想要一盅兩件，未必一定要上酒樓，家下開咗唔少點心店，今晚經過呢間就入去試吓。 燈光分明，木色及橙色作主調，四個大字”明廚即制”。 幫你沖嘅係茶，而唔係普通就咁加水，選用十年普洱，入口香濃滑口，飲得出有分別。 超級推介呢客蘿蔔千絲酥 ($28/2件)，外型做成蘿蔔，肥嘟嘟又係走可愛路線。 一咬先有外層嘅酥脆，內裏全部係蘿蔔絲，仍帶蘿蔔嘅香甜味，好有驚喜。 有咁可愛嘅外表，成個啤梨嘅係田園鹹水角 ($20/2件)。 外皮仍然係食開嘅鹹水角，不過整到啤梨型，餡料無變，兩啖就食晒成個” 啤梨仔”。炸物點可以食一款勍夠?! 呢客UFO鮮蝦炸雲吞 ($26/2件)見佢有”推介手指”，當然要叫。 雲吞皮炸到香脆，入口唔會一口油，餡料係隻蝦，鮮甜彈牙有口感，點埋個甜辣醬，一隻唔係幾夠喉囉。 友人要食香茜叉燒腸 ($32)，一客有3條，豉油另上。 腸粉拉得夠薄，未食已望到入面嘅香茜叉燒餡料。腸粉皮薄滑，加埋叉燒嘅咸甜肉味，果然無叫錯。 除咗幾款燉湯外，呢度都有胡椒豬肚湯 ($32)，獨享可以，二人分享亦得。滿滿嘅豬肚，仲多過支竹及酸菜，熱度加上胡椒嘅香辣度，飲完有D出汗。 另外仲叫咗兩款蒸飯，實行碳水化合物滿滿。醬皇鳯爪排骨飯 ($35)，份量都唔少，鳯爪有D辣度，有肉有菜有飯，呢口價超抵。 另一款係蟲草花北菇鷄飯 ($35)，飯粒更能食到荷葉香味，鷄件亦係唔少，少少鷄油滲埋落個蒸飯，單食飯都好味。 所有點心即叫即製，熱辣辣，夠晒真材實料，回頭率偏高。開到凌晨三點，想飲夜茶就有好地方選擇。 #香港宵夜 #首創檸檬茶新口味 #凌晨三點仲有嘢食 #十年普洱 地址 : 香港旺角彌敦道678號華僑商業中心地下A&B號舖 #ULifestyle應用程式 #ULifestyleApp #社群 #ULifestyleApp社群 #ULifestyle社群密密送 #UCreatorHK #MOMENTSwithUCreator #社群創作有價企劃 #創作有價 #hkblogger #hkbeauty #hklifestyleblogger #bloggerhk #hkfoodblogger #hkfoodblog #hkfoodie #KOL #hkkol #打卡 #旅遊 #ublog #社群每週活動推送 #UCommunity社群 #送禮 #一齊EatToFit
