一段時間無上過黎開餐啦，估唔到今次黎多咗咁多新菜式，由西餐廳變成多國菜餐廳 日韓星馬菜式都有，客人多咗好多新選擇 西餐指定動作………….食沙律。就咁凱撒沙律 ($58)好似有D單調，可另加煙三文魚 ($18)，砌成朵玫瑰花咁，綠中一點橙，靚晒。柔軟咸香煙三文魚與爽口沙律菜做對好拍檔。 小食類多咗好多新選擇，就好似呢客蜜糖蒜片炸鷄 ($98) 入口熱辣辣又香，蜜糖醬汁包圍住整舊炸鷄，皮脆肉嫩; 仲有D炸蒜片，單獨食好似食緊薯片咁卜卜脆，好味呀。 呢客白咖喱豬扒便當定食 ($180) 就係今晚友人嘅主菜，除咗白咖喱豬扒外，仲有汁煮蘿蔔及炒雜菜 白咖喱豬扒比較薄切，若果諗住用白咖喱醬汁黎撈飯應該會有少少失望; 豬扒入口係鬆軟而帶香茅味。 天氣涼涼地，叫個鍋鍋都係好主意，呢個韓式部隊鍋 ($140)又點睇呀?! 成個鍋嘅份量唔野少，多種食材舖滿面，見到嘅有腸仔，午餐肉，芝士，鷄蛋豆腐及泡菜 再夾落D就見到有年糕，豬肉片，魚串，大豆芽及椰菜，超多料呀。 個湯汁唔會太酸辣，一路滾住滾住都幾過癮，以拉麵代替公仔麵，都唔錯喎。 餐包埋杯$30嘅飲品，當然要嘆杯鮮奶咖啡，心型拉花，入口香滑，飲完暖在心。 #ublog #foodblog #food #foodie #foodpics #KT #minifriday
