共買左€305，所以可以退稅啦， The Mall呢間Gucci的退稅公司係Global Blue， 要係歐洲最後一站先可以辦理退稅， 我地當時6月2號係瑞士蘇黎世機場退稅， 揀左退錢去信用卡。 最後係6月5號信用卡就收到退稅的款項，退到HKD$306.71。 我地剩係買左4樣野就走啦， 總括一下，發現The Mall比Bicester Village無咁吸引， 1. The Mall較細，牌子數目少D，主要都係高級名牌 2. 相同的牌子，The Mall的價錢比Bicester Village貴 (e.g. Coach同一款袋Bicester Village平好多) 3. 意大利的退稅門檻高，要買夠€155先退到稅，而英國只係買夠£30就可退稅。(不過Gucci係Bicester Village要滿£100先退到稅，但門檻仍然比意大利低) 所以大家衝量下值唔值得花€13的車費去The Mall啦。 ========================= 搭番direct bus去佛羅倫斯的市區， 我地係酒店放低戰利品就行下呢個好有藝術感的佛羅倫斯啦。 我地首先黎到呢個新聖母大殿Basilica of Santa Maria Novella， 佢係1420年建成，係佛羅倫斯第一座大型的聖殿。 然後我地行到黎呢個世界上其中一間最古老的藥房， 間店名就係用新聖母大殿的名字 - Santa Maria Novella， 係1612年創立架，有四百多年的歷史。 一入間鋪頭的走廊，感覺似去左間博物館！ 佢地的產品聲稱使用最優質的天然成分， 而且D產品係係佛羅倫斯的北部約3公里的地方生產添。 我地都被呢度的裝潢吸引住，而唔係D產品。 每一個角落都好吸引我去影相呀。 除左香水、蠟燭、身體護理產品外，仲有食物、酒、茶、朱古力賣添。 之後我地就黎到聖母百花大教堂Cathedral of Saint Mary of the Flower， 佢係1436年建成，係屬於哥特式風格的建築， 係世界上第三大的教堂。 當時仲遇到一對新人結婚添！ (我地Day7係巴黎的聖心堂都遇過有人結婚！) 聖母百花大教堂係免費入場， 平時開10:00am - 4:30pm， 當時已經6點，所以間教堂就已經關左門啦。 我地唯有係外面欣賞下間教堂啦。 聖母百花大教堂係由主教座堂、聖若望洗禮堂，同埋喬托鐘樓組成的， 呢個咁高嘅就係喬托鐘樓Giotto's Campanile啦。 呢個就係聖若望洗禮堂Florence Baptistery啦。 我覺得聖母百花大教堂係我見過最靚最特別的教堂， 主要係用左粉紅色、綠色＆白色，三隻色夾埋好和諧。 然後我地四圍行下， 都發現到唔少特別的建築物。 可惜影完都無mark底呢個建築物係咩黎。 見到呢個好似酒店咁的建築， 原來係醫院黎 - Santa Maria Nuova Hospital。 行行發現呢個聖十字聖殿Basilica of the Holy Cross， 係1385年建成，係世界上最大的方濟各會Franciscans的聖殿。 今日睇左三間佛羅倫斯的教堂/聖殿，發現佢地的style都好相近。 之後行到黎領主廣場Piazza della Signoria， 呢度放左好多雕像！ 原本我地諗住去學院美術館Galleria dell'Accademia睇大衛像， 但係已經6-7點，太晏已經收左， 我地行下行下係呢個領主廣場發現到另一個大衛像， 但呢個只係大衛像的複製品， 見到個假的大衛像都好過無啦。 我地無仔細研究每一個雕像就離開啦。 我地行到黎老橋Ponte Vecchio， 呢條阿諾河Arno上有好幾條橋架， 我地就企係老橋度望住天主聖三橋St Trinity Bridge啦。 老橋上見到有唔少的愛情鎖添。 老橋被認為係意大利現存最古老石造的封閉式拱形拱橋， 橋上有好多珠寶店&手信店的鋪頭(當時7點半都關哂鋪)， 原來條橋最初起的時候D鋪頭都係賣肉類的。 係河邊望番老橋的景。 我係天主聖三橋上背景係卡瑞拉橋Ponte Alla Carraia。 我地民宿的host推薦我地黎卡瑞拉橋格離食呢間Gelateria La Carraia的gelato， 佢有好多唔同口味，雪糕口味可以睇呢個網址， 地址:Piazza Nazario Sauro 25, 50124, Florence, Italy。 我地揀左朱古力、開心果&椰子味 €3.5。 食完雪糕我地就行去民宿的host推薦食T-bone牛排的餐廳 - Trattoria I'Raddi， 網上好多人推薦去Trattoria Zà Zà食T-bone牛排， 但我地一於試下當地人的推薦啦， 地址：Via d'Ardiglione 47/R, 50124, Florence, Italy。 