要食泰菜，唔一定要去九龍城嘅，友人又帶我去食好嘢啦除咗銅鑼灣，旺角都新開多一間，搭LIFT上16樓就到 除咗散叫，亦有套餐供應友人唔食得辣，冬蔭公轉為椰汁雞湯 ($118)，原煲上用火爐慶住，保證飲到尾都係熱辣辣，正喎。 加入椰汁令湯變為奶白色，入口有清香椰汁味道，仲有鷄肉同菇，飲完一碗成身暖晒。 小食又點少得泰式沙嗲串燒 ($48/2串)，要咗2串豬肉。每舊豬肉都係一口份量，燒得入口鬆化無肥膏得黎又唔會有乾嚡感，加埋個沙嗲點食，好味呀。 黎多個炭燒鷄腎 ($42/2串)先，醬汁變成酸辣醬汁，本身鷄腎無咩味道，加入醬汁就有檸檬葉嘅香味，燒得夠乾身，口感有嚼頭。 想食豬手但叫一客又驚多，好彩有呢客滷豬手飯 ($118) 滷豬手相當入味，豬皮已炆得綿滑，充滿骨膠原，去骨淨肉，食起黎相當方便又好送飯，仲有隻滷蛋，豐富呀。 呢碟炒椰菜苗 ($108)係多數食泰菜必叫，唔食辣改用蒜蓉炒，原本以為係一個個波波仔嘅苗，黎到係"小學版"，好彩都仲係爽脆。 要食香口嘢，點少得蒜香牛油雞翼 ($98)?! 6隻肥嘟嘟鷄翼整齊排列，外層"披上"一身金黃聖衣，再加上蒜蓉，當然要趁熱食啦。 呢客濕炒河粉 ($128)，(豬/牛/鷄中選一款)，選擇鷄肉濕炒。份量大得驚人，足夠4人食都唔過份。材料除咗有鷄肉外，仲有甜椒絲，蛋絲，紫洋蔥及菇。醬汁調味岩岩好，會過濃，河粉炒得條條分明又唔太油膩。 呢度嘅食物，上菜速度快，而且份量簡直多得有點過份，想食多D其他菜式，下次一定要叫多D親友黎先得。#ublog #food #foodie #foodpic #foodpics #MK #thaifood
