黎呢區搵食，捨棄泰菜潮菜，重投佢嘅懷抱。 經過門口位置設有湯水部，就估到有料到。二至三人可叫老火例湯 ($118/細)，每人都有兩碗。滾到似熔岩先上枱，湯係要趁熱飲，尤其係老火湯。 今晚係西洋菜南北杏煲唐排，忍唔住食咗舊排骨，輕易”骨肉分離”，西洋菜煲至腍甜，成啖湯夠熱之餘味道夠甜，飲完無口渴，成身暖晒及得到滋潤咁。 見到蔡瀾先生嘅真跡”炒豬什”，仲有手寫嘅”廚師推介”，跟住高手去點菜。 飲完碗靚湯後，先有招牌炒魚腩 ($118)，呢碟目測出鏡率都高。 魚腩泡油，魚皮變得香脆及惹味，注意有細骨; 大量薑蔥及蒜粒去炒，配凍飲岩晒。 幸好對內臟唔抗拒，唔係就食唔到呢客招牌炒豬雜 ($128)。亦以大量薑蔥去炒豬雜，豬雜包括豬心，豬潤，粉腸及豬肚，切成細舊可縮短炒嘅時間。 好耐無食過粉腸，口感粉綿; 豬心爽口; 豬肚唔韌，處理後食唔到異味。最驚喜係件豬潤，熟度岩岩好，入口係粉嫩無渣。 清清地選擇蒜蓉蒸勝瓜 ($72)，切成一段段放上金銀蒜，再淋上豉油。 勝瓜批皮批得夠徹底，入口超嫩，配上蒜蓉及少少豬油味，清淡中見少少惹味。 味道酸甜嘅食物通常都惹人胃口，呢味紫蘿炒鮮牛肉 ($138)好耐都無食過啦，估唔到係呢度見到佢。 紫蘿代表酸薑菠蘿，兩樣都係酸甜界代表，快炒牛肉質感嫩口，沾上咗酸甜醬汁好好送飯。 今餐係充滿溫度及味道，好味。#ULifestyle應用程式 #ULifestyleApp #社群 #ULifestyleApp社群 #ULifestyle社群密密送 #UCreatorHK #MOMENTSwithUCreator #社群創作有價企劃 #創作有價 #hkblogger #hkbeauty #hklifestyleblogger #bloggerhk #hkfoodblogger #hkfoodblog #hkfoodie #KOL #hkkol #打卡 #旅遊 #ublog #社群每週活動推送 #UCommunity社群 #送禮 #食飽過馬年
