呢間日頭係Cafe，夜間會變成Bar嘅餐廳，係由係銅鑼灣返工嘅為食組友人介紹 店內面積唔大，分為餐枱及吧枱，今晚就被安排坐吧枱 既然夜晚化身成Bar，當然叫杯嘢飲Chill下先，呢兩杯顏色咁岩tone嘅係Mojito ($88)同Falling ($78)，前者略帶酒香又有清新薄荷葉香味; 後者係荔枝及檸檬梳打，甜中帶果酸，兩杯都係有氣飲品，夏天飲確係爽極! Cheers.................... 沙律只有兩款選擇，二選一情況下，呢客咁精緻嘅水牛城芝士蕃茄沙律 ($98)勝出 軟滑口感水牛城芝士與多汁蕃茄砌出層層疊，底部加上意大利黑醋，增加甜酸香味，好耐無食過呢個沙律啦，好味呀! 身為鷄翼控嘅我，又點可放過Al Forno鷄翼(海鹽黑椒味) ($88/6隻)，作為送酒小食用 每隻鷄翼都相當飽滿，大細均一，皮香肉滑，海鹽味濃過黑椒味，乾身無醬汁食起黎比較方便 小食一款又點夠數，呢客Al Forno迷你蟹餅配蒜香蛋黃醬 ($98/3件)係網上都有唔少好評 擺盤類似鷄翼，同樣有少許沙律菜伴碟，可中和一下熱氣?! 唔理啦..........切開見到滿滿蟹肉，入口果然係滿口香甜蟹肉味道，一定要點多D蒜香蛋黃醬一齊食，雙倍滋味，果然網評無老點呀! 係時候到主食出場，一客擺盤吸睛嘅蒜香白酒蝦扁意粉配意式風乾火腿 ($158)就上枱，數隻大蝦放置於邊位圍住意粉，中間嘅意式風乾火腿捲成皇冠咁"坐落"於意粉上! 大蝦口感相當爽口; 意式風乾火腿單食就稍為濃味，撕成一小片伴意粉食多一份咸香味; 而個意粉應該係以蒜油炒成，每一啖都充滿香蒜味，最怕就係就住就住，呢度就煮得相當岩口味! 除咗鷄翼控，我都係一個芝士控，見到呢個四式芝士手工薄餅 ($148)仲唔出現心心眼?! 橢圓形薄餅，拎起時就係我最期待出現嘅拉絲畫面呀..................望到不禁口水都流埋 餅底比起大型連鎖店嘅薄少少，入口有筋性，而四式芝士混合，每啖都充滿"芝"味，偶然食到水牛芝士仲有煙韌口感，雖然成個薄餅都係芝士，但唔會有太膩感覺，趁熱食啦喂! 呢度仲有少量甜品供應，見到隔離枱叫咗客提拉米蘇，但今餐都食得好飽，唯有下次啦!#cafe #bar #salad #ublog #cocktail #pizza #chickenwings #crabmeatball #tasty
