星期一晚放工後上黎呢度探一探呢隻長腿熊啤啤，好彩仲有幾張枱 黎親呢度都多數會叫脆米紙薄餅 ($54)，作為香口小食都唔錯。 脆米紙上有越南香腸粒，味道有D似廣東臘腸，加埋青瓜絲及甘荀絲，加D清爽口感，唧埋D千島醬，甜甜酸酸，輕鬆食晒無難度。 呢客火龍芒芒蝦仁配脆蝦片 ($58)，之前未食過，似為迎接轉熱天氣而出現。 火龍果及芒果粒質感相似，味道都係甜酸類; 而蝦仁爽口，再混入少少似係椰菜絲沙律，一腍一脆，用手食………掂晒。 呢度提供唔少特色飲品，用黎獲LIKE無難度。就好似呢兩杯 : 荔枝雲朵咖啡 ($32)及斑蘭奶蓋咖啡啤酒 ($45)咁，未飲就要先影相啦。 前者飲落透心涼，微微荔枝香甜味與咖啡混為一啖，比起凍啡多一份味道; 而後者成坐”富士山”造型，先飲到濃厚香甜斑蘭奶蓋味，繼而飲到啤酒口感，跟住就有咖啡味，一杯飲品有3種味道，過癮過癮。 有理由懷疑老闆都鍾意咖啡，若果唔係都唔會出現呢客NVN咖啡骨 ($78) 食之前拎定相機啦……………….將咖啡即場到入棉花糖上 禮成……………..食得。一客有4件豬軟骨，咪睇佢咁深色，味道唔算濃味，聞到咖啡香味，入口食到鬆化豬軟骨。 呢客差不多一尺蝦 ($138)，無概念是否真的”差不多一尺”，但蝦身長度超出咗隻碟。 炸香咗嘅香芋條舗上蝦隻，底部嘅醬汁味道似係是拉差辣醬作基調，辣度可接受。 成隻蝦外殼香脆，蝦頭都唔放過呀; 而蝦肉有膏之餘仲幾彈牙，點D醬一齊食，幾惹味喎。 黎食越南菜，又點少得叫碗招牌金邊粉 ($88)，以嫲嫲南越湯作招徠，改良主廚祖母食譜 湯底係幾出色，飲到牛肉湯味，仲有條油炸鬼，可用黎吸湯之用。全碗以牛肉片、牛面頰、牛腱、牛筋及牛丸等作豐富配料。 配以甜辣醬作點食，牛腩位煮得夠入味又鬆軟。 金邊粉條條粉明，入口幾細滑，偶然夾埋D芽菜一齊食，爽夾滑。 #ublog #foodblog #foodpic #foodie #foodiehk #MK #vietnam #cafe
