呢條街兩邊食店遍地開花,食麵或飲野都有。有時響應完夜繽紛想食D野,呢間串燒店可解我燃眉之急。 店舖面積一眼睇晒,自行寫紙落單,辣度可選擇。 點咗鷄軟骨 ($28/2 串),雞腎 ($28/2串),大墨魚咀 ($28),免治鷄肉棒 ($20),牛舌芯 ($38),虎皮青椒 ($13)等,一次過變拼盤上枱。 先食大墨魚咀,入口軟糯。 比起牛舌,呢客牛舌芯來得更嫩滑,厚切帶來口感之餘唔會韌 呢度嘅免治鷄肉棒,比起日式細碼D,無蛋汁點住食,入口外面乾身D,內裏鷄肉唔乾。 原隻上嘅虎皮青椒,成支竹籤咁大隻嘅都少見,入口有D辣度,好彩都食到。 友人點選鹽燒白鱔 ($55),燒得皮脆肉仍嫩身,鱔肉帶點厚度,友人滿意。 每次去食串燒必叫嘅一定係蒜蓉原條茄子 ($38),切開鋪滿蒜蓉,未食已聞到蒜香味。 用筷子一起就夾滿一注,調味岩岩好,軟身中食到蒜粒,但入口係唔夠熱。 友人唔食茄子,咁就叫客蒜蓉金菇菜 ($45)比佢。份量超多,以錫紙兜加上大量蒜蓉煮,熱辣辣都幾好食。 就咁食串燒驚唔飽都無需擔心,呢度有飯粉麵作為主食類。叫咗其中一款錫紙花甲粉 ($65)一齊分享。 帶點麻辣味嘅湯底,麻香多過辣,有類似粉絲配湯都唔錯; 花甲細隻但無咩沙,仲多數都有肉。 即點即製,要點時間等待,有加一服務費。聽到外賣落單嘅響聲響不停,店員及廚師亦忙過不停。 #chill賞遊世界 #ucreatorhk #好去處 #相機食先 #Chill歎旅遊 #透亮抗敏#缺水肌必備 #女生好物體驗包