上篇講到我地係岡本織物度著浴衣, 仲幫襯左影樓影左兩張浴衣相。 去大阪玩 之 Day3a (浴衣體驗,京都清水寺) 影完相我地就拿拿聲出去行下啦。 ------------------------------- 我地行到黎清水寺的入口啦, 當時落緊毛毛雨, 背景D人都擔緊傘。 門口仲有個塔, 大家見到D雨紛飛飛嗎? 清水寺係要比入場費先可以入去的, 價錢係400円一個人。 入到去之後就見到多人圍住呢個鐵柱, 好多位男士都爭住舉呢條鐵柱, 以展示力的表現! 男友仔係輕鬆舉起的。 我就手無縛雞之力,雙手舉到半秒咁大把。 其實入口位呢度除左舉下鐵,都無乜特別, 然後我地就繼續行。 然後我地就行到去地主神社, 想祈求良緣的你就一定要行上黎呢度啦。 呢度仲可以買許願牌寫黎掛, 男友頭頂正正就係清水寺門口個坐塔 lol 黎到緊係要許個願啦 呢度仲有塊靈石可以許願參拜, 有4樣野可以求,分別係合格、厄除、開運、良緣。 然後我見人將水勺D水倒落靈石上, 所以我都有樣學樣。 呢度仲有孤仙可以拜,燈籠上都寫上左D祈福字句。 地主神社都差唔多行完, 我地打算離開清水寺啦。 唔可以行番正門離開, 而係有第條路離開清水寺, 可以見到清水寺的全貌。 (呢個時候大雨左!) 行遠D仲可以見到門口個座塔。 ------------------------------- 我地離開左清水寺就係出面行下、食下野啦。 然後我地就買清水寺好似幾出名的泡芙食, 有抹茶同吉士兩個口味,300円一個。 買完店入面有位比你坐住食, 佢有個牌食住叫人唔好一路行一路食。 清水坂 八ツ橋しゅ泡芙 清水 京あみ 地址:京都府 京都市東山区 清水 1丁目262-2 然後我地就行去釜座 清水二年坂店,為左食鰻魚飯! 地址:京都府 京都市東山区 高台寺枡屋町363-12 雨幾乎無停過咁! 終於去到餐廳 幾舒服,幾好坐 男友叫左個牛肉餐 我就當然叫鰻魚飯啦 有支葫蘆,入面係調味粉, 我就鍾意唔落多D。 兩個餐都好味道! 總共兩個人食左4700円,330蚊港紙左右。 由於男友把遮有時會滴水, 所以就買左把遮,300円。 幾乎99%的鋪頭都係賣透明遮, 點解日本人咁鍾意用透明遮架呢? 咁咪好容易撈亂囉? (無錯,今晚就發生左件事同透明遮有關, keep reading guys) 我地周圍行下影下相, 落雨影出黎的相 多左份凋零的感覺。 3點零我地就打算番去岡本織物換衫走人啦。 有朋友問我地落雨著浴衣係咪會好麻煩呀? 非也,雖然我冒雨影相(毛毛雨的時候),件浴衣係會濕左,但由於有幾層衫,所以身體唔會覺得濕漉漉,而且除左件浴衣,換番自己原本的衫,就乜事都無啦。 --------------------------------- 之後我地番大阪再去黑門市場食野啦! 其實我地Day1已經去左黑門市場食刺身, 去大阪玩 之 Day1b(大阪城,黑門市場,固力果廣告板,Pablo) 但無食到D和牛,所以我地今日就早D番去食啦。 我地去左黑門市場好出名的丸善食肉店 地址:大阪府大阪市中央区日本橋2-11-2 呢度有神戶牛食,但係太貴, 我地就叫左一pack 丸善和牛啦, 間店門口有幾個位坐, 即買即燒比你食。 3000円,大約210蚊港紙, 幾貴但好好味!必食! 之後係心齋橋見到間Dalloyau (平時叫佢做大籮柚 haha) 係一個法國的甜品店,海港城都有間分店。 香港好高級名店的感覺,日本就行親民D的路線 所以我地就入去睇下啦, 最後買左12粒禮盒裝的macarons, 味道係任揀, 2500円,約154港紙!(香港12粒禮盒裝要$318!) 平一半有多,搵唔到理由唔買黎食呀! 不過唔同的係,日本呢度的macarons竟然係獨立包裝。 因為落雨,店員仲包多層膠袋係紙袋出面! ----------------------------------- 夜晚我地又遠離遊客區係東心斎橋食好西, 我地去左食沾麵! つけ麺二代目みさわ (已經停業) 地址:大阪府 大阪市中央区 東心斎橋 1-7-23 T'Zビル1F 店入面全部都係日本人, 佢地都好似落街食個麵的裝束, 衣著街坊的感覺。 首先係部機買左想食的麵, 之後就可以入去坐啦, 係圍住個廚房坐。 印象中今次係第二次食沾麵, 而家先知原來食沾麵係有步驟架! 好似發現新大陸咁! 兩個人食左1950円 有埋沾麵食法的步驟! 1.將洋蔥放落湯 撈勻佢,然後食3份之1的麵 2.將青檸唧落麵度,再食3份之1的麵 3.落黑七味粉係麵度,食哂D麵 4.如果D湯仲有剩,將水壺的熱水用1:1的比例加入D湯度,飲哂D湯。 沾麵的食法好特別,有機會再試下沾麵。 入門口個陣,我將把透明遮放係門口傘桶 (桶入面有幾把透明遮), 我走個陣得番一把透明遮,無疑就係我個把透明遮啦, 點知,我開遮個陣發現把遮好殘,又生鏽,好污穢! 即係我新買個把透明遮比有心人換左!!! 當時好嬲,覺得呢個世界咩人都有,日本人都唔一定個個都係高質! 然後我唯有掉左把遮,唉把遮買左一日都唔夠就比人拎左! 雖然透明遮把把一樣好易撈亂,但我個把新,佢把舊到用唔到,無可能係搞亂左! -------------------------------- 最後我地臨番酒店前 去Family Mart買D宵夜食填補番失落感。 黎日本一定要食日本限定的Haagen Dazs的味! 聽日的早餐:半熟蛋三文治 聽日的早餐:好吸引的3文魚壽司 所有野加埋1738円 Day3完~ ------------------------------ 其他文章: 去大阪玩 之 出發前先興奮 去大阪玩 之 Day1a(電話卡,兌錢,買ICOCA卡) 去大阪玩 之 Day1b(大阪城,黑門市場,固力果廣告板,Pablo) 去大阪玩 之 Day1c (新世界元祖串,章魚燒) 去大阪玩 之 Day2a(環球影城Universal Studios Japan) 去大阪玩 之 Day2b (東心斎橋,遠離遊客區食好西) 去大阪玩 之 Day3a (浴衣體驗,京都清水寺) 去大阪玩 之 Day3b (京都清水寺,浴衣體驗,釜座,丸善,Dalloyau,沾麵) 去大阪玩 之 Day4a (京都伏見稻荷大社,千本鳥居) 去大阪玩 之 Day4b (奈良,進擊的鹿,梅田Grand Front Osaka) 去大阪玩 之 Day5 (關西機場手信,JR大阪locker,Luke’s Lobster) 去大阪玩 之 住宿篇(Best Western大阪心齋橋) 去大阪玩 之 住宿篇(Intercontinental Osaka)