我地9月1號至9月6號去左布吉玩！ 1號11:50pm到布吉，6號搭4:05pm機番香港， 所以我地係布吉逗留5日5夜！ 我地第一次搭AirAsia， 去程買左一個人 20kg ($173)， 回程買左一個人 25kg ($230)， 我地兩個喼寄一係一個人的度。 我發現身邊的朋友都唔知廉航一個人可以寄多於一件行李， 如果大家買/帶的野唔多， 可以兩個人share 20kg/25kg， 咁就可以慳番一個人的行李費！ 每間廉航的policy唔同，大家買機票前可以做下資料搜集， 以我經驗Jetstar、AirAsia都可以咁做，而我上網search過HK express都可以架！ 張機票係上Expedia的package買的， $1831來回機票x2， 另外AirAsia會收$100 信用卡附加費， 雖然機票唔係話特別平 但第2晚至第5晚間酒店係平左7百零蚊每晚！ －－－－－－－－－－－－－－－－－－－－－－－－－－－－－－－－－－－ 9:10pm上機，我地7點幾係lounge食個dinner先上機。 果然係budget airline, 連張boarding pass都非常薄，薄到好似張receipt咁。 男朋友有DBS Black World Mastercard， 所以可以係機場禁區的RELAY書店換領$15以下的雜誌一本， 咁岩見到本Cosmopolitan送Weekend MaxMara旅行銀包， 所以就換黎係布吉用啦！ Air Asia 機上D雜誌的產品都幾吸引，餐單的食物都影到好靚。 我地去程咩都無買，留番回程先！ 去程個陣想買Srichand 的giftset，佢有盒皇牌碎粉同兩盒mask， 原本想係布吉睇下幾錢先 回程先再買， 點知回程想買個陣 空姐話無貨！ 事關係布吉都唔係咁易搵到Srichand (可能比人掃哂)， 而且除番開每盒個價錢同布吉見到的差唔多！ 男朋友都夠位坐 我就有D空位剩。 3小時40分的機程 睇左兩套戲 終於到達布吉！ －－－－－－－－－－－－－－－－－－－－－－－－－－－－－－－－－ 布吉機場都好細， 裝修簡陋。 我地過完海關，行李已經一早到左， D行李已經預先係輸送帶度拎左落黎， 一排行李放哂出黎， 我地好快就搵到自己的行李立即走得！ 當時都已經12am， 機場D店都關哂， 但係機場門口都仲有唔少agent問你駛唔駛book的士， 由於想慳錢 而且間酒店好似幾近， 於是乎我地就打算行去酒店啦。 我地第一晚住係Marina Express Aviator Phuket Airport， 感覺上好似同機場距離好近！ 但其實由機場到間酒店都無正常的行人路。 我地好瘋狂地照拖住喼行去酒店， 完全唔理前面有無路行啦。 呢個係我地大概行路的路線， 當時雖然夜晚12點幾，街上都滿佈街燈， 可惜拖住喼 我地都無手影相紀念呢個瘋狂的事蹟， 所以唯有用Google Map描述下當時的情況啦。 第一條箭咀係無Google街景圖， 呢段路係由機場通去露天停車場， 條路越行越窄 尾段甚至要行街路先去到個露天停車場， 都好危險。 第2條箭咀係露天停車場， 停車場好多電單車， 沿途會經過幾棟好似起緊的建築物。 當時都唔知個停車場係咪倔頭路， 好彩原來都通到出街。 街景圖影唔到停車場裡面的情況。 第3係箭咀開始我地沿住大馬路行， 行人路都幾窄， 有草地，而且地面開始唔平坦。 第4條箭咀，我地開始見到泰國常見的街道， 而且見到7-11，即係酒店不遠了！ 但呢段路最難行， 地面凹凸不平， 一路行都好驚個喼的轆會拖爛！ 我地係7仔買D野之後就過對面馬路，因為酒店係對面街。 右手面綠色呢座就係酒店啦。 我地沿路行過黎都有好幾檔泰國的地道野食賣， 但我地剩係住一晚所以無機會食！ －－－－－－－－－－－－－－－－－－－－－－－－－－－－－ 我地去到lobby， 職員見到我地咁熱咁攰， 我地話我地由機場行過黎， D職員都嚇｀左一跳， 覺得我地好勁 (其實可能係笑我地傻) 佢地都好nice 立即教大部風扇比男朋友吹 (佢好怕熱呢 haha) 我下篇blog再詳細講下呢間酒店！ －－－－－－－－－－－－－－－－－－－－－－－－－－－－－－ 係7仔買左盒番石榴汁飲 好鐘意食小老板的我 係7仔即刻買番包小老板食！ 然後我地就沖涼訓覺，聽日出發去resort! －－－－－－－－－－－－－－－－－－－－－－－－－－－－－－ 電話卡我地係鴨寮街度買AIS Traveller SIM Card $50 for 7日4G。 上網速度幾好，無上唔到網的情況。 －－－－－－－－－－－－－－－－－－－－－－－－－－－－ 兌錢方面我地都係係恆生度兌， 方法同去大阪玩 之 Day1(電話卡,兌錢,買ICOCA卡)一樣， 當時我地的匯率大約係1hkd＝4.33thb。 我地係Jungceylon的Kasikornbank的booth度都有兌錢， 匯率大約係1hkd＝4.35thb， 我地行左Jungceylon附近報tour個條街， D找換店都貴過Jungceylon呢間！ －－－－－－－－－－－－－－－－－－－－－－－－－－－－ 我地呢幾日的行程： Day 1：香港機場->布吉機場->入住Marina Express Aviator Phuket Airport酒店 Day2: 酒店Room service 早餐 ->Anantara Mai Khao Phuket Villas酒店check in ->JW Marriott Phuket Resort & Spa的Siam Deli食lunch->酒店hea全日->酒店的La Sala食dinner Day 3: 酒店自助早餐 -> Flying Hanuman玩zipline -> Jungceylon的Le Siam食lunch-> Jungceylon shopping ->Jungceylon的Shawarma Express 食dinner->返酒店 Day 4: 酒店自助早餐 -> 舊城區 Thalang Road-> Tu Kab Khao 食lunch -> Central Festival Phuket shopping -> 芭東海灘 ->玩水上拖傘 -> Jungceylon shopping ->JW Marriott Phuket Resort & Spa的Ginja Taste食dinner Day5: 酒店自助早餐 -> 酒店泳池＆沙灘玩 ->酒店做Thai message ->Kin Dee食dinner Day6: 酒店自助早餐 -> 布吉機場shopping ->香港機場 下篇繼續去布吉玩！ －－－－－－－－－－－－－－－－－－－－－－－－－－－－ 想收到個blog最新update 記得like Facebook Page https://www.facebook.com/fatbjai.travel/ 其他文章： 去布吉玩 之 #1(AirAsia,徒步行去酒店,兌錢,電話卡) 去布吉玩 之 #2酒店篇(Marina Express Aviator Phuket Airport,Call車app) 去布吉玩 之 #3酒店篇(Anantara Mai Khao Phuket Villas) 去布吉玩 之 #4酒店篇(Anantara Mai Khao Phuket Villas 2) 去布吉玩 之 #5(Flying Hanuman玩zipline,Jungceylon) 去布吉玩 之 #6(舊城區,Thalang Road,布吉fusion菜) 去布吉玩 之 #7(芭東海灘,水上拖傘,椰子殻雪糕,Jungceylon) 去布吉玩 之 #8(邁考海灘Resort區有咩食?超抵食餐廳推介!) 去布吉玩 之 #9(泰國必買手信,購物分享,戰利品) 去布吉玩 之 #10(布吉機場,Coral Executive Lounge,AirAsia)
