話說食力組組員其中一位係”好酒”女子，今餐由佢帶我去呢度威威 未入座，見到呢個清酒任飲宣傳照: 男士$168/3小時清酒任飲，女士只需$98/3小時清酒任飲，寫住超過35款日本酒任飲。有無睇錯呀?! 咁抵?! 侍應介紹返係呢個雪柜入面嘅日本酒限時內可以自由斟，自由飲。款式確係唔少。 鍾意邊支就斟邊支，見到”花邑”個名咁靚，就小試一回。超易入口，悶熱天氣飲凍清酒，爽呀。 見到餐牌介紹呢個”二人前會席料理” ($880)，由沙律，壽司，刺身，燒物，炸物，主食至甜品都有，只需每項再選喜愛食材就搞掂。 飲啖清酒，就由蟹肉蟹籽沙律打開今餐序幕。份量幾對眼，蟹籽與青瓜絲”賦予”佢嘅爽脆度，加埋香滑沙律醬，穩陣之選。 壽司任選八件，每款最多兩件，易搞啦，咁就選四款大家都鍾意食嘅。就赤貝，蜜柑鯛，金目鯛及松葉蟹肉。 精緻手握壽司，係赤醋飯，金目鯛肉身軟綿，一口一件岩岩好。 另一款松葉蟹肉趁紫菜變腍前都要趕快享用，一絲絲嘅蟹肉舖滿飯上，食到鮮甜味。 刺身類五款，每款2片，種類都偏向大路岩食之選。今晚之選係煙燻鯖魚，赤蝦，油甘魚，帆立貝，赤身。 比較特別係煙燻鯖魚，入口確實食到煙燻味，無需點醬油都夠味道。 其他刺身都算厚切，呢舊帆立貝入口軟綿綿，好想食多件呀。 串燒類黎講，對於”牛系”係情有獨中，所以好快就選擇咗厚燒牛舌芯及安格斯牛肉各2串。 趁熱唧上少少檸檬汁就開動，個人推介厚燒牛舌芯。好香牛舌味，厚切入口相當有滿足感，又食到少少黑椒味，惹味惹味。而牛肉串入口有些少爆汁，肉味係有嘅。 三款海鮮類天扶良，友人唔食得蝦，所以另加$20要咗鮑魚天扶良 薄薄一層炸漿包住鮑魚，入口帶熱度，唔韌可以一咬到底，炸完再淋上特製醬汁，甜甜地幾好食。 加$50轉食A5和牛壽喜燒，和牛肉大約2-3片，脂肪唔算太多。仲有豆腐 (略燒過)，鮮冬菇及蔬菜等 連埋兩隻標誌性嘅生蛋用黎沾牛肉食，入口加倍滑口，兩啖就輕鬆吞下。 呢碗大蜆味噌湯，連埋和牛壽喜燒一齊上埋，趁未食得和牛飲住先。味道清淡，飲完再增加飽肚感。 最後上埋甜品，係雲呢拿雪糕窩夫呀。窩夫入口係脆熱，配埋香甜雪糕，一熱一凍，點可抗拒到呢?! 呢度環境優靜，可以嘆下酒，傾下計，食下燒物/炸物佐酒又得，點解我咁遲先發現呢度架?!#ublog #foodblog #foodiehk #cwb #sake #allyoucandrink
