要係香港搵西班牙餐廳食飯,相信難度唔高,但要搵到間好食嘅,就要碰下運氣。好彩呢間食過一次已經愛上了。 昏暗燈光,令人放輕鬆,喜歡嘅可以先黎個Happy Hour。未落單,先送上餐前小食 - 香脆麵包,配以黑醋及橄欖油,開下個胃先。 多款Tapas,始終忘不了呢個炸西班牙青椒仔 ($68),每次嚟都必叫 (哈…哈…) 品種比起一般嘅細小,一口一隻岩岩好。炸完都唔太油膩,微辣中帶點苦澀味道,趁熱食配凍飲,絶對不能少。 我會形容呢客西班牙式炸薯仔蛋配自家製煙三文魚 ($148)為呢度嘅”早餐”,睇下佢嘅材料就知。 薯仔粒炸得香味四飄,仲有煎蛋同煙三文魚,隔離配有紅菜頭絲沙律,食食下仲發現有埋藜麥,多種口感。 身為芝士控嘅我,見到”四重芝士”呢四個字,即時出現心心眼。就係咁,呢客四重芝士意大利雲吞配蕃茄香辣醬 ($168)就成為今晚菜式之一。 一咬已食到濃濃芝士味,幾有口感,唔係一團粉咁; 識得以蕃茄香辣醬黎煮,蕃茄嘅酸味與微辣味道,可中和芝士與雲吞皮嘅膩感,有心思呀。 同侍應講咗主菜後上,食完以上嘅嘢,焗西班牙走地黃油鷄 ($188)就送上啦。 擺盤精美,原隻黃油鷄焗至蜜糖色,鷄身內放咗蒜頭及檸檬片,為香味加分。 鷄隻輕易被”解體”,配以三種特色醬料點食,分別有芥末蛋黃醬/黑蒜醬/”XO醬” 鷄肉經過烤焗後都無變乾,肉質幾嫩滑,個人鍾情配”XO醬”,鷄肉味配埋蝦米香味,又幾岩數喎。 主菜類除咗係餐牌上提供果D,仲有是日精選,寫咗係黑板上,坐底後有禮侍應都會溫馨提示返。 咁就叫咗呢客香煎海鱸魚 ($238),無論賣相或份量都相當有驚喜。亦有薯仔及紅蘿蔔仔作配菜,兩款都好味,千祈咪漏咗佢地唔食呀。 講返主角先,見到魚肚內亦有檸檬片,魚配檸檬呢個配搭應該唔陌生。 唔算多細骨,皮無想像中香脆,唧少少檸檬汁一齊食會仲好味,又或者加D蕃茄醬一齊食亦得。 心血來潮查下店名有咩意思,原來解作”好味”,食物出品質素果然對得住個店名呀!#ublog #food #foodpics #foodblog #spainish #dinner #tapas