第2日的行程~ Day2: 第二市場->太陽餅街買手信->宮原眼科->搭台鐵去台北車站->酒店check in->忠孝敦化站dinner --------------------------------- 今日早D起身出去食早餐, 9:30am左右就行到黎第二市場。 陽光好猛烈,天氣好好! 第二市場入面好似香港街市D熟食中心咁,有熟食,有菜賣,有D日用品賣。 但我地去到第二市場,入面D食店好多都未開或者準備緊, 最後我地去左山河魯肉飯食野。 魯肉飯未有:( 所有叫左2碗肉燥飯,NT$30一碗。 香腸NT$30 味道一般啦 唔係特別好食。 ------------------------------- 食完野就周圍行下,雖然好熱,但都要去鳩嗚的! 台灣野食入面我地最鐘意食太陽餅 梗係去太陽餅街買太陽餅啦! 太陽堂老舖 地址:台中市自由路二段27號 NT$150,有8個獨立包裝的太陽餅。 太陽餅街的生意鬥得好勁,D店員都好殷勤咁開包太陽餅比我地試 又比茶我地飲。 呢間太陽堂老舖都幾好食,但我覺得台北買的太陽堂老店會好食D! 行到太熱啦 經過飲品店緊係買番杯野飲 降下溫啦 呢間野叫茶湯會 我一直以為叫剎湯會 haha 直到打blog呢一刻先睇清楚個字lol 我地買左杯觀音拿鐵,NT$49。都幾好飲! 買一間太陽餅係唔夠的,當然要試多間。 呢間阿明師老店太陽堂好多人係入面買一盒二盒,所以我地唔執輸。 地址:台中市中區自由路二段11號 NT$264,有12個獨立包裝的太陽餅。 我覺得頭先個間太陽堂老鋪好食D,D餡正D,呢間阿明師就D餅就大件D。 ---------------------------------------- 第一晚買左個幾件洪瑞珍咁好食,今日緊買多D食啦! 我去左兩間洪瑞珍,試下邊間好食D。 左面係第一晚買個間洪瑞珍,中山路的洪瑞珍。 地址:台中市中區中山路125 - 2 號( 中山路、市府路交叉口) 右面係洪瑞珍餅店,係自由路。 地址:台中市西區自由路一段122號 其實兩間都相隔幾遠,大概15分鐘路程。 上面係自由路,下面係中山路。自由路係大件少少,而且貴少少。 每間各買左2件原味=招牌、2件芝士=起司、2件滿漢=總匯 兩間口味的用詞都唔同的! 上圖係中山路洪瑞珍的價錢。買左: 原味三明治NT$23 x2 芝士三明治NT$26 x2 滿漢三明治NT$30 x2 自由路買左: 招牌三明治NT$25 x2 起司三明治NT$30 x2 總匯三明治NT$33 x2 我覺得兩間味道差唔多,但中山路好食少少。 ----------------------------- 之後就番旅店check out,執行李去台北啦。 我經常係台中的地下發現到呢個標誌。 間鋪頭叫7柒? 一間電腦小店,放係一部主機上的memo紙/價錢牌 lol 台灣人真有幽默感呢! ---------------------------------- 臨離開台北前,去左台中車站旁的宮原眼科。 好有電影哈利波特魔法學校入面的感覺! 科宮眼科上層係餐廳,下層係賣手信。 有好多台灣的特色手信賣,包裝懷舊得黎好靚!但係價錢偏貴,所以我地都無買到。 唔買野黎影下相都幾靚。 去左宮原眼科出面的冰淇淋店食雪糕。好多人排隊買雪糕! 叫左雙球NT$150+NT$80窩夫底。 好多唔同的味道揀,最後揀左66%堅果加勒比&金煌芒果。 賣單之後可以免費揀兩樣野灑上雪糕,除左個兩樣之外店員仲會額外加其他野食上去。 賣相好靚!好大杯! 兩個人食都覺得好飽! 大家黎台中都要黎試下呢度的雪糕呀! ------------------------------------------------------------------------------------- 之後就去台中車站搭台鐵去台北。 明明食雪糕食到好飽,但係我男朋友想試下鐵路便當,於是乎就買左盒係台鐵上食。 臺鐵便當NT$60。味道唔錯! 綠茶NT$20。 我地坐自強號去台北,可惜劃位飛已經賣哂,要買無座位飛(即係要企!),NT$350。 車程兩個鐘頭多D,D位無人坐的話可以坐住先,之後有人的話就要比番個位飛主。 幸運地,我地坐的位一直都無人黎坐!可以一直由台中訓到去台北!hehe -------------------------------- 去到台北車站之後,我地就去左酒店check in,我地兩晚都住台北凱撒大飯店,下篇我會詳細review間酒店。 之後我地就搭捷運去忠孝敦化站食dinner。 我地去的餐廳叫蘋果工房。 地址:台北市大安區忠孝東路四段216巷8弄2 有D似自助餐。甜品、salad、飲品係自助任拎,Main Course係無限任點! 價錢只不過NT$369+10%,好抵食! Salad!有台灣特產芭樂,即番石榴。 有湯飲! 飲品 Main course有好多選擇!我地幾乎試哂所有野! 甜品都差不多比我試雲哂! Main course同甜品雖然係無限任食,但賣相都唔會好差!唔似香港D放題! D 野食幾正!但每碟份量比較細,可以有空肚試多D野食 haha! 食到好鬼飽!玩下餐廳佈置的公仔先:P 食完飯shopping下,就番酒店休息了~ Day 2完~ 想收到個blog最新update 記得like Facebook Page https://www.facebook.com/fatbjai.travel/ 其他文章: 大家可以係menu bar度揀《去台灣嘆》的其他文章 去台灣嘆 之 Day1 (長榮航空,桃園機場去台中, 逢甲夜市) 去台灣嘆 之 Day2 (第二市場,太陽餅街,宮原眼科,台中去台北,蘋果工房) 去台灣嘆 之 Day3 (礁溪,宜蘭,溫泉魚,Afternoon Tea) 去台灣嘆 之 Day4 (永康街,度小月,府城,天天利) 去台灣嘆 之 台中住宿篇(理想與現實,Airbnb中伏) 去台灣嘆 之 台北住宿篇(凱撒大飯店) 去台灣嘆 之 戰利品篇 《去台北嘆》系列 一家去台北 之 住宿篇