自從有土瓜灣站後，真係多咗去呢區搵食，上食評網發現呢間居酒屋 面積唔大，訂咗枱就穩陣D。放滿各類日式酒，清酒到威士忌都有，加上巨型月球燈裝飾，係昏暗燈光中更加搶眼。 食物款式都係走居酒屋風格，刺身/前菜/串燒/天婦羅/飯糰烏冬/甜品都有老土啲都要講句.....捉住夏天的尾巴，原來有好嘢食，夏日祭蠔有黎自兵庫縣室津生蠔 ($168/半打) 體積有半隻手掌咁大，連肉都係。侍應建議先試一隻原味，用筷子輕易夾起，快快擺入口，肥美香滑帶脆感，無腥味。附上醋汁，又另一番風味。 嘆完蠔，就到擺盤精美嘅刺身五點盛 ($388)上枱，分別有油甘魚，中拖，牡丹蝦，海膽及深海池魚 (兩切) 牡丹蝦夠甜美; 深海池魚晶瑩鮮美，手快有手慢無..... 捨棄蟹肉茶碗蒸，轉為蟹羔玉子燒 ($88)，放入蟹籽，除咗靚仔D外，仲增加卜脆口感 蟹羔"埋藏"係玉子中，玉子燒得仍然保留到蛋嘅香滑感，無咁死實，之後到蟹羔嘅鮮味係口腔湧出黎，好味。 喜愛食炸鷄，除咗食開嘅南蠻，今晚試下沖繩炸鷄 ($78)。一客份量都有成5件鷄 選用鷄鎚部份，即叫即炸，未食已經聞到好香炸物味。唧少少檸檬汁與炸鷄更夾，咬落去發出第一下"咔嚓"聲就知佢咩料啦..........哇哈哈。 點嘅部份串燒，一碟過上場。有媽媽鹹蛋豬肉棒 ($48)，將鹹蛋與豬肉呢兩種材料，由蒸變成串燒肉棒，"媽媽"就係有這種"研究"精神。味道有微微鹹蛋醬，豬肉棒入口幾鬆化，兩者化身成咁樣黎結合，係work嘅。 串燒鷄腎 ($32) - 夠晒嚼口牛系代表有厚切牛舌芯 ($68)，厚度適中，灑上黑椒鹽，外香內鬆化嫩口，牛舌味甚濃。 估唔到素肉都可以用黎整素肉棒，呢客月見免治素肉棒 ($38/串)令我大開眼界。 用返食鷄肉棒嘅食法，配以生鷄蛋沾食，多一份蛋香同滑溜感。味道同口感更勝真肉，唔講真係食唔出係素肉喎。 選用德島縣特產 - 亞波尾鷄嘅就係呢客亞波尾手羽先 ($48/隻)，特點係脂肪少及肉質脆嫩。 唔似一般嘅肥嘟嘟鷄翼，燒得鷄皮香脆，鷄肉仍然保持嫩滑雖則肉唔算太多。 慢慢食，再逐樣加單，小店格局令有放輕鬆感覺，去居酒屋開餐就是要這樣。#ublog #food #foodie #japanfood #TKW #居酒屋
