Day 2上半日可睇番 去台北嘆 之 Day2a (平溪，放天燈，菁桐，許願竹) 1.九份 離開平溪線之後，我地坐台鐵去到瑞芳，然後坐788號公車去九份。 係瑞芳火車站出閘之後沿住明燈路三段直行，公車站就係瑞芳警察局隔離。 上車坐10個站之後，係"舊道"落車就到九份啦。 去到九份已經7點零啦，我地首先去左李儀餅店買手信。 買左奶油太陽餅NT$300，有10個。 同埋鳳梨酥＋鳳黃酥NT$275，各有5個。 我同男朋友都好鐘意食太陽餅，但我男朋友鐘意李儀的太陽餅，而我就鐘意太陽堂的太陽餅多D啦。 鳳梨酥已經食到厭啦，所以買D鳳黃酥試下，因為我鐘意食蛋黃，食落我果然係鐘意鳳黃酥多D。 其實去到個陣九份一半的鋪頭都關左門，而且又落雨，但都無損我地的雅興。 祖傳阿滿芋圓NT$40。黎到九份緊係要食芋圓啦，我地個陣又凍又肚餓又落緊雨，一見到芋圓唔理咁多就入左去食啦，所以無特登去搵出名D的芋圓。 食完野就四圍行下啦。掛滿紅燈籠的九份，入夜後很迷人。 九份好多食肆的裝修都好有特式，吸引好多遊客係門口影相(包括我地)。 而家的九份其實並不悲情呢！ By the way, 落住雨拎住把遮，真係好狼狽，所以都無乜點影相。 行完九份，我地就行去公車站搭公車番瑞芳啦。 2.舒服到爆的台鐵 番到瑞芳我地就搭台鐵到松山，去饒河街夜市啦。今日搭過咁多架台鐵，咁岩架架台鐵的內部格局同座位都唔同，今次呢架台鐵由於係遠途車，所以D座位係非常之好坐，有D似香港東鐵的頭等卡，但呢架台鐵係更舒服，座位更大。我地坐左無耐就已經舒服到訓著左，訓左半個鐘有多。 3.饒河街夜市 自從捷運松山線通車，大家除左搭台鐵都可以搭捷運到松山站去饒河街夜市。 去到饒河街夜市，我地首先買左大排長龍的福州世祖胡椒餅NT$50，唔錯啦，不過又唔算好吸引。 歐咪呀給干貝燒NT$50，幾正。 爆漿起司玉子燒NT$50，麻麻地。 東發號蚵仔麵線 NT$60，一個字正！味道一流，必食呀！ 金太黃金雞腿捲NT$35，幾好味。 菓匠日式手工銅鑼燒NT$100，有6個。即叫即整，有好多口味任揀，包括原味紅豆、榛果巧克力、布丁奶油、香草牛奶、提拉米蘇(即係Tiramisù)、奶油起士、抹茶等。我覺得榛果巧克力最好食，其次係原味紅豆。D銅鑼燒整體黎講都幾好食。 除左野食之外，我男朋友係饒河街一間髮型鋪買左支Schwarzkopf Osis+ Session Extreme Hold Hairspray 500ml，NT$299，抵！巴黎草莓、86小鋪都賣緊NT$329，但之後發現光南大批發都係NT$299。 係饒河街夜市就買左食左咁多野啦，之後我地就搭捷運番酒店休息啦。 5. 7仔奶茶 係酒店附間7仔買左支純萃。喝的奶茶，我係台灣都見到有人拎住黎飲，而且個樽又幾靚，就買黎試下啦，飲完其實無乜特別，午後紅茶的奶茶會好像飲D。 想收到個blog最新update 記得like Facebook Page https://www.facebook.com/fatbjai.travel/ 其他文章： 去台北嘆 之 解謎篇 去台北嘆 之 酒店篇 去台北嘆 之 Day1a (中華航空, 廁所, 電話卡, 機場巴士, 台北車站) 去台北嘆 之 Day1b (漁人碼頭,情人橋,淡水老街,士林夜市) 去台北嘆 之 Day2a (平溪，放天燈，菁桐，許願竹) 去台北嘆 之 Day2b (九份，饒河街夜市) 去台北嘆 之 Day3 (度小月，Dazzling Cafe，阿毛，忠孝敦化，台北車站，西門町) 去台北嘆 之 Day4 (松山文創園區，誠品生活松菸，美麗華摩天輪，Bigtom) 去台北嘆 之購物篇－化妝品＆護膚品 《去台灣嘆》系列 一家去台北 之 住宿篇