我地叫左杯紅酒Home red wine Rosso di Montalcino €12。 首先黎左碟餐前包。 Wi-Fi密碼勁遠睇唔到， 最後要用相機影完放大黎睇。 Starter係芝士波入面有鯷魚&茄子。 主菜有芝士意大利飯 Risotto with fresh artichokes and cubes of fried pecorino cheese €12 主角T-bone出場啦， Grilled T-bone florentine steak with white piattellino beans €45/kg 個T-bone會伴埋呢種叫piattellino的豆。 自從男友lunch叫左杯Cappuccino被當怪人之後， 我地就留意番意大利人的飲咖啡文化。 原來意大利人晚餐食完飯都會叫杯Espresso(特濃咖啡)， 於是我地食完晚餐都叫番杯Espresso體驗下 €1.5， 我總係覺得Espresso係朝早飲黎提神，估唔到意大利人夜晚會飲。 而且唔講唔知， 原來意大利一直都無Starbucks！ 直至2018年的9月，Starbucks先至係米蘭開意大利第一間的分店！(新聞連結) 我地飲完咖啡就閃，然後行番民宿啦， 間餐廳會收€2的Cover Charge開枱費， 總共食左€84。 旅遊日期：2017年5月14日- 6月10日 ========================= 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram https://www.instagram.com/fatbjai.travel/ 收到個blog的最新update！ ========================= 《西歐五國星馬畢業遊》 行程篇 (27日景點行程分享,機票資料) Day1 (出發去倫敦,維也納轉機驚魂事件,奧地利航空) 酒店篇 (英國倫敦Paddington,Castleton Hotel) Day2 (白金漢宮,西敏寺,大笨鐘,Oxford Street,Fish＆Chips,柏靈頓) 酒店篇 (英國倫敦,Conrad London St. James) Day3 (大英博物館,倫敦塔橋,Harrods,Burger&Lobster,Nandos) Day4 (Bicester Village戰利品分享,itsu英式日本快餐,Five Guys) Day5a (英國巨石陣Stonehenge,世界文化遺產) Day5b (九又四分之三月台,倫敦最好食的葡撻,印度菜) 酒店篇 (英國倫敦King's Cross,Crestfield Hotel) Day6 (倫敦去巴黎,羅浮宮,巴黎聖母院,愛情鎖橋) Day7 (凱旋門,聖心堂,香榭大道,巴黎鐵塔下睇夜景) Day8 (Palace of Versailles,係凡爾賽宮嘆下午茶) 酒店篇 (法國巴黎,Hotel R de Paris) Day9 (《Inception》電影拍攝場地－比爾阿克姆橋) 酒店篇 (睇到巴黎鐵塔的酒店Hôtel La Comtesse) Day10 (巴黎鐵塔,聖路易島的雪糕,Ryanair飛羅馬) 酒店篇 (羅馬Ciampino機場,Hotel Palacavicchi) Day11a (搭火車黑仔事件,梵蒂岡,羅馬許願池,萬神殿) Day11b (羅馬鬥獸場,古羅馬廣場,GROM雪糕) 酒店篇 (羅馬,Hotel Nord Nuova Roma) Day12 (佛羅倫斯,The Mall,聖母百花大教堂,領主廣場,T-bone牛排) Day13 (佛羅倫斯周邊打卡勝地：比薩斜塔＆五漁村) 酒店篇 (佛羅倫斯民宿推介,Home Boutique Santa Maria Novella) Day14 (威尼斯,彩色島,聖馬可廣場) 酒店篇 (威尼斯,Ca' Pagan Guest House) Day15 (威尼斯不愉快事件,米蘭曲折之旅,米蘭大教堂,艾曼紐二世迴廊) 酒店篇 (米蘭,Hilton Milan) Day16 (米蘭去瑞士Grindelwald,瑞士火車pass要點揀?Domodossola退稅分享) 酒店篇 (瑞士山區Grindelwald,望到阿爾卑斯山的Hotel Lauberhorn) Day17 (玩轉瑞士少女峰！原來有咁多野好玩！) Day18 (瑞士Grindelwald玩刺激活動/行山的聖地 - 佛斯特 First) Day19 (瑞士Grindelwald享受一日慢活) Day20a (瑞士琉森,卡佩爾木橋,垂死獅子像,蘇黎世) Day20b (蘇黎世機場退稅,瑞士航空,Aspire Lounge)
