想睇番西歐五國星馬畢業遊的行程，請睇行程篇 (27日景點行程分享,機票資料) ～今日的行程～ 5月20日：聖心堂 Sacré-Cœur -> 凱旋門Arc de Triomphe -> 香榭麗舍大道 Avenue des Champs-Élysées -> 午：Paul -> 春天百貨 Printemps & 老佛爺百貨 Lafayette ->下午茶：Casse-Noisette -> 晚：Pho 14 -> 巴黎鐵塔 Eiffel Tower 睇夜景 8:30am我地就起身係酒店度食早餐， 然後我地就出發啦！ 我地搭地鐵去Anvers站， 出站後沿住一條賣手信、紀念品的小巷， 就會行到黎聖心堂 Sacré-Cœur下的Square Louise Michel公園啦！ 呢個公園好多手繩黨， 佢地會好友善地過黎同你傾計， 然後就會掛條解唔開的手繩係你的手腕上， 跟著就會問你比錢！ 所以大家離遠見到手拎住一堆手繩的人就要行遠D啦！ 聖心堂位於山上面， 所以都要行一段樓梯先上到去呀！ 另外呢度好多黑人係度賣記念品、手袋。 聖心堂係1914年建造而成， 建造的原因係為左對激進的巴黎公社(Paris Commune)的暴行贖罪。 另外，由呢度上去看台的轉彎位有好臭的尿味， 大家可以係公園呢度深呼吸再跑上去。 上到黎看台的位置了， 幫男友影番張Chok樣相。 呢度可以俯瞰巴黎的市景。 呢度有觀光小火車坐， 價錢唔平，35分鐘的旅程要€6.5， 大家有興趣可以去呢個網站度book定。 咁岩遇到一對結婚的新人搭觀光小火車。 觀光小火車有好幾卡架。 我地準備入去聖心堂參觀！ 聖心堂係免費入場，無休息日， 開放時間係早上6點至晚上10點半 (官網按我) 呢種彩色的玻璃窗叫做花窗玻璃， 係教堂好常見的裝飾。 莊嚴神聖的氣氛。 聖心堂的模型， 白色帶來一種聖潔的感覺。 其實係入面都影左好多相， 篇幅有限只係同大家分享幾張相。 ========================= 之後我地就去左凱旋門Arc de Triomphe， 凱旋門係1836年建成， 係拿破崙為紀念1805年法國打敗俄奧聯軍而興建的。 凱旋門前面的繁忙的大馬路中， 咁岩有個馬路分隔位， 遊客都會行入去影相。 凱旋門前面跳一跳。 發現凱旋門側面影過去都幾靚， 而且係無咩人會係呢度影相。 凱旋門正面對住個條大路就係香榭麗舍大道 Avenue des Champs-Élysées， 呢條大街店鋪林立，名店為主， 但我竟然唔記得左為呢條咁出名的大街影張相， 可能因為佢同尖沙咀的廣東道差唔多啦。 估唔到係香榭大道逛的第一間店就有收穫啦！ 係Swarovski的頸鏈， 係玫瑰金的顏色，兩條鏈連成一條的頸鏈，€99。 法國要係同一間鋪消費超過€175.01先可以退稅架！ 所以呢係鏈就無得退稅啦。 上圖係條鏈戴上去的樣。 雖然條鏈望落去的設計好簡約， 但因為佢有兩條鏈的關係， 係勁易打kick， 旅行個陣想戴，真係解結解到人都燥呀！ 行左一陣，我地係香榭大道的一間Cafe Paul個度食個lunch啦， 地址：84 avenue des Champs Elysees, 75008 Paris, France， 呢間Paul係巴黎成日都見到架。 叫左杯朱古力 €5.2， 圓形個個係The Quiche Lorraine €4.8，係咸味的批，外層好酥脆。 Pizza Royale Slice €5.2，係法式的Pizza包。 西方人都特別鐘意坐室外， 我地都一於感受下坐室外啦 (其實咁岩室內係無座位)。 另外，香榭大道呢度勁多乞丐， 佢地會向排緊隊買野、食緊野、企係度的人乞錢， 係非常滋擾。 行左陣Sephora之後， 就見到對面馬路有間Laduree， 於是我地就過去買馬卡龍(Macaron)啦， 地址：75 avenue des Champs Elysees, 75008 Paris, France。 