朋友從外國返黎探親友，點都要約食飯見見面。同佢行完啟德，返九龍城搵野食，呢間係佢當晚之選，話好掛住本地菜。 走街坊格局路線，樓上仲有用餐區，幸好樓下仲有張細枱。 兩方牆貼上各類菜式名，選擇超多。 坐我地後面張6人枱，一坐底即落6盅花膠魚翅燉鷄湯 ($58)，我地當然都叫返盅。超級夠熱又足料，飲到鷄湯味道又唔肥，呢口價絶對值。 飲完湯就上今餐亮點，呢度嘅招牌菜之一: 芝士龍蝦伊麵 ($490)。份量足夠2-3人食，用三種芝士整成嘅醬汁，已經流緊口水。 選用澳龍，肉質超彈牙，加埋芝士醬汁，個殼都忍唔住啜埋。 唔好唔得個伊麵底，估計有成個麵咁多，麵條完全掛上惹味芝士醬汁，單食都已經好好味。 夏天通常食通菜，離不開以蝦醬/腐乳炒。呢碟係腐乳炒通菜 ($88)，加少少椒絲，正常水準，唔算太油。 見餐牌呢客黑椒牛仔骨煲 ($168)係有個豎起拇指嘅圖案，同埋都岩食就叫咗。上枱時侍應提醒小心煲熱，熱力再令黑椒更加散發佢嘅香味。 加埋洋蔥及青紅椒粒就梗加香，牛仔骨肉質幾嫩口，容易食，送飯一流。 呢客三層脆豆腐 ($98)係侍應介紹食嘅，以菜心伴碟，再淋上醬汁係豆腐上。 特別之處件豆腐係自家製，以蛋加埋豆漿再加入臭草/油麥菜整成，以先蒸後炸煮法。內裏口感係似食緊蒸蛋，幾特別。 友人對於今餐表示相當滿意自己嘅選擇。全店只收現金，免收加一，仲要開到凌晨一點，佢搵緊有無機會臨走前再食多一次，哈哈………… #ULifestyle應用程式 #ULifestyleApp #社群 #ULifestyleApp社群 #ULifestyle社群密密送 #UCreatorHK #MOMENTSwithUCreator #社群創作有價企劃 #創作有價 #hkblogger #hkbeauty #hklifestyleblogger #bloggerhk #hkfoodblogger #hkfoodblog #hkfoodie #KOL #hkkol #打卡 #旅遊 #ublog #chill賞同陽光玩遊戲
