呢個商場分為三期，開咗好多唔同種類嘅餐廳，住呢頭嘅朋友就同我去食咗呢間新開張嘅中菜館 面積寬敞，裝修走時尚風格，環境燈光配搭比人幾舒服感覺，唔會太嘈吵。 手機落單，食物種類分為點心，主菜，前菜，甜品，過癮嘅呢度仲有台式飲品供應，珍珠奶茶都係$18杯，份量同出面一樣咁大杯，相當抵飲。 新張優惠，每兩位送玉桂乳鴿一隻，雖然免費送嘅，但水準絶不馬虎，滷得相當入味，D肉亦唔會乾爭爭，最重要係入口係熱辣辣嘅。 食過唔夠喉嘅，家陣都係特價$39隻，要比錢都食得過。 天氣熱嘅日子，叫D凍盤食下先，先黎沙薑豬手 ($68) 斬至一口份量，豬皮爽脆，食到少少沙薑味，個汁加埋蒜蓉，香中帶甜，用黎撈飯就正啦。 仲有花雕醉雞 ($68) 花雕酒完全滲進雞件中，唔食皮嘅可以輕鬆去除，入口陣陣酒香味，一客份量都唔少。 主菜叫咗酸菜無骨魚 ($128)，成大兜，目測魚塊與酸菜嘅比例係各佔一半，仲有薯粉。 酸度適中，微辣，惹人胃口，加少少落白飯都唔錯; 無骨魚有相當厚度，所以稱為魚塊適合D; 啖啖肉放心食，肉質幾滑，多食幾件都唔會話膩。 呢碟龍鬚芥蘭 ($88)，特別之處當然係心機啦，每條芥蘭界成龍鬚狀，成碟炒芥蘭當堂升晒"呢"，加幾粒杞子，靚晒。當然都炒得夠脆度。 今餐有鷄，豬，魚同菜，食得相當豐富，埋單只係四百幾。侍應招呼唔錯，主動加茶收碟，下次可以試下D精緻點心。#ublog #food #TKO #foodpics #foodblog #chinese