Laduree其實已經係2017年8月28日撤出左香港， 以後都要去外國先有機會食到啦。 除左外賣之外，呢度都有堂食架。 好多人排隊， 我諗排左>15分鐘先至買到！ 買左Blue Napoléon III gift box €29.5， Napoléon III係拿破崙三世咁解， 可以揀12粒Macaron。 當時有的口味～ 揀左12種唔同的口味， 想知而家有咩味揀去呢個網址睇啦。 其中一個揀左心型添！ 買完Macaron行多陣就番左酒店， 要放Macaron落雪櫃， 因為驚D Macaron唔可以係室溫放咁耐！ 男朋友有D感冒的徵狀，(因為係英國個陣凍親) 於是係酒店樓下間藥房買左盒傷風藥 €4.9， 都有D效用， 但旅行始終無乜休息， 去到馬來西亞個陣嚴重左要再買藥食。 ========================= 之後我地就去春天百貨 Printemps & 老佛爺百貨 Lafayette， 兩間百貨公司就係對方的隔離， 春天百貨地址：64, Boulevard Haussmann 75009 Paris 老佛爺百貨地址：40, Boulevard Haussmann 75009 Paris 老佛爺百貨的裡面好華麗！ 春天百貨。 行完兩間百貨公司， 完全無收穫 (因為未買得起D名牌haha) 原本想係度搵間甜品店食個cake， 但發現間甜品店D cake都賣得7788， 於是我地就放棄食cake啦。 ========================= 我地今晚諗住食Pho 14， 係被譽為全巴黎最好食的越南河粉！ 然後就約黎左巴黎旅行的大學同學去巴黎鐵塔睇夜景， 但時間尚早， 於是我地就沿住歌劇院大街Avenue de l'Opéra行過去Pho 14啦。 我地行行下見到棟好靚的建築物， 睇Google至知佢原來就係巴黎歌劇院 Palais Garnier， Btw，當時係晚上7點半， 西歐的夏天日照好長， 所以個天仲好光。 遠睇好似座皇宮咁靚！ 行行又見到呢間Pierre Hermé Paris， 呢個牌子其實香港都有， 但行過見到就忍唔住入去買Macaron啦 (明明今朝先買完！)。 有Signature 同埋 Infiniment 兩個系列的Macaron， Signature貴D €2.5， Infiniment就 €2.1， 我地買左兩粒Signature， 一粒Infiniment， 咩口味就唔記得左啦， 我地當時就立刻食左佢。 行多兩步就見到間甜品店Casse-Noisette， 我地就打算入去食件餅先！ 地址：35 avenue de l Opera, 75002 Paris, France 話說呢間店的Cashier非常高級， 有兩部機器負責收錢同埋出收據！ Closeup呢兩部機器。 叫左個紅莓撻Raspberry Vanilla Tart on a Palet Breton Base， 焦糖法式泡芙Decadent Caramel Éclair， 同埋一杯錫蘭紅茶，總共€15.4。 杯茶係用巴黎牌子Kusmi Tea的茶包， 係香榭麗舍大道都見到佢的專門店！ 我地上左樓上坐， 可以望到街外的景色。 之後我地見到間類似屈臣氏的鋪頭，叫做Monoprix， 我就買左支Caudalie的葡萄籽雪芭保濕面霜 €20.35， Caudalie的葡萄籽活性爽膚水(別名:皇后水) 30ml €9.95， Le Petit Marseillais的潤唇膏 €2.25 (好香幾潤)。 買完仲送左3包Sample添！ 買完野都8:50pm， 我地加快腳步去Pho 14食野！ 地址：Quartier Chinois 129 avenue de Choisy, 75013 Paris, France 大家知唔知其實越南曾經係法國的殖民地， 而呢間Pho 14亦都譽為全巴黎最好食的越南河粉！ 我地叫左兩杯好甜品feel的飲品。 我叫左碗牛肉河粉， 係唔錯架。 