之前係呢層樓嘅肉店買過凍肉,今晚再要入貨,入完貨當然順便開埋餐,就比我見到佢 係食日本嘅,價錢望落合理,仲有最後一張卡位,快快入座先套餐只有二人餐,其餘單點 (前菜/沙律/串燒/天婦羅/日式料理/烏冬炒拉麵等),另供應多款特式咖啡及飲品,仲有甜品,手機落單!估唔到最先出場係呢客南蠻炸鷄籃 ($62),一籃有5-6件,炸鷄上已有蛋沙律醬,附送嘅醬油無點過 入口熱辣辣又唔會一口油,炸漿唔太厚唔會食到一口粉都未食到主角,鷄肉保持肉汁同滑度,好得喎! 之後到牛油果蟹籽沙律 ($52),兩種食材都係我喜愛,蟹籽及青瓜絲都係超脆感,呢個熱天食好引人胃口; 綿滑牛油果粒增加香滑度,唯份量少咗D! 係日本餐廳出現嘅韓風牛舌 ($28),厚切牛舌,驟眼睇似鷄腎 汁煮味道唔會過濃,灑上芝麻,不單"韓風"提升,仲增加香度,牛舌雖然厚切但入口唔韌仲煮得幾入味,當前菜小食份量岩岩好! 主食叫咗碗大蔥鷄肉稻庭烏冬 ($78),送上枱時都驚訝咁大碗嘅?! 目測餸料包括日本魚蛋,大蔥,油揚及鷄肉 稻庭烏冬主打幼滑度,湯底清甜唔油膩,一口夾住送入口,爽快.........隨即送多口鷄肉及大蔥,滿足度加大! 食緊烏冬嘅同時,條花魚一夜干 ($78),就送上啦。上網查過HOKKE叫(魚花)魚,又叫多線魚,主要係得一條主骨,微少細骨,食起黎都方便 附上醬汁及蘿蔔茸,用黎點魚食簡直絶配,魚肉經過半風乾製法,肉質仍然嫩滑,用鹽醃製過多一份咸香,魚皮若然唔怕咸咗D都可以食埋! 咁嘅價錢有咁嘅質素同份量,相當抵食!