年年尾食過呢間，今次適逢補祝友人生日，就再次黎到。 喜歡佢嘅裝修格調，燈光與音樂嘅配合，幾令人有舒服放鬆嘅感覺。 手機落單已經成為主調，呢度都唔例外。上次食嘅套餐無咗……..變成單點，食物選擇相對地多咗好多。 先上呢客西班牙鬆脆包配香蒜希臘芝士醬 ($48)當小食，二人分享岩岩好。 件包果然夠鬆脆，搽上幼滑藍芝士，少少咸味，加埋油浸蕃茄嘅甜味，唔錯嘅配搭。 有包包，當然想有埋個湯一齊食。只有一款湯供應，就係黑松露白菌湯 ($48)。頂層被泡泡遮蔽住，外貌似係一杯特式咖啡。 熱度相當夠，黑松露味相當濃郁，用匙更或真係當咖啡咁成杯飲都得，好飲。 餐牌上供應香辣炸薯條 ($58)，但我地要咗原味就算，唔油膩，志在過下口癮。 見到侍應送上火爐架，就知主菜準備上場，主要為肉類，牛/豬/鷄等 想食靚少少就要咗美國1855安格斯肉眼 ($268)，已切成片狀，加埋炸脆蒜片，另設兩款醬汁點食。 用火爐仔”慶”住，食到最尾果件都保持熱度 柯打五成熟，內裏仍見到紅色位; 肉質鬆軟，食得輕鬆; 加埋炸脆蒜片增加蒜香味及口感，又係好味喎。 再叫多個牛油香草烤黃油大鷄 ($238)，亦有火爐仔”慶”住，配以燒汁點食 唔係春鷄體積，切好一件件，成隻鷄肶一齊上 皮下無咩脂肪，微脆放心食，肉質超嫩，仲有少少油汁滴出，個人黎講唔需要點汁都好味。 見到有呢客蒜香雜菌意粉 ($96)，忍唔住叫埋 以呢個價錢黎講無諗過份量會有咁多，蒜香味超濃(LIKE)，仲有少少辣，相當惹味，意粉又有口感，加埋雜菌帶點嚼口，略為油多咗D，乾身少少會仲好味。 只怪我地眼闊肚窄，有多款特色甜品供應，例如梳夫里班戟，意式流心芝士蛋糕等都無空位再食，只好叫杯伯爵茶鮮奶 ($42)嘆下。入口幾香伯爵茶味，甜度都有嘅，咁就當作今晚嘅”甜品”囉。 用餐時間120分鐘，侍應不時加水收碟，態度有禮，實會有下次。#ublog #foodblog #kt #dinner #foodpics #steak @nata_steakhk