旁邊有一碟香料任你落。 男友叫左碗炸春卷撈檬， 個皮淋淋地，唔會好硬但又夠脆。 總共食左€30.8。 ========================= 食完Pho我地拿拿林去巴黎鐵塔下會合大學同學， 當時係10:08pm 個天都開始日落啦。 我地的合照， 異地Reu感覺好特別呀！ 巴黎鐵塔下真係好浪漫， 我地後日住的酒店係可以望到巴黎鐵塔， 十分期待呀。 另外，巴黎鐵塔日落後每個鐘頭開始會有5分鐘的燈光Show， 直至到1:00am就會完結， 夏天仲會延長到2:00am架！ ～Day7完～ ========================= 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram https://www.instagram.com/fatbjai.travel/ 收到個blog的最新update！ ========================= 《西歐五國星馬畢業遊》 行程篇 (27日景點行程分享,機票資料) Day1 (出發去倫敦,維也納轉機驚魂事件,奧地利航空) 酒店篇 (英國倫敦Paddington,Castleton Hotel) Day2 (白金漢宮,西敏寺,大笨鐘,Oxford Street,Fish＆Chips,柏靈頓) 酒店篇 (英國倫敦,Conrad London St. James) Day3 (大英博物館,倫敦塔橋,Harrods,Burger&Lobster,Nandos) Day4 (Bicester Village戰利品分享,itsu英式日本快餐,Five Guys) Day5a (英國巨石陣Stonehenge,世界文化遺產) Day5b (九又四分之三月台,倫敦最好食的葡撻,印度菜) 酒店篇 (英國倫敦King's Cross,Crestfield Hotel) Day6 (倫敦去巴黎,羅浮宮,巴黎聖母院,愛情鎖橋) Day7 (凱旋門,聖心堂,香榭大道,巴黎鐵塔下睇夜景) Day8 (Palace of Versailles,係凡爾賽宮嘆下午茶) 酒店篇 (法國巴黎,Hotel R de Paris) Day9 (《Inception》電影拍攝場地－比爾阿克姆橋) 酒店篇 (睇到巴黎鐵塔的酒店Hôtel La Comtesse) Day10 (巴黎鐵塔,聖路易島的雪糕,Ryanair飛羅馬) 酒店篇 (羅馬Ciampino機場,Hotel Palacavicchi) Day11a (搭火車黑仔事件,梵蒂岡,羅馬許願池,萬神殿) Day11b (羅馬鬥獸場,古羅馬廣場,GROM雪糕) 酒店篇 (羅馬,Hotel Nord Nuova Roma) Day12 (佛羅倫斯,The Mall,聖母百花大教堂,領主廣場,T-bone牛排) Day13 (佛羅倫斯周邊打卡勝地：比薩斜塔＆五漁村) 酒店篇 (佛羅倫斯民宿推介,Home Boutique Santa Maria Novella) Day14 (威尼斯,彩色島,聖馬可廣場) 酒店篇 (威尼斯,Ca' Pagan Guest House) Day15 (威尼斯不愉快事件,米蘭曲折之旅,米蘭大教堂,艾曼紐二世迴廊) 酒店篇 (米蘭,Hilton Milan) Day16 (米蘭去瑞士Grindelwald,瑞士火車pass要點揀?Domodossola退稅分享) 酒店篇 (瑞士山區Grindelwald,望到阿爾卑斯山的Hotel Lauberhorn) Day17 (玩轉瑞士少女峰！原來有咁多野好玩！) Day18 (瑞士Grindelwald玩刺激活動/行山的聖地 - 佛斯特 First) Day19 (瑞士Grindelwald享受一日慢活) Day20a (瑞士琉森,卡佩爾木橋,垂死獅子像,蘇黎世) Day20b (蘇黎世機場退稅,瑞士航空,Aspire Lounge)
