上年12月的時候去左澳門玩左兩日一夜， 我同男朋友都好耐無去澳門， 而且想去澳門的賭場玩。 (9月去左新加坡的賭場，所以想比較下:-P) 今次黎澳門除左見識下賭場之外， 就係為左食！！！！！！ 我會分開兩篇blog介紹食左D乜！ 呢篇會講大三巴附近的野食， 下一篇會講氹仔！ －－－－－－－－－－－－－－－－－－－－－－－－－－－－－－－ 我地搭12點船， 係Conrad度放低細軟， 就搭shuttle bus過去澳門半島，即係大三巴個頭搵食。 1.大聖豬扒包 (好味度：★☆☆☆☆) 我地去到已經成3點鐘， lunch都未食極肚餓， 原本想食勝利豬扒包，但無開 :cry: 求其見到呢間大聖豬扒包就買黎食。 佢個廣告聲稱豬扒多汁厚度5mm、豬扒重量over 3安士等等。 我地就係比呢個廣告呃左！ 首先呢個包絕對唔平，要成$35個。 我地仲買左一人一個，cry out! 理由與現實！！！ 呢個包絕對違反左商品說明條例 (btw澳門好似無) 塊豬扒並唔係廣告入面咁大塊！ 而且勁多骨，無乜肉！ 一D都唔多汁。 好傷心！澳門第一餐就中左大伏！ 大家認住呢間大聖豬扒包，千祺唔好買！ 2. 帝鈞碳烤胡椒餅 (好味度：★★★★☆) 行行下就見到呢間帝鈞碳烤胡椒餅， 地址：新馬路大炮台街1C地下 男朋友掛念係台灣食的胡椒餅， 所以忍唔住買黎試下。 原來呢間米芝蓮推介過！ $18個，我地買左1人1個。 同台灣食的胡椒餅 味道係差唔多， 個餡夠多汁！ 以後近近地去澳門都食到台灣風味胡椒餅。 3.小上海鍋貼 (好味度：★★★☆☆) 見到呢間小上海鍋貼，又買黎試下！ 地址：新馬路賣草地圍3號 $5/3個，我地買左$10試下。 味道都ok的。 4.禮記雪糕 (好味度：★★★★☆) 然後我地就行去好出名的禮記雪糕， 地址：荷蘭園荷蘭園大馬路12號地下 禮記雪糕距離大三巴都幾遠下， 行左大約20分鐘先到。 我地當然叫左必嗌的雪糕三文治啦！$16件。 好懷舊的包裝。 兩塊威化餅夾住3款口味的雪糕。 我最鍾意最右白色的椰子味，yummy！ 除左包裝盒懷舊之外，連裝修都好懷舊。 除左雪糕三文治之外，仲有好多選擇。 除左雪糕，仲有曲奇、紐結糖賣。 食完雪糕之後， 我地問店入面D姨姨點搭番去氹仔， 然後我地行去附近車站搭25號巴士($6.4)番氹仔。 下篇blog就會講我去氹仔食左乜啦。 第2日起身，我地就搭的士再黎大三巴搵食。 (btw 澳門的士都幾貴，Conrad搭去勝利要$73) 5. 勝利茶餐廳 (好味度：★★★★★) 我地第一時間去勝利茶餐廳， 地址：新馬路營地大街94號 琴日無開搞到我地食左間伏野， 今日終於開左了！ 普通茶記的裝潢。 主角出場了！ 大大塊吉列豬排的豬排包，只不過$26！！！ ！！琴日伏到爆的大聖豬扒包要$35！！ 我地當然都係叫一人一個啦。 好厚、好正、好juicy！ 食完勝利豬扒真係好滿足！！ 但好食的野唔好比佢停！ 我地繼續去搵食！ 6.李康記豆腐花 (好味度：★★★★☆) 然後黎到呢間李康記食豆腐花， 地址：新馬路新埗頭街19號D地下 呢間唔係係大街，要捐窿捐罅先行到去。 叫左豆腐花($7)同豆奶($6)。 豆腐花係超滑！比長洲、上水etc 個D呀婆豆腐花都還要滑！ 而且夾埋D花奶真係好好味！ 杯豆奶就無乜特別。 我覺得豆腐花叫細碗都夠食，畢竟附近仲有好多野等緊我地去食，haha。 呢間鋪頭除左D豆腐花吸引我之外， 呢隻唔怕人的看門貓都非常吸引。 成日都行黎行去吸引你注意。 仲成日行去你腳邊，引你去摸佢 ;-) 7.牛記咖哩美食 (好味度：★★★★☆) 好食的野總係唔會咁易就去到， 地址：新馬路十月初五街1號地舖 呢間牛記咖哩美食又係要行遠少少先至搵到。 咖哩牛腩麵$27 蟹黃撈麵$41 正當我手機食先的時候， 店員叔叔就提我蟹黃撈麵要趁熱食， 凍左D蟹黃就會變苦架啦。 佢講完我就拿拿臨食啦， 超正，成個麵索哂蟹黃D蟹味！ 鍾意蟹味的你一定要試下！ 之後我地就搭巴士番氹仔繼續食啦。 想收到個blog最新update 記得like Facebook Page https://www.facebook.com/fatbjai.travel/ 其他文章： 去澳門嘆 之 大三巴附近食好西 去澳門嘆 之 威尼斯人有咩買同食 去澳門嘆 之 住宿篇(Conrad Macao)
