一打開升降機門，就已經被呢個霓紅燈箱吸眼球。 對越式沙律認識唔多，呢客越式發酵茶葉沙律 ($54)開了我地嘅眼界。 基本上成個沙律口感爽脆，皆因有乾脆嘅茶葉，椰菜絲，青瓜絲，甘荀絲及生菜絲。蕃茄粒平衡返個”濕度”，加埋脆豆及花生，無多餘醬汁，相當健康。 呢客作為小食嘅惹火上身鹹檸豬頸肉 ($70)，出鏡率都幾高，見隔離枱都有叫到。上枱後再點火，就變成咁呢個嘅畫面。 火焰好快熄滅，豬頸肉多一分燒香味，點埋個青椒醬(唔辣嘅)，多一份惹味。 食緊豬頸肉之際，接骨木花茶配青蘋果 (熱/$30)及香茅青蘋果 (冷/$25)就送上。前者味道香甜; 後者有淡淡香茅味，幾有清新感覺。 呢客紅白配就係火龍芒芒蝦仁配脆蝦片 ($58)。將火龍果粒與芒果粒再加入原隻蝦放上脆蝦片上，腍彈與脆嘅口感一啖有齊晒。 好耐無食過撈檬，今晚就會一會佢，黎客炸素食春卷撈檬粉 ($68)，都幾大碗喎。 毫不客氣地加入醋汁將佢變成”湯”咁 (哈哈……)，輕輕掛咗係檬粉上，味道偏甜唔會太酸; 而件炸素食春卷肥嘟嘟咁，外皮香脆，入口似食到芋蓉嘅綿口感，唔錯。 最後上枱嘅係烤蔞葉鷄配青蘋果條 (半隻/$90)。 以鷄肶嘅大細黎講，呢隻應該係春鷄，烤好後再”舖”上烤蔞葉及炸蒜粒。 入口熱度十足，本身隻鷄已經有味道，可以點少少佢嘅特色醬，味道甜甜地有椰子味，同鷄肉都夾嘅。仲有佢嘅青蘋果條，睇色以為會辣但又唔係喎，係咸咸地味嘅青蘋果條，幾得意。 #ublog #foodie #foodpics #foodblogger #mk
