友人知道我喜歡食天婦羅，叫我經開呢區可以去試吓。 店內面積精緻，似係以日式海產市場作主題裝飾，天花掛上魚網，牆上貼滿海產圖畫，座位多面壁而坐。 架上提供多款調味料，食冷熱烏冬/蕎麥麵可自加調味。 食厭咗普通煎餃子，又可以試吓雞皮餃子 ($48)。 用鷄皮代替餃子皮，開初都擔心會否一咬就會好多油，其實經過炸後，本身嘅鷄油已經”迫”咗出黎。點埋個餃子汁食，入口係外脆中又帶點嚼口，而餡料就係餃子餡，夾住一條黎食都幾過癮。 每款定食，都包埋龍蝦味噌湯及前菜主菜係蒲燒鰻魚丼 ($88)，份量相當大碗。 半條蒲燒鰻魚，兩邊圍住蛋絲及幾片醃蘿蔔，賣相不俗。 梗要將蛋絲，鰻魚及飯結合，一啖放入口先食到蒲燒汁嘅甜味，繼而係燒鰻魚嘅軟嫩，再有白飯嘅滿足，多少少蒲燒汁撈飯就好味。 呢度仲有自選天婦羅定食 ($30)，可以選擇白飯/冷熱烏冬/蕎麥麵，加少少錢可另轉香蔥牛油飯/冷酢橘烏冬。可選食材主要為海產/鷄肉/牛肉餅及蔬菜類。 每款都吸引，尤其係海產類，配以冷蕎麥麵，所以就叫咗廣島蠔 ($20)，鮮帶子 ($20)，黑虎蝦 ($13)，半熟蛋 ($13)，皇帝蟹棒 ($13)及四季豆 ($9)。 趁熱食就由鮮帶子起動，唔算太大粒但幾厚身，無渣仲幾鮮甜。 隻廣島蠔炸完都仲咁大隻，$20隻相當抵食，蠔身夠飽滿幾有蠔味。 天婦羅蛋印象中比較少見，呢度仲要入口係半熟流心狀態，蛋黃汁好creamy。 所有天婦羅嘅炸漿都夠薄身，唔會食到一口粉都未食到主角，仲要即叫即製，入口夠熱度同唔油。雖則佢呢度係有炸菠蘿伴雪糕呢客甜品，但就成日都將呢客芝士年糕 ($38)，由小食變為甜品。 入口熱辣辣，炸至外香內軟，香甜軟滑嘅芝士配合煙韌嘅年糕外皮，食得快先可以食多一粒，哈哈……… 仲有其他特色天婦羅如龍蝦，九肚魚，花尾龍躉，活虎蝦等，有待下次。 #ULifestyle應用程式 #ULifestyleApp #社群 #ULifestyleApp社群 #ULifestyle社群密密送 #UCreatorHK #MOMENTSwithUCreator #社群創作有價企劃 #創作有價 #hkblogger #hkbeauty #hklifestyleblogger #bloggerhk #hkfoodblogger #hkfoodblog #hkfoodie #KOL #hkkol #打卡 #旅遊 #ublog #浪漫旅人祭 #精簡護膚攻略 #偽素顏美肌攻略 #輕鬆出遊 #泡泡潔淨 #打造韓系浪漫廚房 #速速水潤奇蹟
