要係將軍澳區搵食，寶琳站可算為代表，接駁住嘅大商場內有多種唔同種類嘅餐廳，總會搵到岩食嘅。想食中菜咩? 可以黎呢間。 多款餐前小食中，睇中呢客沙薑豬手粒 ($68) 斬至一口份量容易食，甜酸醬汁加埋沙薑香味好惹人胃口，入口爽脆，正。 出街食飯能夠有啖燉湯飲下都幾好，見到呢盅花膠螺頭爵士湯都只係$48，材料豐富。 入口熱度十足，有齊花膠，螺頭及鷄腳，味道鮮甜，飲完都無口渴。 要選最家常菜式，菜芯炒牛肉絶對係頭幾位，但呢度嘅係選用安格斯牛肉 ($138)。 以菜芯做底，入口無渣同唔苦; 牛肉夠大塊，鬆軟得黎又帶點嚼口，用黎送飯好岩數。 呢客熟成脆皮燒鷄 (半隻/$118)，出鏡率都幾高，半隻份量相當有睇頭。 有埋個燒鷄汁點食，鷄皮下無咩脂肪，炸至金黃色又香脆，就算係鷄胸位，肉質都唔會嚡乾，連皮食會食到鷄油嘅香味。 係門口望到呢個”年年有魚”牌，大大隻字寫住每條$18，無睇錯，真係$18。 由於只限晚市供應，每晚數量有限，落單時問仲有無，幸運地仲有，即刻落一條啦。原條清蒸蝴蝶龍躉斑，約1斤重 ($18)，賣相絶不將貨就價。 大量蔥絲配上蒸魚豉油，魚肉輕易骨肉分離，嫩滑程度可接受，咁嘅價錢絶對超值。 呢度出品味道唔錯之餘仲夠晒大碟，下次可以叫多幾個朋友再黎開餐先。 #ublog #foodblog #foodie #foodiehk #foodpic #tko
